ТӦӦЙ НИМЕС ОЙЫННАР
27.12.2019
Хабарлар
Кемнің узы артых полар ни?
Меспектіг хоккей. Ағбандағы «Саяны» позының айғызында Кемеровтаң килген «Кузбасс-2» команданаң тоғасхан
Пістіңнер, марығ ээлері полып, ибде хайди даа утарға кирек полғаннар. Аннаңар 24 декабрьда ойын 19.00 часта даа пасталған полза, городтың ӧӧн стадионынзар кӧрігҷілер асхынах нимес чыылысханнар. Анзы пасха кӱннернең тиңнестірзе. Паза мына ниме чапсытхан - улуғлар аразында олғаннар матап чӱгӱріс чӧрчеткеннер. Оларның ӧтіг табыстары стадионға толчатханға тӧӧй пілдірген. Ойынны хынып кӧргеннер.
Кӧрігҷілернің улуғ ӧрінізіне, пістіңнер 5:0 саннаң чиңіс тутханнар. Мында иң пастап Руслан Гавричковты махтирға кирек - ол ікі гол кирібіскен. Пірер гол киргеннер Фёдор Розвезев, Илья Деревцов паза Михаил Селедков. Ағаа хоза Илья Деревцовты таныхтирға чарир - «Саяны» командаа наа ла алылған чиит хоккеист пастағы гол кирібіскеніне матап ӧрінген.
Тоғазығ тоозылғандох, кӧрігҷілернің піреезі санап пастабысхан - «Саяны» пастағы орынға сығып алды, ағаа чидер командалар пу чағында пар ба, чох па? Пасхазы, ойынны кӧріп, чир-суғҷыларыбысха тың ізенібізіп, пістіңнер пазох меспектіг хоккейҷе Россия чемпионадынын суперлигазынзар сығып алар ойыннарда аралазарын сағирға кирек тіп ізенчеткен.
Улуғ частығларның піреезі табырах сағыстығларны тызарға харасхан: пӱӱл «Кузбасс-2» команда маңат тимненіс кӧзітче, аның чиит хоккеисттері ӱр ниместе ирткен чоннар аразындағы марығдан чиңіснең айланғаннар. Че пасха кӧрігҷілер оларны истерге дее хынминчатханнар, ікінҷі тоғазығ тузында пістіңнер ізестіг чиңіс тударға киректер тіп ухаанҷылапчатханнар. Чир-суғҷыларыбысха іди тын киртінчеткені уғаа маңат.
25 декабрьда кӧрігҷілер аразында хазыр талазығлар тохтабинчатханнар. Амды саңай пасха сылтағ хоостыра: аалҷылар пістіңнерге турыстығ удурласчалар, саннар даа табырах алызып одырчалар. Ойын пасталғаннаң 6 минута ла ирткенде, «Саяны» команданың капитаны Евгений Ткачук пістіңнерні алнынзар сығарча. Че ӱр ниместің не аразына Игорь Котляренко саннарны тиңнестірібісче. Анаң Кирилл Девятых аалҷыларны алнынзар сығарча. Михаил Селедков саннарны тиңнестірібісті. Стадионзар килгеннернің пірдеезі сым турбинча. Кем сағаан полар ойын піди хазыр парарын.
Кирек піди парза, пістіңнерге хатығ чуххадағ тіп сағынарға даа маңнанғалахта, Андрей Хроменков аалҷыларны алнынзар сығарча. Харын даа, тоғазығның пастағы чардығы тоозылар алнында, Михаил Селедков саннарны тиңнестірерге маңнанча. Анаң олох «Саяны» команданы алнынзар сығарча. Хоккеисттер тынаға парчатханда, 4:3 саннаң марығ ээлері алнында полғаннар.
Ойынның ікінҷі чардығында аалҷылар санынаң Даниил Малинка махтаға сыххан. «Кузбасс-2» команданың хоккеизі ӱс гол кирібіскен. Пістіңнер пір ле гол кир полғаннар. Іди аалҷылар 6:5 саннаң чиңіс тутханнар. Марығ ээлері саринан Михаил Селедковты махтирға чарир - пу ойында ол 3 гол кирібіскен.
Амды пазох ла, тиң саннар чыып алып, меспектіг хоккейҷе Россия чемпионадының пӧзік лигазында ойнапчатхан іскеркі подгруппада «Саяны» паза «Кузбасс-2» пастағы орынны ӱлесчелер. Ағбанда тиңни ойнабысханда, хайзы даа команданың 21 сан. Че пістіңнер 56 гол киргеннер, постарының хаалхазына 28 гол кирдіргеннер. «Кузбасс-2» команда 47 гол кирген, постарының хаалхазына 41 гол кирдірген. Аннаңар «Саяны» алнында тіп саналча.
18 сан чыып алып, Хызылчардағы «Енисей-2» команда 3 орында парча. Теестегі тоғазығны ол позының айғызында «Кузбасс-2» команданаң иртірче. Ағбанзар, тізең, Новосибирск городтаң «Сибсельмаш-2» команда килче. Ол сағамғы туста 13 саннығ тӧртінҷі орында парча. Пістіңнер пу команданаң аның айғызында тоғасханнар. Пастағы ойында «Саяны» 8:2 саннаң утхан, ікінҷі тоғазығда 5:7 саннаң утыр салған. Амды ойыннар хайди ла тоозыл турарлар ни? Ағбандағы «Саяны» стадионда марығ ээлері аалҷыларнаң 28-29 декабрьда тоғазарлар. Ойыннар 13.00 часта пастал турарлар. Кірері тикке. Пістіңнерні чиңіске кӧӧктірерге киліңер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы