МИКЕЛЕРНІҢ АЙМАҒЫ КӦЗІДІЛГЕН
06.02.2019
Хабарлар
Арға-мӧрійлер. 1 - 3 февральда Ағбандағы Иван Ярыгиннің адынаң Кӱрес туразында чииттер аразында Хакасияның первенствозы ирткен. Анда пістің республикадағы город-аймахтарның командалары араласханнар, харбазығлар хазыр парғаннар.
Чыл пасталчатса, спорттың аймах кӧрімнерінңе марығлар иртіріл сыхчалар. Анзы хаҷанох кибірге кір парған. Ол марығларда чахсы тимненіс кӧзіткеннер сыйыхтығ орыннарға сығып алчалар, постарының регионының піріктірілген командаларына кіріп, улуғ марығларға тимненіп пастапчалар.
Андағох таллағ марығлары олаңай кӱреснең айғасчатхан саарбахтар паза чииттер аразында ирткен. Республика мариинда 2004-2005 чылларда тӧреен оолағастар, 2002-2003 чылларда тӧреен хызыҷахтар, 1999 - 2001 чылларда тӧреен хыстар паза ооллар постарының тимненістерін сынадылар, тиң частығларнаң тоғазып, хатығ кӱрес-харбас апардылар.
Ағбандағы Иван Ярыгиннің адынаң Кӱрес туразында марығлар хайди иртчеткенін кӧрерге хынчалар. Мында ікі ле кибіс. Кӧрігҷілерге дее орын асхынах, аннаңар балконда поохти турғлабысчалар. Анаң на аахтас-суулас сыхсалар, ӱр нимеске дее тохтабинчатханға тӧӧйлер.
Кибістегі тоғазығларны ӧӧртін кӧрерге дее чапсых пілдірче - прай ниме айадағы чіли харахтарыбыс алнында. Кем хайдағ мике саларға тимненчеткенін пілігҷілер азынада сизінібісчелер.
Чоох микедеңер парыбысханда, улуғ спортсар наа ла хаалағ итчеткеннер аразында пастағы туста алҷаастар матап поладырлар. Андағларны кӧрерге уламох хынығ. Че чиит кӱресчілер сала даа чідірінминчелер, пір мике киліспинчетсе, сах андох пасха мике толдырарға харасчалар.
Оларның алнында пір ле пӧгін - хайди даа чиңіс тударға. Хайдағ оңдайнаң - анзы ікінҷі сурығ. Ол сылтағнаң чиит кӱресчілер мике-сӱмелернің аймағынаң тузаланарға харасханнар, кӧрігҷілерні матап ӧріндір турғаннар.
Олаңай кӱрес мариинда асхынах нимес кізі араласхан сылтаанда, сыйыхтығ орыннарға сыххан алып-кӱлӱктернің прайзын кӧзітчең оңдай чоғыл. Аннаңар тиң частығлар аразында постарының кӧдірімнерінде чиңіс тутхан оол-хыстарны ла кӧзіт пирерге чарадыбыстыбыс.
2004-2005 чылларда тӧреен оолағастар:
38 кг - Данил Канзычаков, Ағбан;
41 кг - Илья Балахчин, Асхыс аймаа;
44 кг -Александр Кузургашев, Асхыс аймаа;
48 кг - Аскар Тюмереков, Асхыс аймаа;
52 кг - Владимир Асочаков, Ағбан;
57 кг -Руслан Пастаев, Ағбан;
62 кг - Дмитрий Астанаев, Таштып аймаа;
68 кг - Александр Печенкин, Саяногорск;
75 кг - Данил Коновалов, Саяногорск;
85 кг - Дмитрий Круглов, Ағбан.
2002-2003 чылларда тӧреен хызыҷахтар:
40 кг - Оксана Сазанакова, Таштып аймаа;
43 кг - Анжелика Гударева, Таштып аймаа;
46 кг - Вера Тадазакова, Асхыс аймаа;
49 кг - Наталья Пудова, Асхыс аймаа;
53 кг - Алина Сагалакова, Ағбан;
57 кг - Тарина Бытотова, Асхыс аймаа;
61 кг - Камила Кузнецова, Ағбан;
69 кг -Софья Захарова, Ағбан.
1999 - 2001 чылларда тӧреен ооллар:
57 кг - Денис Кужаков, Ағбан;
61 кг - Алексей Килижеков, Ағбан;
65 кг - Роман Астанаев, Ағбан;
70 кг - Денис Тороков, Ағбан;
74 кг - Аймир Тюкпиеков, Ағбан;
79 кг - Сергей Канзычаков, Ағбан;
86 кг - Руслан Лелюкаев, Саяногорск;
92 кг - Максим Фролов, Саяногорск;
125 кг - Павел Плотников, Ағбан пилтірі аймаа.
1999 - 2001 чылларда тӧреен хыстар
53 кг - Дарья Чебодаева, Ағбан;
55 кг - Карина Барашкова, Ағбан;
59 кг - Ольга Абрамова, Ағбан;
62 кг - Яна Хворова, Ағ-бан пилтірі аймаа;
72 кг - Анна Шампурова, Ағбан;
76 кг - Елизавета Вихарева, Ағбан.
Амды олар Сибирьдегі федеральнай округтың марығларында Хакасия ӱчӱн турызарлар. Чиңіс тударға, сыйыхтығ орыннарға сығып аларға кӱстеніңер, ооллар паза хыстар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде