РОССИЯ ПРЕЗИДЕНТӀНІҢ АЛҒЫСТАЗЫ
13.03.2019
Хабарлар
Универсиадада тӧрт алтын медаль утхан Алиса ЖАМБАЛОВАНЫҢ (ортызында) ӧрінізі
Универсиада-2019. Киҷее Хызылчарда студенттернің хысхы Универсиадазы тоозыл парды. Амды аның салтарларынаң хысхаҷахти таныстырчабыс.
2 мартта тилекейдегі хысхы ХХІХ Универсиаданың хайхастығ сіліг оңдайда азылғаны, анда Россия президенті Владимир Путиннің чоохтанғаны, чииттернің прайзын спорт пайрамынаң чылығ алғыстааны чир ӱстӱндегі парчан хазналарға искірілген полар. Анаң хазыр марығлар пасталыбысханнар.
Че пастағы кӱннең сығара Россияның піріктірілген командазы чахсы тимненізін, чиңіс тударға кӧстегліг полчатханын кӧзіткен. Аннаңар даа марығ ээлері, пасха командаларның хыринда, алтын-кӱмӱс-хола медальлар санынаң илееде алнында пар сыхханнар. Іди тағдаң саналығ чылҷан спортсмен Иван Кузнецов слалом-гигант мариинда прайзын ас парыбысхан. Аны Россия президенті чылығ алғыстаан.
«Хызылчарда иртчеткен Универсиададағы алтын медальнаң алғыстапчам. Чиңіс чолында пик сындырлығ, пӧзік тимненістіг ус полчатханнарыңны чахсы кӧзіткезер», - чоохталча алғыстас телеграммазында.
Россия президенті Иван Кузнецовты пу чиңіс соонаң улуғ марығларда даа ӧріндір турарына ізеніснең алғыстаан. Анзы тиктең нимес. Спорттың пу кӧрімінде пістіңнер удаа чиңіс тутпинчалар нооза. Амды Иван Кузнецовтың чидии пасхазына маңат кӧзідім полар - чииттернің тилекей мариинда алтын медаль утханда, улуғлар даа аразында ноға чиңіс тударға хараспаңаң.
Ідӧк тағдаң саналығ чылар марығда, че олаңай слаломда аралазып, Семён Ефимов алтын медальға турысхан. Мының алнында спорттың пу кӧрімінде ӧӧнінде Австрияның, Швецияның, Норвегиянын паза даа пасха хазналарның спортсменнері чиңістер тутчаң ползалар, амды пістіңнер оларның алнына сығып пастабыстылар. Анзына хайди ӧрінмес. Хайди таныхтапчалар спортсменнер, мындағ улуғ марығларда аралазып, сағыбаан-тӱзебеен дее кӧзідімнерге читчелер. Анзы хайзына даа таңдағы кӱнге ізеніс пирче тиирге чарир.
Студенттер Универсиадазы тузында прайзынаң кӧп алтын медаль утып алған Алиса Жамбалова. Бурят чонның хызы саналығ чӱгӱрерінде сыбыра маңат тимненіс кӧзіткен. Іди Хызылчарда ирткен чииттернің тилекей мариинда Алиса тӧрт алтын медаль утып алған. Россияның спортсменнері санынаң ӱзер алтын медаль утхан студенттер парох. Ол даа сылтағнаң полбас па Россияның піріктірілген командазы медальлар хоостыра прайзының алнында. Пістіңнернің прай 111 медаль саналған: 40 алтын, 39 кӱмӱс, 32 хола медальлар.
Тиңнестіріге алза, ікінҷі орындағы Ӱстӱнзархы Кореяның командазы 14 медаль утып алған: 6 алтын, 4 кӱмӱс, 4 хола. Ӱзінҷі орында турған Японияның 13 медаль полған: 5 алтын, 4 кӱмӱс, 4 хола. Пу кӧзідімнер марығ хайди ирткенін чахсы киречілепчелер.
Хысхы спорт кӧрімнері аразында шайбалығ паза меспектіг хоккей марығлары сыбыра прайзының хайиинда поладыр. Андағох оңдайнаң ирткен Хызылчардағы Универсиаданың тоғазығлары. Хайди таныхтапчалар оргкомитеттің кізілері, хоккей марығлары тузында кӧрігҷілер стадионға сыыспинчатханнар, билеттер азынадох прай садыл парғаннар. Пістіңнер кӧрігҷілернің ізенізіне турыстығ ойнааннар, алтын медальлар утханнар.
Тилекейдегі хысхы Универсиада пістің хазнада пастағызын на иртірілгені таныхталған. Анда араласхан пістің чир-суғҷыбыс, саналығ чӱгӱрерінҷе Россияның спорт узы Диана Головань. Ол 15 километрге классическай стильнең чӱгӱрген. 52 кізі аразында алтынҷы орын алғаны маңат кӧзідім тіп санапча аның тренері Александр Фалеев. Пірдең, аның ӱгренҷізі пастағы орын алған чиңісчідең 24 секундаа ла соона халған.
Универсиада-2019 тоозыл парды. Ол ідӧк уғаа сіліг оңдайда чабылған. Хызылчарзар килген спортсменнер, аалҷылар хомзынмады поларлар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы
Хакасияда
Россияда
Тилекейде