ЧАА ПАЛАЛАРЫНАҢАР ЗАКОН ПАЗОХ ӰЗӰРІГДЕ
15.03.2019
Хабарлар
Оӧркі Чӧп. Хакасияның Оӧркі Чӧп президиумы теестегі чыылиинда «чаа палаларына» социальнай хабазығ пирердеңер закон проектін кӧрібіскен.
Хакасияның Оӧркі Чӧп кнезі Владимир Штыгашев 13 мартта президиум чыылиин иртірген. Чыылығның ӧӧн сурығларының пірсі «Хакас Республикада «чаа палалары» категорияа кірчеткен чуртағҷыларға социальнай хабазығ пирҷең оңдайлардаңар» закон проекті полған. Президиумдағыларны закон проектінең мандат паза депутат этиказы сурығларынҷа комиссияның кнезі, «Коммунисты России» фракцияның устағҷызы Денис Бразаускас (закон проектінің авторы) таныстырған.
- Закон проектінің кӧстее «чаа палаларына» социальнай хабазығ пирҷең тӧстеглер салары полча, - таныхтаан Денис Бразаускас. - Олар чаа тузында паза чаа соонда даа, аар тусты иртіп, ирееленгеннер. Улуғлан парғаны, тізең, чуртас-экономикадағы хазыр алызығларға, рынок реформаларына, киліс парған.
Авторның таниинаң, амғы туста Россияның 11 регионында «чаа палаларына» хабазығ пирҷең закон алылып тоғынча. Закон проектінҷе «чаа палалары» санына 1923 чылның 23 июньынаң 1945 чылның 2 сентябрьына теере тӧреен, республика чуртағҷылары полчатхан кізілер кирілер. Хайди пазылча закон проектінде, Хакасияда андағлар саны 27 муңча кізі. Социальнай хабазығны алза, «чаа палаларына» ай сай 500 салковай паза Чиңіс кӱніне 1000 салковай тӧлеп турары кӧрілче. Республика бюджедінің хорадығлары 189 миллионча салковайға тиңнелер тіп пазылча пічікте.
- Пу хайдағ-да наа сурығ нимес, - таныхтаан Владимир Штыгашев. - Саннары хоостыра ла ноға-да пасхалалча: алындағы пічіктерде 1928 чылда тӧрееннердең пастирға кӧзіділген полған, мында -1923 чылдаң. Піс ирткен чылның майында 230 миллионча салковай киректелер тіп санаабыс, сірернің 189 миллион салковай турча.
Оӧркі Чӧп кнезі, ідӧк республиканың хазна алымы улуғдаңар, Хакасия правительствозы паза Россияның финанстар министерствозы аразында чӧптезіг иділгенін ундубасха чӧп пирген.
- Піс, тізең, ол чӧптезігні закон кӧрімінең алыбысхабыс, - сизіндірген ол. - Аны хоостыра піске, хазна алымын чаппаанда, республика бюджедінең хоза хорадығлар идерге алай хайдағ-да хоза льготалар пирерге чарадылбинча.
Президиумдағыларны закон алыл парары ікінҷілендірген, улам пӱӱнгі сидік оңдайларда. Че, іди дее полза, Оӧркі Чӧп президиумы закон проекті кирілген тіп санирға паза пічікті республика правительствозының ӱзӱриине ызарға чарадығ алған. Закон проекті республика бюджедінең хоза хорадығлар кирексіпчеткен сылтаанда правительство ағаа паалағ пирерге кирек.
Хоза чоохтирға кирек, Хакасия пазы Валентин Коновалов ӱр ниместе «чаа палаларына» социальнай хабазығ пирілер тіп чарлаан. Анда чоох парча пу категорияа кірчеткен чуртағҷыларға Чиңіс кӱніне пірер муң салковай пирердеңер. Ол молҷағ толдырылар, че пӱкӱлее законға хабазығ пирілері ікінҷілестіг. Анзына Россия минфинінең иділген чӧптезіг харығ полча.
Паза Оӧркі Чӧп президиумы пу чыылығда Хакасияҷа МВД министрі Андрей Кульковтың республика полициязының 2018 чылдағы тоғыс салтарларынаңар хысхаҷахти пирілген сан пирізінең танызып алған. Толдыразынаң сан пиріс чағынғы сессияда иділер.
Килер сессияда ідӧк Хакасияның Оӧркі Чӧбі Россияның Хазна Думазынзар закон сығарҷаң пастағнаң сығары ӱзӱрілер тіп кӧрілче. Культураҷа, ӱгредігҷе паза наукаҷа комитет кнезі Оксана Разварина «Россия Федерациязындағы пала праволарынҷа уполномоченнайлардаңар» федеральнай законзар алызығлар кирердеңер» закон проектін тимнирге паза аны Оӧркі Чӧп адынаң Хазна Думазынзар ызарға чӧпнең сыххан. Чоох парча федеральнай закондағы читпестерні тӱзедердеңер. Хайди чарытхан Разварина, амғы туста федеральнай законҷа субъекттегі пала праволарынҷа уполномоченнайның полномочиелерін азынада тохтадарына Россияның пала праволарынҷа уполномоченнайның чарадии киректелче. Федеральнай законзар алызығлар киріп, полномочиелерні азынада тохтадарына, кізі праволарынҷа уполномоченнайлардаңар закондағы чіли, чарадығ кирексібинчеткен сылтағларны кӧзіт саларға чӧп пирілген: уполномоченнай ӱреен полза алай чарғы аны тоғын полбастаңар санирдаңар чарадығ алған полза.
Халғанҷы сурығнаң Оӧркі Чӧп президиумы сессия иртірчең кӱнні чарадыға алыбысхан. Депутаттар 27 мартта чыылызарлар тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы