АЙМАХ ТӀЛНЕҢ АЛҒАСТАР, КИБЕЛӀСТЕР ПАЗА ЫРЛАР
11.01.2019
Хабарлар
Хакасияда чурттығ аймах нациялар аразындағы пірге Наа чыл иирі 27 декабрьда С.П.Кадышевтің адынаң культура кінінде ирткен. Аны Хакасияның национальнай паза территориальнай политика, культура министерстволары паза С.П.Кадышевтiң адынаң культура кінінің тоғынӌылары ӱлӱкӱннирге полызығ-чӧлег полғаннар.
Теелбектенӌең залда национальнай ас-тамахха пай столлар ибіре хакас, шор, немец, узбек, поляк, еврей, азербайджан, чуваш, хырғыс паза пасха чоннарның делегациялары одырыбыстырлар. Иргі чылны чылығ тоғазығ оңдайынаң паза алғыстастарнан ӱдезібізерге кирек нооза.
«Алтыр» хакас мода театрының кеен абахайлары, залны чазапчатхан сыбыӌахты ибіріп, пӧлбек салғаннар. «Иргізін ӱдезіп, Наа чылны чарых кӧңніліг удурлиры - анзы даа хайхас поладыр!» - мындағ чалахай сӧстернең иирні пастааннар Хакасияның чон артизі Герман Танбаев паза Аселя Давлетова. Сценазар республика министерстволарының устағӌылары ирткеннер. Хакасияның национальнай паза территориальнай политика министрінің тоғызын толдырчатхан Михаил Побызаков аймах чоннарның халых пірігістерін ирткен чылда хада-пірге тоғыс апарған ӱчӱн чылығ алғыстаан:
- Пӱӱн піс, ирткен чылның салтарларын идіп, аны ӱдесчебіс. Ол уғаа хынығ паза тӱзімніг полған. 2018 чылда піс 70 артиинаң аймах-пасха мероприятие иртірібіскебіс. Оларның санында культура, спорт паза наука мероприятиелері. Мында халых пірігістерінің иң ӧткіннері чыылысты. Сірернің полызииңар чох мындағ даа иирлер иртірілбесчік. Мыннаң мындар ідӧк ле ынағ чуртап, удур-тӧдір полызызып, республиканың чуртазын паза культуразын пайыдарбыс тіп ізенчем. Чарых кӧңніліг чӧріңер, сағынған сағыстарың толзын!
Ідӧк чоох тутхан Хакасияның культура министріне турғызылған Леонид Ерёмин. Таныхтирға кирек, наа министр Леонид Валентинович, позының тоғызын толдырар пӧгінге кіріп, мындағ культура иирінде пастағызын на араласхан полар. Чыылған чон аны ізіг айа сабызынаң удурлаан. Л.В.Ерёмин хада-пірге иткен киректің салтары уламох пӧзік поладыр тіп таныхтаан.
Хакасияның Улуғлар чӧбінің кнезі, Хакасияның аал хонии политиказынӌа, ас-тамахча паза чир сурығларынӌа комитет кнезі Пётр Воронин нацияларның пірігістеріне сыйыхтар читірген. Сыйыхтарны алғаннар: «Алтынай» хакас ипчілернiң лигазы, «Чосон» кореецтернің диаспоразы, «Полония» - поляктарның, «Согдиана» - таджик-узбектернің, «Пелеш» - чуваштарның паза даа пасхазы.
Таныхтирға кирек, Лев Нербышев устапчатхан Хакасияда чилегеліг чоннарның «Аран-Чула» искірігліг кіні, «Асхыр» чииттер пiрігізінiң араласчылары пу иирде араласханнар, сыйыхтар алғаннар паза постары пасхазына алғастарын читіргеннер. Шорларның саны республикада пір муң артиинаң, че оларның алты пірігіс тоғынчаттыр.
Наа чыл алнындағы иир нацияларны, чыып, піріктіредір. Оларның кибірлері, культуралары, тіллері паза
киртіністері пасхалалчатханы харығ полбинча. Чоннар удур-тӧдір чылығ алғыстазып алчалар.
- Піс «нанҷыларбыс» ла тіп полбаспын, «туғаннарбыс» тиирҷiкпiн, - сағыстарын читірген Хакасиядағы еврейлернің национальнай культура автономиязының кнезі Григорий Пехотник. - Мин пеер чаа службазы хоостыра 1969 чылда килгем. Ол чыл Ағбанда суғ тасхан. Пістің чааҷылар частьы чонны суғдаң арачылаан. Андадох мында ӱрге халарбын тіп сағын салғам. Іди Хакасияда 50 чыл чуртап салдым. Аннаңар Хакас чиріне паза чонына пісті хойнына алғаны ӱчӱн улуғ алғызым читірчем. Килчеткен чылда, тізең прай хынған сағыстар толар, сынап чир ӱстӱнде ынағлас, чағбан чӱректіглер кӧп полза!
Автор :
Елена САГАТАЕВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы