ПІСТІҢНЕРНІ ПАСХА РЕГИОННАРДА ТАНЫХТАПЧАЛАР
11.12.2019
Хабарлар
Пайрам. Н.Ф.Катановтың адынаң Хакас хазна университедінің актовай залында имнег колледжінің 85 чылы таныхталған
Пістің республикада имҷілер колледжі иң пастағы ӱгредіг заведениелерінің пірсі полча. Ол 1934 чылда тӧстелген, че андада ол фельдшер-акушерлер школазы тіп адалған. Ол чылларда ӱгредіг пирчеткен школаның позының туразы чох полған. Студенттер городтағы имнег туразының нинҷе-де кабинедінде ӱгренҷеңнер. Прай 9 ӱгретчі полған. Андағ улуғ нимес ӱгредіг школазының пастағы выпускниктері сағынмаан даа поларлар, 85 чыл пазынаң фельдшер-акушерлер школазы улуғ паза кирексіністе полчатхан ӱгредіг заведениезіне айлан парарынаңар. Пӱӱнгі кӱнде колледж тӧрт кӧстегҷе специалисттерні тимнепче. Имнег колледжінің пӱӱнгі кӱнге теере пай тархын тӧстел парған. Аны тоосхан студенттернің прайзы даа чахсы имҷі, кӧбізі, ӱгредиин аннаң ан-дар узарадып, пӧзік чидіглерге чит-кен. Ол кӱн колледжтің студенттеріне республика чуртағҷылары алғыстастарын читіргеннер. Олар, тоғыстарын чахсы толдырып, кӧп кізінің чуртазын ал халып, азахха турғысханнар.
Танығлығ пайрамнаң имнег колледжінің тоғынҷыларын, студенттерін Хакасияның хазых хайраллаҷаң министрі Владимир Костюш, Хакас хазна университедінің ректоры Татьяна Краснова паза даа пасхазы алғыстирға килгеннер. Ідӧк алғыстас сӧстерін читіргеннер, имнег колледжін тоозып, амды республиканың имнег тураларында тоғынчатхан специалисттер.
Республиканың хазых хайраллаҷаң министрі Владимир Костюш, колледжтің ӱгретчілеріне чахсы паза турыстығ имҷілерні тимнепчеткеннері ӱчӱн улуғ алғызын читіріп, таныхтаан:
- Хакасияның Ӧӧркі Чӧбі полызиинаң студенттерге хоза социальнай хабазығ пирілче. Пастағы курстың студенті, республикадағы имнег тураларынаң тоғынардаңар чӧптезіг ит салза, стипендияа хоза тӧлег алар. Андағ чӧптезіг 40 студент ит салған. Ол тӧлег ай сай ӱгредігні тоосханҷа пирілер.
Алғыстас сӧстерін читірген соонаң, кӧп чыл тоғын салған, имнег колледжінің ӱгретчілерін турыстығ имнег тоғынҷыларын тимнепчеткеннері ӱчӱн паза танығлығ 85 чыл толчатханынаң Аарластығ пічіктернең таныхтааннар. Пайрамға килген аалҷыларның аразында тынағдағы ӱгретчілер полған, оларға ідӧк сыйыхтар читіргеннер.
Килген кізілерге музыка колледжінің студенттері паза городтың чайаачы ӧмелері концерт кӧзіткеннер. Аалҷыларны ырларнаң, теелбектернең ӧріндіргеннер. Пайрамнығ иир чахсы паза чалахай ирткен.
Ортын имнег тоғынҷыларының тоғызы оой нимес. Оларның холында кічіг палалар паза улуғлар даа. Имҷілер чахсы піліс албаан ползалар, олар махтағда полбасчыхтар. Таныхтирға кирек, Хакас хазна университедінің имнег колледжінің студенттерін, пасха регионнарның ВУЗ-тарынзар ӱгренерге парза, чахсы пілістіглер тіп таныхтапчалар. Анзы имнег колледжінің ӱгретчілері пӧзік пілістіг полчатханын киречілепче.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде