ФЕРМЕРГЕ ЧУРТ ПӰДІРЕРГЕ ЧАРАДАРҒА
04.10.2019
Хабарлар
Ӧӧркі Чӧп. Хакасияның Оӧркі Чӧп кнезі Владимир Штыгашев президиум чыылиин иртірген. Сурығларның кобізі федеральнаи закон проекттеріне ӱндезерінең палғалыстығ полған
Ӧӧркі Чӧп президиумы ӱзӱрген сурығларның пірсі аал хонииндағыларға теелген. Аал хонии политиказынҷа, ас-тамахча паза чирнең тузаланарынҷа комитеттің устағҷызы Пётр Воронин, Хазна Думазының депутаттар ӧмезі тимнеен федеральнай закон проектінең таныстырып, мында фермерлерге постың аал хонии чирлерінде чуртачаң тура пӱдірерге чарадардаңар чоох парча тіп чарытхан.
Амғы туста Чир кодексінің алынҷа статьяларынҷа, кресен-фермер хониинаң айғасчатханнарға оларның холындағы аал хонии чирлерінде чуртаҷаң тура пӱдірерге чарадылбинчаттыр. Хазна Думазының депутаттары ол читпесті тӱзедер паза КФХ-лар тилізіне хабазар пӧгіннең фермерлерге чурт пӱдірерге чаратчатхан федеральнай закон проектін тимнеп салтырлар. Хайди таныхтаан Пётр Воронин, олох туста фермерлер ол оңдайнаң тузаланарында иртіре парбас ӱчӱн (піреезі, арса, аал хонии чирлерінде кӧп тура пӱдір сығар) закон проектінде алынча кирексіністер турғызыл парған.
Иң пастағызын, фермер туразын КФХ-ның алай КФХ-зар кірчеткеннернің холында полчатхан чир участогында ла пӱдірерге чарир. Ікінҷізін, тураның улии 600 квадрат метрдең артых полбасха паза тура орныхчатхан чир тиксі чир участогының 5%-інең ас-пасха кирек. Ағаа хоза пасха даа кирексіністер пар осхас.
Оӧркі Чӧп кнезі Владимир Штыгашев пу федеральнай закон проектіне хабазарға киректелчеткенін таныхтаан.
- Хабас пирерге кирек, - чоохтанған ол. - Амды хайди пол парча, пістің пірее фермерлер, кавычкада, чирлерінде вагоныҷах турғыс салчалар, анаң чаллап алған тоғынҷыларын ол тизік-тазых пӱдірігде чуртатчалар. Тасхар, тізең, 35 градус соох. Піди тоғынҷыларға чуртаҷаң тура пӱдір саларға чарир пол парар.
Президиумдағылар пір ӱннең фермерлерге постың аал хонии чирінде тура пӱдірерге чарадар закон проектіне хабазарға чарат салғаннар.
Паза пір федеральнай закон проекті хазнаның культура ис-пайы полчатхан объекттерні хайраллирынаң палғалыстығ полған. Культураҷа, ӱгредігҷе паза наукаҷа комитеттің кнезі Оксана Разваринаның искіриинең, Россия правительствозы тимнеен закон проектінде культура ис-пайы полчатхан объекттернің фасадында тастындағы блоктығ кондиционерлер, аймах-пасха антенналар паза пасха даа техника тиріглерін (хадағ паза сигнализация тиріглерінен пасха) турғызарға чаратпастаңар чоох парча.
- Пӱӱнгі кӱнде Россияда 142 муң культура ис-пайының объекті реестрге кирілген, - таныхтаан Оксана Разварина. - 2018 чылда ол объекттер хайдағ оңдайда полчатханын сыныхтаҷаң мероприятиелер иртірілгенде, фасадтарда закон хыйыстыра андағ ниме-ноолар турғызылғаны 40 регионда тоғасхан.
Федеральнай закон проектінҷе чуртаҷаң тураларда, хайзылары культура ис-пайының объекті санында, ол чарадылбас ниме-нооларны чағынғы реставрация тузында хыйа идері кӧріл парған, чуртабинчатхан тураларда - закон кӱзіне кірібіскенінең пасти 180 кӱн ирткенче.
Оӧркі Чӧп президиумы пу закон проектіне ідӧк хабазығ пирерге чаратхан.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде