АҒБАН СУҒДА ХООРАНЫҢ САНЫН ӦСКІРЕРГЕ
14.03.2017
Хабарлар
Ағбан суғ пазында палыхтар саны хызырылчатханы паза оох полчатханы таныхталчатханнаңар Хакасияның пазы Виктор Зимин пу наада чыылығ иртірген. Чыылығда республиканың аң-хустарны паза чир-чайаанны хайраллирынҷа хазна комитедінің кнезі Владимир Лебедев, аал хонии паза ас-тамах министрі Игорь Гердт, алынҷа хайраллалчатхан чирлерҷе дирекция устағҷызы Сергей Бодренко, прокуратура, Росприроднадзор кізілері араласханнар.
Чыылығ араласчыларына ӧнетін тимнелген кӧзідігні кӧзіткеннер, хайда Ағбан суғ пазында тынанарға, палыхтирға хынчатханнарнаң чоохтасханнар, оларның сағыстарын сурғаннар. Чоохтирға кирек, пӧзік тағлар аразында Ағбан суғ уғаа хазыр ахча, че, андағ даа полза, ир чон пеер тынанарға тӧреміл чӧрче. Хакасияның ӱлгӱлері пу орында чир-чайаанны хайраллир пӧгіннең «Хакасия» чир-чайаан паркын тӧстееннер. Аның полызиинаң мында тынанчатхан полған на кізі, суға сығарылған киме санға алылча. Ағбан суғда он азыра чыл палыхтапчатханнарның таниинаң, сынап таа, хоора саны хызырылча, ағаа хоза, ол оох полыбысхан. Хоорадаң пасха мында пил паза хара палых учурапча, хайзылары Хакасияның Хызыл книгазына киріл парғаннар.
- Сидік сурығны пӧгерінҷе піс ікі оңдай кӧрчебіс, - чооғын пастаан Владимир Лебедев. - Иң пастағызы, Ағбан суғ пазында палыхтирға чаратпасха паза «Хакасия» чир-чайаан паркында кізілерге полар оңдайларны хатығлирға. Ікінҷізі, суғзар хоора сиирезін позыдары. Сиирестерні позыдарға кирек чир-чайаанға ӱрег ағылчатхан предприятиелер, че пӱӱнгі кӱнде оларның ӧӧн чардығы ол тоғысты апарбинча. Сурығны табырах пӧгерге итсе, пу кӧстеге республика программазында ахча кӧр саларға чарир.
Республика бюджедінде хоза ахча таап аларға сидік полар, сағынчам, анзын кӧбізі оңарча. Хакасия пазы пастап чир-чайаанға ӱрег ағылчатхан ӱчӱн хазна кирексіністерін толдырбинчатхан предприятиелернең тоғыныбызарға сӧлеен. Оларға пу тоғысты нииктир ӱчӱн, пір предприятие пастыра тоғынарға чарир, хайзы олар пирген ахчаа сиирестерні ӧскірер паза суға позыдар. Олох туста Хакасия пазын суға позыдар сиирестер саны чӧпсіндірбеен:
- Хайди андағ улуғ суға 100 муң сииресті позыдып, палых санын ӧскіріп аларға чарир? Чох, мындағ саннарнаң піс киректі оңдайлап полбаспыс, сиирестер хай-хай кӧп позыдыларға кирек! - теен Виктор Зимин.
Андағ оңдайнаң чыылығ араласчылары алнында пӧгіннер турғызылған: палыхтирынҷа федеральнай агентствоның Кимдегі управлениезінең сиирестер санын хозарынаңар чӧптезерге, предприятиелерні кирексіністерін толдыртарынҷа тоғынарға паза пу сурығҷа алынҷа чыылығ тимнирге. Олох чыылығда Хакасия кӧллерінде паза ӧнетін тимнелген суғларда палых ӧскірҷең оңдайлар ӱзӱрілер. Амғы туста Россияның Хазна Думазында пу сурығҷа ӱзӱріглер парча. Республика кирек оңдайлар алыларына ізенче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде