САБЛАНЫС ХАҶАНҒА ДАА ПОЛЗЫН!
11.02.2020
Хабарлар
Илбек Чиңіске - 75 чыл. Ағбан пилтірі аймаанда Хумартхылас паза сабланыс чылы пайрамни азылды. Хакасияның пазы Валентин Коновалов аймахтың ветераннарына Илбек Чиңіске 75 чыл толчатханы хоостыра пайрамнығ медальлар читірген
РОССИЯ ПРЕЗИДЕНТІ ВЛАДИМИР ПУТИННІҢ ЧАХИИНАҢ 2020 ЧЫЛ ХУМАРТХЫЛАС ПАЗА САБЛАНЫС ЧЫЛЫ ТІП ЧАРЛАЛҒАН. ІДӦК ПӰӰЛ ПІСТІҢ ХАЗНАБЫС ИЛБЕК ЧИҢІСТІҢ ПАЙРАМНЫҒ 75 ЧЫЛЫН ТАНЫХТИР. РОССИЯНЫҢ ПРАЙ ПУЛУҢНАРЫНЫҢ ЧУРТАҒҶЫЛАРЫ АНЫ 9 МАЙДА ПАЙРАМНИР. ЧЕ ЧЫЛ ПАСТАЛҒАННАҢ РЕГИОННАРДА, ОЛ САНДА ХАКАСИЯДА, ХУМАРТХЫЛАС ПАЗА САБЛАНЫС ЧЫЛЫ АЗЫЛЧА, ПАЙРАМНЫҒ ЧЫЛҒА ЧАРЫДЫЛҒАН МЕРОПРИЯТИЕЛЕР ИРТЕР.
ХАКАСИЯНЫҢ ПАЗЫ ВАЛЕНТИН КОНОВАЛОВ АҒБАН ПИЛТІРІ ЧУРТАҒҶЫЛАРЫНАҢ ХАДА АЙМАХТА ХУМАРТХЫЛАС ПАЗА САБЛАНЫС ЧЫЛЫН ПАЙРАМНИ АСХАН.
- Аарлығ чир-суғҷылар! - чоох тутхан Валентин Коновалов. - Россия президентінің таниинаң, 2020 чылның ӧӧн сағызы - ол хумартхылас паза поғдархас поларға кирек. Анзы, тізең, пісті уламох піріктірче, кӱстіг итче! Амғы тӧл чааҷы ағаларыбыснаң, матыр тархыныбыснаң палғалысты, чідірбин, чӱректе ал чӧрерге кирек. Піснең хости чуртапчатхан ветераннарыбысха, полызып, хайығ салалар. Улуғ алғыс пістің Илбек Ада чаа араласчыларына паза тыл істенӌілеріне айас тигір, амыр чуртас ӱчӱн!
Пістің республикадаң кӧп ирен чааласхан, тӧреен чир-суунзар айланмаан. Амды изен-хазых Илбек Ада чаа ветераннары асхынах халып одырча. Ағбан пилтірі аймаанда пӱӱнгі кӱнде Илбек Ада чааның 6 ветераны, 189 тыл істенҷізі, 1600 чаа палазы паза концлагерьде полған пір кізі чуртапча. Чаа тузында ағбан пилтіріндегілер, пасхазы чіли, посха айабин, фронтха полысханнар, прай чоннаң 1 миллион 600 муң салковай чыып ысханнар. Олар «Прай ниме - фронтха, прай ниме - Чиңіске!» хыйғаа тудынғаннар.
Пӱӱнгі кӱнде пу аймахта чааҷыларға 18 хумартхы тас турча. 2020 чылда Ағбан пилтірі аймаанда Илбек Чиңіске чарыдылған кӧп мероприятие иртері кӧрілче. Ол - хумартхы тастарны нааҷылиры, ветераннарға полызары, чиит тӧлге патриотизм уроктарын иртірері, матырларға чарыдылған акциялар.
Илбек Чиңістің пайрамнығ чылында прай ветераннарға пайрамнығ медальлар читірілче. Пӱӱл ол, Чиңістің 75 чылына чарыдылып, тимнел парған. Хакасияның пазы Валентин Коновалов, Ағбан пилтірі аймаанда Хумартхылас паза сабланыс чылын азып, ветераннарға медальлар читірген. Сыйыхтатханнар санында пір ле фронтовик Михаил Александрович Лещёв полған. Ол 1943 чылда чааға хығыртылған, I Украинскай фронтта чааласхан. Чаа араласчызы Михаил Александрович Германияны чиңен ӱчӱн Жуковтың адынан паза пайрамнығ медальларнаң сыйыхтатхан. Ветеранға чоох пирілгенде, чӱрексініп, теен: «Прайзына пик хазых, узах час чазирға алғапчам! Тӧреен чир-суубысха хыналар паза аны арачылирға хаҷан даа тимде полалар. Часкалығ чуртаңар!»
Хакасия пазының холынаң пайрамнығ медальларны 25 тыл істенҷізі алған. Олар прайзы даа улуғ частығ ууҷалар. 9 Майға теере аймахтағы прай ветераннарға Илбек Чиңістің пайрамнығ медальлары читірілер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде