ХЫЗЫЛ САЛДАНЫҢ ОЛҒАННАРЫ СЫЙЫХТАР АЛДЫ
23.08.2019
Хабарлар
Акция. Хакасияның министерство-ведомстволары ӱгредіг чылы пасталар алнында республиканың кічіг паза ыраххы аалларындағы палаларға школаа кирек ниме-ноолар сыйлапчалар
Хызыл Салда Алтай аймаандағы Аршаннар аал чӧбіне кірче паза Хакасияның кічіг аалларының пірсі полча. Пӱӱнгі кӱнде анда алты сӧбіре чуртапча, оларның ӱзінде 6 - 18 частығ палалар ӧсче. Таракановтарның сӧбірезі Хызыл Салдазар Хубачардаң читі чыл мының алнында кӧскен, оларның 18 часха читкелек ӱс пала. Чуртағҷылар мал тудып паза ӱӱҷік тамаан ӧскіріп чуртапчалар.
Хызыл Салданың кураторы Хакасияның социальнай полызығ пирҷең министерствозы полча. Піліс кӱні чағдапчатханда, министерствоның тоғынҷылары андар чол тутханнар. Аалзар кірчеткен чолдағы тохтағнаң хости олған площадказы орныхча. Аалҷылар паза орындағы чуртағҷылар анда чыылысханнар. Министерство тоғынҷылары чыл сай иртірілчеткен «Школазар чол» акция хоостыра анда полғаннар. Сыйыхтар аларға ікі іҷе палаларынаң хада килген.
Хакасияның социальнай полызығ пирҷең министрінің орынҷызы Владимир Чебодаев, полған на паланаң танызып, сыйыхтар читірген. Олғаннарның аразында иң кічіг частығ Ева Сазанакова полтыр, ол ам даа олған садына чӧрче. «Школаа хаҷан парарзың?» - сурған аннаң Владимир Петрович. «Килчеткен чылда парарбын», - нандырған алты частығ Еваңах. «Че, чахсы!» - махтап салған аны министр орынҷызы.
Оолағастар Вадим Сазанаков паза Тимир Тараканов пасталығ класстарда ӱгренчелер. Олар сыйыхха канцеляриялығ рюкзактар алғаннар. Ідӧк пу аалда чуртапчатхан, Хызылчарда ӱгренчеткен студент хыстар сыйыхтар алғаннар. Олар пиҷелер - Мария паза Диана Таракановалар.
- Піс олғаннарны наа ӱгредіг чылы пасталчатханынаң алғыстапчабыс! Пӱӱн мында олған садынзар, школаа чӧрчеткен олғаннар паза студенттер. Анзы уғаа махтағлығ! Школаа парарына читірілген сыйыхтар сірерге туза ла ползын, чахсы ӱгреніңер! - алғаан министр орынҷызы Владимир Чебодаев.
Министр орынҷызы мындағ чӧрім чыл сай ӱгредіг чылы пасталар алнында иртірілче тіп чоохтаан. Школаа кирек ниме-ноолар спонсорлар паза министерство тоғынҷылары ахчазына алылча. Акция іҷе-пабаларға палаларын школаа тимнирге полыс пирер ӱчӱн иртірілче.
Сыйыхтарны олғаннар хынып кӧрглееннер. Школаа чӧрҷең чыындаа ӧңніг карандаш-фломастерлер, сырлар, ручка-тетрадьтар, альбомнар паза даа пасха кирек нимелер кірчелер. Олған садынзар чӧрчеткен Еваның папказында хоостаҷаң альбомнар паза сырлар полған. Хызыҷах оларны, кӧріп алған соонаң, нандыра ипти салып одырған. Оолағастар даа алған сыйыхтарына чӧпсінгеннер.
Олғаннар нименең айғасчатханнарынаңар чарыда чоохтап пиргеннер. Олар чӱгӱр чӧрерге, велосипедтіг ойлат чӧрерге хынчаттырлар, иб аразында хайынып, іҷелеріне полысчаттырлар. Тимирнең Вадим пӱӱл 4-ҷі классха парчалар, Аршандағы ортымах школаның ӱгренҷілері полчалар. Студент хыстар Мариянаң Диана Хызылчарда ӱгренчелер. Диана Тараканова Хызылчардағы тимір чол транспортының техникумында 2-ӌі курста ӱгренер. Ол проводник полып тоғынарға пӧгінче. Туңмазы Мария Хызылчардағы экономиканың кооператив техникумында гостиница киреене ӱгренче. Оларның ікізі дее улуғ городта чуртирға пӧгінче. Амды, тізең, чолға сығарға тимненчелер. Пу палаларның ӱгредіг чылы тӱзімніг парарына ізенербіс.
Автор :
Елена САГАТАЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде