ГРАНТ СИНІ ІКІ ХАТИ ӦС ПАРАР
08.11.2016
Хабарлар
Хакасияның пазы Виктор Зимин, республикадағы сӱт сығарызына чарыдылған чыылығ иртірген. Анда республиканың правительствозында аал хонии сурығларынаң айғасчатхан Иван Вагнер, аал хонии паза ас-тамах министpi Игорь Гэрдт, Хакасияның экономика министрі Татьяна Пауль паза «Целинное» ООО-ның устағҷызы Владимир Санников полғаннар.
Амғы туста Хакасияда сӱт сығарызына кӧп хайығ салылча. Халғанӌы чылларда республикада сӱттіг малларның саны ӧсче. Регионда сӱт сығарызын хызырбас паза ас-тамах читкіҷе полар ӱчӱн, хада-пірге тоғынарға, сӧбіре паза наа ла тоғынып пастапчатхан фермерлерге хабазарға, улуғ инвестициялығ проекттерні чуртасха кирерге кирек тіп таныхтаан Виктор Зимин.
- Амғы туста пістің республикада ікі хоныхта улуғ инвестициялығ проекттер чуртасха кирілчелер: «Целинное» ООО-да ноябрь ортызында 1100 пас малға комплекс тоғынып пастир, пір чыл пазынаң «Июс-Агро» ООО-да 400 пас малға комплекс тимде полар, - теен Иван Вагнер. - Піс федеральнай аал хонии министерствозынаң хорадығлар ӱчӱн компенсация алып аларына ізенчебіс. Мал комплекстері піске тың кирек. Пӱӱн рынокта сӱтке кирексініс ӧсче.
- Килер чылда сӱт сығарызынаң айғасчатхан наа ла тоғынып пастапчатхан паза сӧбіре фермерлерге гранттар сині 1,5 -3 миллион салковайдаң 10 - 30 миллион салковайға теере ӧскірібізербіс. Ол аалдағы чонға чахсы хабазығ полча. Федеральнай бюджеттең республиказар кӧп арах ахча алып аларға кӱстенчебіс, - хосхан Игорь Гердт.
Хакасияның пазы пу сағыснаң чарасхан паза Россияның аал хонии министрінең тоғазығ тимнирінҷе чахығ пирген.
- Прай оңдайларнаң тузаланары - ол ӧӧні. Аалдағылар маллар санын ӧскірер ӱчӱн, оларға хабазарға, мал азиин тимнирін сыныхтағда тударға кирек. Хакасияның экономика министерствозына аграрийлернең ӧткін тоғынарға сурынчам. Оларның кӧбізі амғы хабазығлардаңар пілбинче, таныхтаан Виктор Зимин.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
27 | 28 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде