МАРЫҒ ТУЗЫНДА СУҒ «ХАЙНААН»
03.03.2017
Хабарлар
Ағбанда суғда чӱзер спортча Сибирьдегі федеральнай округтың чемпионады паза первенствозы иртче. Анда СФО-дағы 10 регионның спортсменнері араласча. «Ағбан» спорткомплексте прай 447 спортсмен чыылысхан. Оларның санындалар чоннар аразындағы класстығ спорт устары паза саблығ спорт устары.
1 мартта марығ пайрамни азылған. Араласчылар бассейн хыринда турыбысханнар. Марығ азылғаннаң оларны Хакасия пазының орынҷызы Владимир Крафт, тиксі Россияның суғда чӱзер спорт федерациязының президиум кізізі, СССР-ның спорт узы Сергей Кашников, Хакасияның спорт министрінің тоғызын толдырчатхан Виктор Струков паза Ағбан город пазы Николай Булакин алғыстааннар.
Пастағы сӧс пирілген Сергей Кашниковха.
- Аарлығ спортсменнер, оргкомитет, чарғыҷылар, - чооғын пастаан Сергей Иванович. - Мағаа пу городсар килерге, суғда чӱзер спортча Сибирьдегі федеральнай округтың чемпионадын паза первенствозын азарында аралазарға уғаа ӧріністіг. Регион паза город устағҷыларына чылығ удурлаан ӱчӱн алғызым читірчем. Мында чахсы спорткомплекс пӱдіріл парған. Спортсменнерге паза тренерлерге марығ хазыр иртірерін алғапчам.
Анаң Владимир Крафт чоох тутхан:
- Хакасияның пазы Виктор Зиминнің чахии хоостыра марығ араласчыларын паза оларның ӱчӱн «ағырчатханнарны» алғыстапчам. Марығ араласчылары час хоостыра ам даа чииттер, че кӧбізінің медальлар пар. Сірернің піреезі регион ӱчӱн тиксі Россия марығларында аралазар, чоннар аразындағы марығларда Россия ӱчӱн турызар. Сірердең улуғ чидіглер сағыпчалар. Ізенчем, чуртазыңарда орта орын табарзар, турыстығ кізілер, паба-іҷеңернің паза тренерлеріңнің поғдархазы поларзар. Россияның суғда чӱзер спорт федерациязына марығлар Хакасияда иртчеткен ӱчӱн алғызым читірчем. Пазағы чылларда пу марығлар Хакасияда иртеріне ізенчем. Марығларны тимнеп иртірчеткен ӱчӱн, республиканың спорт министерствозына паза Ағбан город администрациязына алғызым читірчем.
Ідӧк сӧс пирілген Хакасияның спорт министрінің тоғызын толдырчатхан Виктор Струковха паза Ағбан город пазы Николай Булакинге.
Алғыстас сӧстері соонаң пасха ӧріністіг кирек таныхталған. Улуғ аалҷылар чир-суғҷыбыс Антон Брагинге Россияның спорт узы таниин паза удостоверениезін читіргеннер. Новосибирск облазынаң килген Дмитрий Лапшин чоннар аразындағы класстығ спорт узы атха турысхан.
Анаң марығлар пасталған. Пастағызын иреннер 100 метр баттерфляй оңдайынаң чӱскеннер. Мында 45 спортсмен араласхан. Иң табырах Кемеров облазының спортсмені Владимир Кудряшов полған. Ол финишке 54, 59 секундаа читкен. Ікінҷі орында Алтай крайынаң килген Дмитрий Кулешов пол парған (54,98 сек). Ӱзінҷізінде Александр Казанцев (Алтай крайы) полыбысхан. Ол 100 метрні 56,31 секундаа чӱс парыбысхан. Хакасияның спортсмені Никита Савчиц - 12-ҷі орында.
Ипчілер мариинда баттерфляй оңдайынаң 200 метр чӱзерінде 12 кізі араласхан. Оларның санында Наталья Ловцова (Новосибирск облазы) полған, ол Рио-де-Жанейрода ирткен Олимпиадада араласхан. Че пу кӧрімде Наталья ӱзінҷі ле орынға сыххан. Чиңісчі Софья Лобова (Хызылчар крайы) полыбысхан. Ікінҷі орында - Маргарита Карпачева (Новосибирск облазы).
Хайди таныхтаан Сергей Кашников, спортсменнерге Олимп ойыннары соонаң даа пасха улуғ марығларға тимненерге кирек. Чиит спортсменнер дее улуғ чидіглерге чидерге сағынчалар. Оларға ідӧк Олимпиадада аралазарға оңдай пирілер. Че анда аралазар ӱчӱн, Россия чемпионадын утып аларға киректелче. Аннаңар СФО чемпионадында паза первенствозында араласчатханы улуғ туза полар. Владимир Крафттың чооғынаң, Хакасияның суғда чӱзер спорт школазында 525 пала ӱгренче. Оларның санында кӧп кічіг пала, аннаңар Хакасияда спорт узы аттығ спортсменнер асхынах. Наа спорт комплексі пӱдіріл парғанда, амғы кічіг олғаннар таңдағызына ізеніс пирчелер. Город администрациязы пу марығларны турыстыра иртірібізерге пӧгінче.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы