ОЙНАҶАХТАР, ХООСТАР АЙМАҒЫ ХАРАХ ОЙНАТЧА
15.03.2019
Хабарлар
Кӧзідіглер. С.П.Кадышевтің адынаң культура кінінде ӱс тее кӧзідіг азылды. Анда ипчілернің декоративно-прикладной искусство тоғыстарын, Александр Кобыльцовтың Крымға чарыдылған хоостарын паза Олег Ихочуниннің сомнарын кӧрерге чарир.
Пір саңай ӱс кӧзідіг азары С.П.Кадышевтің адынаң культура кінінде кибірге кір парғанын таныхтирға кирек. 5 апрельге теере анда «Ипчілер холынаң» ойнаҷахтар паза сувенирлер кӧзідіг-садии, «Крымнаң піріккені» хоостар, «Чир-суубыс сабланызы ӱчӱн» Афганда служба ирткен иреннер портреттерінің кӧзідіглері тоғынчалар.
Культура кінінің директоры Анна Шаламова, кӧзідіглерні азып, чоох тутхан:
- Марттың пастағы кӱннерінде узанчатхан ипчілер тоғыстарының кӧзідіг-садиин иртірері кибірге кір парған. Амғы кӧзідіге 300 азыра тоғыс сығарылған. Олар аймах техниканаң тимнелгеннер, садылчалар. Анда сыйыхтар алып аларға чарир.
Ідӧк танығлығ киректерге чарыдылған кӧзідіглер - ол Крым Республика Россияа хозылғаннаң пис чыл толчатханы паза афганецтернің портреттері.
Россия хоосчыларының кізізі Александр Кобыльцов Крымзар этюдтарны чайирға ӧнетін хығыртығ хоостыра чӧртір. Крым Хакасиядаң пасхалалчаттыр. «Анда пасха ӧңнер, кӱн паза чир», - таныхтаан хоосчы. Мындағ чорых хоосчы кізее туза полған. Талай хазы чарых ӧңнернең хоостал партыр. Олар «Ах город», «Кӱмӱс город», «Талай хазында», «Чылтырапчатхан хайалар» паза даа пасха адалчалар.
Олег Ихочунин пос хынғанни сомға суурчатхан ус полча. Аның кӧзідии СССР-ның чааҷыларын Афганистаннаң сығарғаннаң пеер 30 чыл ирткеніне чарыдылча. Кӧзідіге чаалазығлар ветераннарынын 30 портреді сығарылтыр. Сомнарда омалалған иренннер прайзы Хакасияда чуртапчалар, Афганда служба ирткеннер. Кӧзідіг азылчатханында сомҷы Олег Ихочунин паза ветераннар араласханнар. Оларның аразында Игорь Чертыков полған. Игорь Николаевич 1986 -1987 чылларда Афганистандағы Гардез городта, 56-ӌы штурм бригадазында отделение командирі полып, служба ирткен. Аның сомы ідӧк кӧзідіге сығарылған. Таныхтирға кирек, прай чааҷыларның кӧксін орден-медальлар чазапчалар. Кӧзідігні тимнирге «Боевое братство» тиксі Россиядағы пірігістің Хакасиядағы пӧлии полысхан.
Сомнарны кӧрген соонаң мағаа оларда омалалған иреннернің харах кӧрізі тӧӧй пілдірген. Пу сағысты Игорь Чертыков піди чарыт пирген:
- Чааӌылар хырығларны хадарғаннар, пирілген чахығны толдырғаннар. Оларның харахтарында майығысты сизінерге чарир. Чааласхан соонаң амыр чуртасха кӧнігерге кирек полған, аннаң андар олаңай кізілер чіли чуртирға. Прайзы ла азахха тур полбаан. Кемнің-де чуртазы ирте ӱзілген, пасхазы сайбағҷы чолына кірібіскен. Че кӧбізі чайаачылар чолына, халых чуртассар, ӱгредіг киреене, хазна службазына килген. Мындағы портреттер пос постарын чарытчалар тиирҷікпін.
И.Н.Чертыков пӱӱнгі кӱнде Хакасияның бокс федерациязының толдырығ директоры, пӧзік категориялығ тренер полча.
Ипчілер холынаң тимнелген тоғыстар харах ойнатчалар. Нинҷідең чазанҷыхтар, палғаан ойнаҷахтар паза подушкалар, истең ӧң-пазы чорғаннар, сӱӱмектер паза пасха нимелер кӧп араласча пу кӧзідігде.
Автор :
Елена САГАТАЕВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы
Хакасияда
Россияда
Тилекейде