«ХАБАР» ГАЗЕТА - ИҢ АРТЫХТАР САНЫНДА
04.10.2019
Хабарлар
Ӧріністіг тоғазығ тузында: Ольга ШИРКОВЕЦ «Россияның иң артых пис национальнай изданиезі» марығның III степеньнiг дипломын «Хабар» газетаа читір пирген
Поғдархас. Пу наада Хакасияның журналисттер пірігізінің кнезі Ольга Ширковец Сочидең, «Тиксі Россия-2019» амғы журналистика форумынаң, «Хабар» газета тоғынҷыларына паза хығырығҷыларына оріністіг хабарнаң айланды
Ӱртӱн айының 21 - 27 кӱннерінде Сочиде «Тиксі Россия-2019» амғы журналистика форумы ирткен. Пу хабарҷыларға уғаа танығлығ паза тузалығ мероприятиені Россияның хабарҷылар пірігізі иртірче. Пір неделя аразына тиксі хазнабыстың СМИ устағҷылары, хабарҷылары пӱӱнгі сидік сурығларны, наа алызығларны паза кирексіністерні ӱзӱрчелер.
- Пӱӱл «Тиксі Россия» форум 23-ҷі хати иртірілді, - чоохтаан Ольга Валериановна, редакция тоғынҷыларынаң тоғасханда. - Ӱгредіг уғаа хынығ иртче. Фамилияларны ла адаза, форумның позік синде иртчеткені пілдістіг: «Московский комсомолец» газетаның Оон редакторы паза ээзі Павел Гусев, тиксі Россияның хазна телерадиокомпаниязының Ӧӧн директор орынӌызы Дмитрий Киселев, Россияның Хазна Думазынаң искіріг политиказынӌа, искіріг технологияларынҷа паза палғалысча комитет кнезі Леонид Левин паза пасхазы. Мастер-класстар аймах сурығларға чарыдылғаннар, прайзы хынығ полған, аннаңар пірее туста хайзынзар парарын таллап полбиндаачатхабыс.
«Тиксі Россия» форумда ӱртӱн айының 24-ҷі кӱні Национальнай СМИ кӱні тіп чарлалған. Россияның национальнай СМИ хабарҷылары пу кӱнге Онетін тимнен килтірлер.
- Хабарҷылар пос чонының кип-азаан, чазанҷыхтарын кис килтірлер, - чоохтапча Ольга Валериановна.
- Якут хыстары кӱмӱс ілҷірбелерінең чазан салтырлар, татарлар - чон кип-азаанаң, прайзы даа кибірліг ас-тамаан тимнептір. Полған кізі регионының саблығ таңмаларын паза танығларын ағылтыр. Че иң Оріністіг чардых - ол «Россияның иң артых пис национальнай изданиезі» марығ салтарлары. Мин сірерні алғыстапчам, «Хабар» газета анда ӱзінҷі орынға турысхан. 16 регионның 51 газета-журналлары аразында иң артыхтар санына кирілгені - ол пӧзік паалағ. «Хабар» газета ӧсчеткеніне ӧрінчем, прай чӱреемнең сірерні пу аарлығ сыйыхнаң алғыстапчам. Мыннаң мындар уламох пӧзік чидіглер алғапчам.
Газетаның ӧӧн редакторы Радион Сунчугашев Ольга Валериановнаны газетаның сыйиин читір пирген ӱчӱн алғыстаан. Олох туста устағҷы пу пӧзік сыйых тиксі редакция тоғынҷыларының тоғыс салтары тіп таныхтаан.
- Национальнай газеталар аразында мындағ марығ иртірілчеткені уғаа чахсы, ол - тиліске хоза кӧстег паза пос тоғызын пасхазынаң тиңнестіріп алар оңдай, - таныхтаан Радион Дмитриевич. - Пӱӱнгі кӱнде чачында сыхчатхан изданиелер сидік тустарны тобырчалар. Иң пастағызын, ол хығырығҷылар саны хызырылчатхны. Анзы наа технологиялар тиліпчеткенінең дее, почта тоғызынаң даа палғалыстығ. Че хайдағ даа сидіксіністер тиліс чолында учураза, газета хығырығҷыларына тоғынча. Пӱӱнгі кӱнде «Хабар» газета ол республиканың хабар-искіріглері ле нимес, ол чоныбыстың тархынынаңар, кибір-чозахтарынаңар, культуразынаңар паза саблығ чуртағҷыларынаңар материаллар. Аның страницаларында кічіг-улуғ частығ хығырығҷылар постарына килістіре рубрика таапчалар. Иң кічіглеріне «Ноға-ноғаҷахтар» хоза сығарыс сыхча, школада ӱгренчеткеннерге - «Хола пырғыҷах», чииттерге - «Чиит тус». Чайаачы сӧс устар чолын пастапчатханнарға хоза сығарыс парох - ол «Таң солбаны». 2019 чылның наа проекті - «Чир-суубыс мында пасталча», хайда пістің хабарҷылар хакас аалларның аның чуртағҷыларының пӱӱнгі чуртазын чарытчалар.
«Россияның иң артых пис национальнай изданиезі» марығда тиксі пис номинация чарлалча: «Аймахтың (муниципалитеттің) иң артых газетазы», «Иң артых газета», «Иң артых журнал», «Иң артых олған изданиезі» паза «Иң артых литература-хоос изданиезі». «Иң артых газета» номинацияда ӱзінҷі орынға пістің газета сығарылған, ікінҷі орында - «Башкортостан» газета (Башкортостан Республика). Чиңісчі полыбысхан «Удмурт дунне» («Удмуртский мир») газета (Удмуртия Республика). Марығ «Национальнай СМИ ассоциациязы» пастаанаң паза Россияның журналисттер пірігізінiң, Россияның региондағы СМИ устағҷыларының альянсы хабазиинаң иртірілче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы