ХУБАЧАРДАҒЫЛАР ИМНЕГ ТУРАЗЫН ЧИДІКПИН САҒЫПЧАЛАР
08.02.2019
Хабарлар
Тоғыс чорығы. Хакасияның пазы Валентин Коновалов 5 февральда Алтай аймаандағы Хубачар аалда наа пӱдіріглерде сыныхтағнаң пол килген.
ПАСТАП ВАЛЕНТИН КОНОВАЛОВ ХУБАЧАРДАҒЫ НАА ИМНЕГ ТУРАЗЫ ПӰДІРІЛЧЕТКЕН ОРЫНЗАР ПАРҒАН. АМҒЫ ТУСТА ХУБАЧАРНЫҢ ИМНЕГ УЧРЕЖДЕНИЕЛЕРІ ИРГІ ТУРАЛАРДА ОРНЫХЧАЛАР. НАА ПОЛИКЛИНИКАНЫҢ ПӰДІРИИ 2011 ЧЫЛНЫҢ ИЮЛЬ АЙЫНДА ПАСТАЛҒАН. ПӰӰНГІ КӰНГЕ ПӰДІРІГҶІЛЕР КІРПИСНЕҢ ТАСТЫНДАҒЫ СТЕНЕЛЕРНІ САЛЫБЫСХАННАР, ХЫРЫН ЧАБЫСХАННАР ПАЗА ТУРАНЫҢ АЛТЫНДАҒЫ ХАДЫЛЫН ИПТЕП САЛҒАННАР. АННАҢ ПАСХА, ТУРА ІСТІНДЕ ПАЗА ТАСТЫНДА ЧЫЛЫҒ ПИРҶЕҢ СЕТЬТЕР ИДІЛ ПАРҒАННАР.
ӰС ХАДЫЛЛЫҒ ИМНЕГ ТУРАЗЫНЫҢ ТИКСІ ПААЗЫ 272 МИЛЛИОН САЛКОВАЙҒА ТУР ПАРЧА. АНЫ 2019 ЧЫЛДА ПӰДІРІБІЗЕР ӰЧӰН РЕСПУБЛИКА БЮДЖЕДІНЕҢ 140 МИЛЛИОН САЛКОВАЙ ХОРАДЫЛАРЫ КӦРІЛ ПАРҒАН.
Пӱӱл Хубачар аалда ӱс хадыллығ имнег туразы паза «Теремок» олған сады пӱдіріл парарға кирек. Регион пазы Валентин Коновалов иң пастағызын хайығ салған имнег туразы 2011 чылдох пӱдіріліп пасталғанына. Анаң проект тӱзеділген ме тіп сурған. Хакасияның хазых хайраллаҷаң министрі Владимир Костюштың чооғынаң, читпестер тузында тӱзеділгеннер, аннаңар пӱдірігнің читпес сари чоғыл.
- Хубачар аал чуртағҷыларына имнег туразы пӱдірілчеткені уғаа танығлығ. Анда олар имнег полызиин толдыразынаң ал поларлар. Орындағы имнег туразында кирек специалисттерде хазыхтарын тиксі сыныхтан поларлар, - таныхтаан Хакасия пазы Валентин Коновалов.
Наа имнег туразында 26 имҷі 16 специальностьча аал чуртағҷыларына имнег полызиин пирер. Алтай аймааның пазы Татьяна Раменскаяның чооғынаң, имнег туразы пӱдіріл парарын прай чуртағҷылар чидікпин сағыпчалар. Имҷілер, тізең, амғы тусха килістіре наа оңдайларда тоғынарына ізенчелер. Амды пу пӱдіріг тибіреп сыхханда, аймах чуртағҷыларының даа, имнег тоғынҷыларының даа ӧрінҷең сылтағ пар.
Хубачардағы имнег туразының ӧӧн имҷізі Евдокия Чебочакова наа имнег туразының хайдағ хадылында ниме орнығарын чарытхан. Пастағы хадылында олған поликлиниказы орнығар, пандустығ алынҷа кірҷең ізік полар. Пастағыох хадылында регистратура, хирургия, процедура кабинеттері паза табырах полызығ пирҷең пӧлік полар. Тураның пасха саринда чуғынҷах ағырығнаң ағырыбысхан кізілерге имҷізер кірҷең алынҷа ізік кӧрілче.
Ікінҷі хадылында диагностика лабораториязы, терапевттер паза пасха даа специалисттер тоғынарлар, ӱзінҷі хадылында - ипчілер консультациязы, рентген, флюорография, УЗИ, ЭКГ кабинеттері орнығарлар.
Анаң Хакасия пазы Валентин Коновалов Хубачардағы «Теремок» олған садының пӱдірии хайди парчатханын кӧрерге парған. Амғы туста олған садының стенелері, хыры, ізии паза кӧзенектері турғызыл парғаннар. Тураның істінде паза тастында чылығ пирҷең сетьтер иділ парған. Пӱдірігділер, пол тӧзеп, вентиляция системазын турғысчалар. Олған сады ікі айлығдаң пасти ӱс частығ 60 палаа кӧрілче. Аның пӱдіриине тиксі 42 миллион салковай хорадылары кӧріл парған. Аны пӱӱл августта тузаланысха кирерлер.
Пӱӱл Хакасияда хоза пис олған сады азыларға кирек. Олар республиканың иң киректелчеткен аал-городтарында, Асхыста, Кӧк хайада паза Ағбанда пӱдірілерлер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы