ТААРЛАҒЛАР СИНІ ӦСЧЕТКЕНІ ТИЛІСТІ КӦЗІТЧЕ
27.01.2017
Хабарлар
Киҷее Хакасия правительствозында тимір чолҷа таарлағлар тартарын тӱзімніг идерінҷе регионның координационнай чӧбінің чыылии ирткен. Улуғ чыылығда Хакасияның пазы Виктор Зимин, Хызылчар тимір чолының пастығы Владимир Рейнгардт, республика правительствозының кізілері паза Хакасияда хара тас аныпчатхан улуғ предприятиелернің устағҷылары араласханнар.
Регионның координационнай чӧбі таарлағлар тартарын тӱзімніг идер кӧстегнең тӧстелген. Хакасияда мындағ чыылығ ӱзінҷі хати иртірілген.
Хакасияның пазы Виктор Зимин, чыылығның тоғызын пастап, республикада таарлағлар сині пілдірте ӧс парғанын таныхтаан. Ол таарлағларның иң кӧп чардығы Хакасиядағы хара тас аныпчатхан предприятиелерге килісче. Хара тас кӧптең кӧп аныл сыхханда, таарлағларны тартарынӌа сидіксініс пол сыххан. Анзын ирткен чылның декабрьы кӧзіткен, хаӌан складтарда 2 миллионӌа тонна хара тас чыыл парған.
Аннаңар регионның координационнай чӧбінің пӱӱнгі ӧӧн пӧгіннерінің пірсі, таарлағлар сині ӧсчеткенін санға алып, орындағы тимір чолны тилідері полған. Ол санда республиканың хара тас аныпчатхан предприятиелерінзер парчатхан тимір чоллар пӱдірері паза наа таарлағ станцияларын тӧстирі.
- Мин Владимир Гарольдович Рейнгардтха улуғ алғызым читірчем, пістің республикаа чахсы хайчатхан ӱчӱн, - таныхтаан Виктор Зимин. - Пу чыылығда піс, кирек чарадығлар алып , пірге тоғынарынңа пір чӧпке килербіс тіп ізенчем.
Хызылчар тимір чолының пастығы Владимир Рейнгардт позының саринаң Хакасия промышленность саринаң ізестіг ӧзіс кӧзітчеткен орын полчатханын таныхтаан. Анзын регионда таарлағлар сині чылдаң чылға ӧсчеткені киречілепче. 2016 чылның салтарларынӌа Хакасияның предприятиелері тимір чол станцияларынаң 18,6 миллион тонна таарлағлар ызыбысханнар. Ол Хызылчар тимір чолының прай таарлағларының пір тӧртінӌі чардығы полча тіп таныхтаан Владимир Рейнгардт.
Чыылығның ікінҷі чардығы хабарӌылар чох, чабых оңдайнаң ирткен. Чыылығ тоозылғанда, Хакасияның пазы Виктор Зимин паза Хызылчар тимір чолының пастығы Владимир Рейнгардт хабарӌыларның нинҷе-де суриина нандыр пиргеннер:
- Чыылығның чабых чардығында нимедеңер чоох парған?
Владимир РЕЙНГАРДТ:
- Чоох парған экономика ӧзізінеңер. Пӱӱн Хакасия чахсы тиліс кӧзітче, иң не пастап хара тас аниры саринаң. Ол кирек транспорт инфраструктуразынаң пик палғалыстығ. Аннаңар тимір чолҷа тартчаң таарлағлар синін хайди ӧскірерін ӱзӱргебіс. Пу сурығ инвестиция ахчазын тартарын, істіндегі сурығларны пӧгерін киректепче.
Чоох парған пірге тоғынҷаң стратегиядаңар, істіндегі сидіксіністердеңер, хайзылары тиліске харығ полчалар. Пір сӧснең, тоғысчы чыылығ полған...
- Ағбанның тимір чол вокзалы нааӌылалар тіп искіріг пар. Анзы сын ма?
Владимир РЕЙНГАРДТ:
- 2019 чылда Хызылчарда Хысхы универсиадазы иртер . Ағбанның чоннар аразындағы аэропорты резервтегі чіли полар тіп кӧрілче. Аймах-пасха хазналардаң спортсменнер, Ағбанзар чидіп, мындартын Хызылчарзар тимір чол вокзалы пастыра чит турарлар тіп кӧрілче. Аннаңар ол чоннар аразындағы стандарттарға килістіре, кӧп арах пассажирлер кирер оңдайлығ поларға кирек.
Виктор ЗИМИН:
- Піске ол ідӧк чахсы хабар . Ол РЖД саринаң улуғ инвестиция, онарлап миллион салковай. Тимір чол вокзалы архитектура саринаң хайдағ поларын пӧгері піске, республикаа, пирілчеткені ӧріністіг. Техническай чардығын піс кӧргебіс, хайдағ кӧрімніг поларын, тізең, ам даа пӧгербіс, тоғынарбыс. Сағынчабыс, ол хайди даа Хакас Республикаа килістіре национальнай кӧрімніг поларға кирек.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 1 | 2 | 3 | 4 |
Кӱн таңмазы
Хакасияда
Россияда
Тилекейде