ЧОННЫҢ САҒЫС-КӦРІЗІН ПІЛЕРІ - ӦӦН ПӦГІН
12.03.2019
Хабарлар
Тоғыс чорығы. Хакасия пазы Валентин Коновалов Сорығ городта пол килген.
Пастап ол городтағы спорт школазынзар кірген. Чоохтирға кирек, Сорығда ол пір ле комплекс, хайда чонға, спортнаң айғазып, хазиин пиктирге чарир.
Че пӱӱнгі кӱнде ол учреждение изелер пазында. Комплекстің хырын паза стенелерін пӱкӱлеезінең алыстырарға кирек. Регион пазы пу сурығны министрлерге пӧгібізерге чахығ пирген. Ол ідӧк город чуртағҷылары кирексіпчеткен объекттің тилиріне ахча табар оңдайлар тілирдеңер искірген.
Валентин Коновалов анаң Со-рығдағы тағ ис-пайының тузазын алғытчаң комбинатта (ГОК-та) полған. Правительство кнезін андағы карьернең, пайытчаң фабриканаң, тыхтағ паза механика цеғынаң таныстырғаннар. Анаң республика пазы Сорығдағы пу предприятиенің тилізіне чарыдылған алғым чыылығ иртірген.
Хайди таныхтаан Валентин Олегович, городтың аннаң андархы тилізі кӧнізінең пу предприятиенең палғалыстығ. Сорығда чурттығ чонға тураларынзар чылығ аннаңох пирілче. «Аннаңар комбинатты хайраллап халар ӱчӱн піске, орындағы паза федеральнай ӱлгее, прай кӱзібіс саларға киректелче», - теен Хакасия пазы Валентин Коновалов.
Ол кӱн ол ідӧк городтың устағ-пастаанда чыылығ иртірген. Анда Сорығның социальнай паза экономика тилізінеңер чоох парған. Ӧӧн хайығ республика паза муниципальнай бюджеттерзер пілдірте налог кирчеткен промышленность предприятиелеріне салылған.
Иирде, тізең, Хакасия пазы город чуртағҷыларынаң тоғасхан. Чоохтирға кирек, Сорығдағы азых чоохтазығ оңдайлығ тоғазығ тӧртінҷі хати ирткен. Валентин Коновалов, Хакасия пазы полыбызып, пастап Харатас городтағыларнаң чоох алысхан, анаң Ағбан пилтіріндегілернең паза Боград аймаандағыларнаң. Хакасияның городтарынзар паза аймах кіннерінзер ол іди орынҷыларынаң паза министрлернең хада чӧрче.
- Мындағ тоғазығларда полған на кізее республика устағҷыларына сағыссыратчатхан сурығларын пирерге оңдай пар. Піс ідӧк критиканаң тоғыр полбинчабыс. Чонның сағыс-кӧрізін пілері - пістің ӧӧн пӧгінібіс нооза, - теен Валентин Коновалов.
Кирілген кибір хоостыра пурнада сӧс пирілген Сорығ город устағҷызына. Владимир Найденов чыылысхан чонға ирткен чылда толдырылған алғым тоғыстардаңар искірген. Ӧӧнінде ол город істі-тасты хайди иптел парғаннаңар чоох апарған. Хайди муниципальнай пӱдіс устағҷызы чарытхан, 2018 чылда «Городта истіг оңдайлар тӧстирі» программа хоостыра илееде тура ибіркізі нааҷылалған, ол санда олғаннарға ойнаҷаң орыннар тимнелгеннер. Аннаң пасха, город чуртағҷылары сурынызынаң хоза автобустар позыдылғаннар.
- Амғы туста сӧп-сап сурии тиксі хазна синінде пӧгілче. Че мин Сорығ город чуртағҷыларынзар алынҷа айланарға сағынчам. Сірер иблеріңні хаҷан даа арығ тутчазар нооза. Аалҷылар килеріне иб істін уламох чахсы арығлап салчазар. Городыбыс, тізең, андағох чуртыбыс нооза. Аннаңар, аарлығ чоным, аны піс ідӧк арығда тударға кирекпіс. Похсахты анда-мында тастабин, кирек орынзар тӧк турарға, - теен Сорығ устағҷызы.
