ПОЛЫЗЫҒ ПИРГЕННЕРГЕ - АЛҒЫС
28.06.2017
Хабарлар
Хакасияда 11 июньда хай пірее аймахтарда кӱн кинетін алызып, улуғ чил, кӧдіріліп, тозын-палғаснаң хада мӱндӱр ағылған. Иң улуғ ӱреге кіргеннер Алтай аймаандағы Кӧк хайа аалдағылар. Чуртағҷылар наа ла ӧт килген чир тамаа чох халғаннар.
Республика чуртағҷылары аллығ чӱректіг полчатханнарын, чахсы кирек идерге хаҷан даа тимделерін пір ле хати кӧзітпееннер. Хомзынызыбысха, сағыбаан саайлар пол ла парчалар: ӧрттер сығысчалар, суғлар тасчалар, мӱндӱр чаап парыбысча. Пірдең, мӱндӱр сині полған на сай килкімнең килкім полып одырчатханға тӧӧй. Мӱндӱр халғанҷызын 22 июньда Пілӧ кӧлде полған, аның улии таңах нымырхазынаң тиң полтыр!
Че иң не айастығ чуртағҷыларны, хайзылары, ӱӱҷікте хайынып, чир тамаан ӧскіреріне прай чӱректерін салғаннар, пос тустарын хоратханнар, тоғынғаннар. Мында, тізең, 40 минута даа иртпеен, ол одыртхан нимедең пір ниме дее халбаан. Харын, чир-суубыста аллығ чӱректіг чуртағҷылар пар. Оларның полызиинаң ӱрегнің ӧӧн чардығы чабылған. Кӧк хайа аал чӧбі искіриинең, андағ полызығ пиргеннер санында хайди даа адирға кирек Асхыс аймааның чуртағҷыларын - Наталья Федотованаң Николай Вагнерні. Олар чуртағҷыларға пос кӧңнінең перец, баклажан, помидор паза пасха чир тамааның рассадазын ағыл пиргеннер. Аал чӧбінің устағ-пастаа чуртағҷыларның адынаң оларны чахсы кирек иткен ӱчӱн прай чӱректерінең алғыстапчалар.
Чоохтирға кирек, аннаң пасха Хакасия пазы Виктор Зимин чуртағҷыларның ис-пайына, ӱӱҷігіне мӱндӱр ағылған ӱрегні чох идерге хабазарға чахаан. Ол Алтай аймаандағылардаң пасха Шира аймаандағыларға теелче, хайда ідӧк пу наада чаған мӱндӱр, пӱдіріглерні паза машина кӧзенектерін оодып, улуғ ӱрег ағылған. Ідӧк Кӧк хайадағыларға чир тамаа рассадазынаң республика ипподромында садығнаң айғасчатханнар хабасханнар. Хакасияның аал хонии паза ас-тамах министерствозы искіриинең, аал чӧбіне ідӧк аймах чир тамаа паза чахайахтар рассадазын читіргеннер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 1 | 2 | 3 | 4 |
Кӱн таңмазы
Хакасияда
Россияда
Тилекейде