Мэрнің чооғы соонда чыылған чон, теестезіп, Хакасия правительствозына сағыссыратчатхан сурығларын пирген.
Сорығдағылар имнег киреенең палғалыстығ иң кӧп сурығ пиргеннер. Пастағызы - имҷілер чидіспинчеткені!
- Пӱӱнгі кӱнде Сорығ городта 16 ла имҷі-специалист, - чоох алған Хакасияның хазых хайраллаҷаң министрі Владимир Костюш. - Ирткен чылда «Аалдағы имҷі» программа хоостыра городсар ӱс имҷі килген, пӱӱл, тізең, пір ле имҷі килері кӧрілче. Паза пӱӱнгі кӱнде ӧнетін чӧптезігҷе алты кізі имҷі специальнозына ӱгренче. Пасха моногородтарға чіли, Сорыға чииттерні кӧстегліг программаҷа ӱгредерге чарир. Че пу городтаң хазых хайраллаҷаң министерствозар андағ сурыныс пічии пір дее кірбинче. Пасха оңдайнаң піс тоғынҷаң кізілерні ыс полбаспыс. Город позы, чуртаҷаң орыннар тӧстеп, ол сурығны пӧгерге кирек.
Сорығда санавиация тоғызы тохтадыларынаң, тізең, Владимир Костюш чараспаан. Хайди таныхтаан министр, вертолет хайди учух чӧрген оларзар, ідӧк ле ағырыбысхан чонны Ағбанзар апар турар.
Паза пір сурығны табырах полызығ пирҷең машиналар водительлері пиргеннер. Олар 14-15 муң салковайға тиңнелчеткен чал ахчазына чӧпсінминчелер! Хакасия пазы Валентин Коновалов пу сурығны, прай тӱптестіріп, министр Владимир Костюшха пӧк саларға чахығ пирген.
Сорығдағыларны ідӧк изелчеткен туралардаң кӧзірер программа тоғызы сағыссыратча. Хайди чарыт пирген пӱдіріг паза чурт-коммунальнай хоных министрі Илья Кононенко, пӱӱнгі кӱнде Сорығда туралар пӱдірер чирлер синелчелер. Анаң, прай кирексіністер толдырыл парза, туралар тимге сығарылза, 90 азыра кізее наа чурт пирілері кӧрілче. Че ол кирек 2022 чылдаң на пасталар.
Культура туразынзар чыылысхан чон аразында улуғ частығлар кӧп полған. Олар правительство кнезіне Илбек Ада чаа палаларына ахчалығ полызығ ноға пирілбинче тіп сурығ пиргеннер. Хайди чарыт пирген Валентин Коновалов, андағ чарадығ Россияның хайзы-пірсі ле регионнарында алылған. «Че пу чыл Илбек Чиңіс кӱніне Хакасия правительствозы чаа палаларына пір хати пирілчеткен ахчалығ хабазығ идер. Ол пір муң салковайға тиңнелер», - теен ол.
Пуох тоғазығда, сорығдағыларның айланыстары хоостыра, тыхтағ тоғыстары иділген тиксі ӱгредігліг школаны хатап сыныхтабызарға чарадығ алылған. «Орай даа полза, мин чонны сағыссыратчатхан ӱгредіг учреждениелерін сыныхтабызарбын», - молҷағ пирген Хакасияның ӱгредіг паза наука министрі Лариса Гимазутина. Пу кӱнде ідӧк музыка школазын нааҷылирға оңдайлар табарға хабазардаңар, Чорба станцияда имнег пунктын тӧстирдеңер чӧптескеннер.
Мындағ тоғазығларға город паза аймах чуртағҷылары республика ӱлгӱзінең хайдағ-да полызығ алып алар ізеніснең килчелер. Табығларға олар олох сағыснаң парчалар нооза. Анзын пазох киречілеп пирділер сорығдағылар. Олар Культура туразының актовай залына толдыра чыылысханнар. Че ол зал ікі-ӱс тее хати улуғ полған полза, чон анҷох кӧп чыылызарҷых, неке. Аннаңар правительство чонның мындағ киртіністіг ізенізін чідірбезін не тіп сағынылча.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы