ӦМЕНЕҢ ХАПХАН ТӦГЕ НИИК ПОЛАДЫР
05.02.2019
Хабарлар
«Алтынай» хакас ипчілер пірігізінің араласчызы, Хакасияның чон узы Елизавета ЧАПТЫКОВА чыылысхан улусты тоғыстарынаң таныстырча
Сан пиріс. Хакасияның национальнай паза территориальнай политика министерствозы 2018 чылда иділген тоғыстарынаңар чонға искірген.
ХАКАСИЯНЫҢ НАЦИОНАЛЬНАЙ ПАЗА ТЕРРИТОРИАЛЬНАЙ ПОЛИТИКА МИНИСТРІНІҢ ТОҒЫЗЫН ТОЛДЫРЧАТХАН МИХАИЛ ПОБЫЗАКОВТЫҢ САН ПИРІЗІН ИСТІП АЛАРҒА КІЗІ КӦП ЧЫЫЛЫСХАН. ААЛҶЫЛАРНЫҢ САНЫНДА РЕСПУБЛИКАНЫҢ МИНИСТЕРСТВО-ВЕДОМСТВОЛАРЫНЫҢ, АЙМАХ-ГОРОДТАРЫНЫҢ УСТАҒ-ПАСТАА, ХАЛЫХ ПАЗА КИРТІНІС ПІРІГІСТЕРІНІҢ, АЙМАХ НАЦИЯЛАР ДИАСПОРАЛАРЫНЫҢ АРАЛАСЧЫЛАРЫ ПОЛҒАННАР.
С.П.КАДЫШЕВТІҢ АДЫНАҢ КУЛЬТУРА КІНІНІҢ КІЧІГ ЗАЛЫНДА ТЫҒЫРАМА ОДЫРҒАН ЧОННЫ ИҢ ПАСТАП ХАКАСИЯНЫҢ ПАЗЫ ВАЛЕНТИН КОНОВАЛОВ АЛҒЫСТААН.
АЛҒЫСТАСТАР ПАЗА СЫЙЫХТАР
- Пӱӱнгі кӱнде Хакасияда 100 азыра нациялығ чон чуртапча. Піс оларнаң хада ынағ чуртапчатханыбыстың ӧріндірче. Улуғ алғыс читірерге кирек национальнай паза территориальнай политика министерствозына. Ол турғызылған пӧгіннерін - аймах чоннар культуралары аразындағы палғалысты тыыдары паза нацияларның халых пірігістерінің тоғызына хабазары - чахсы толдырча.
Хайдағ даа чон республиканың экономика, культура, спорт тилізіне чахсы хозым итче нооза. Аннаңар ӱлгӱ паза халых чон ідӧк ле удур-тӧдір пілізізіп паза полызызып чуртазын, - таныхтаан Валентин Коновалов.
Анаң ол Хакасияда национальнай политиканы тилітчеткен киректе ӧткін араласчатхан улусха Хакасия пазының алғыстас пічіктерін читірген. Ол сыйыхха турысханнар: Ағбан городтың Хызыл Ағбан кічіг районының старостазы Людмила Степанова, Таштып аймаандағы «Тамыр» шорлар пірігізінің кнезі Борис Шулбаев, «Хакасия» ГТРК-ның хабарңызы Алексей Боргояков, национальнай паза территориальнай политика министрінің советнигі Татьяна Идимешева.
Хакасияның Ӧӧркі Чӧп кнезі Владимир Штыгашевтің адынаң сценаа Ӧӧркі Чӧп депутады Пётр Воронин сыххан.
- Министерствоның мындағ сан пиріс итчеткені республиканың тиксі тилізіне туза ағылчатхан халых пірігістерін, национальнай диаспораларын аарлапчатханын таныхтапча. Оларның хабазиинаң республика чуртазы уламох ӧңненче нооза. Пу сан пиріс ідӧк чахсы чуртассар теестегі хаалиибыс ползын, - таныхтаан ол чооғында.
Алғыстастар соонда сӧс национальнай паза территориальнай политика министрінің тоғызын толдырчатхан Михаил Побызаковха пирілген.
КУЛЬТУРАЛАР ПАЛҒАЛЫЗЫН ТЫЫДАРЫ
Пылтырғы саннар хоостыра, Хакасияда иң кӧп орыстар (81,7 %) паза хакастар (12,1 %) чуртапчалар. Немецтернің саны 1,1 %-ке тиңнелче, украинецтернің - 1,0 %-ке, татарларның - 0,6 %-ке. Пасха нацияларның хада-пірге саны - 3,5 %.
2018 чылда Хакасияда, полған 41 пірігіске хоза, ӱс наа халых пірігізі санға алылған. Олар - регионда хакас тілін хайраллир паза тилідер «Ине тілі» пірігіс, ас саннығ шорларның «Хызыл суғ» род пірігізі, кибірлерні паза культураны тилідер «Славяночка» коммерческая нимес пірігіс.
Киртініс пірігістерінеңер чоохтаза, республикада амғы туста 84 православнай пірігіс, 24 - протестантскай паза неопротестантскай, мусульманнарның 4 пірігіс, буддисттернің - 2, пірер пірігіс иудаисттернің, католиктернің паза шаманнарның.
Таныхтирға кирек, Хакасияда хазнаның национальнай политиказын тилідеріне 2017 - 2021 чылларға алылған «Хакас Республиканың региональнай политиказы» хазна программазы хабасча. Ол программазар «Укрепление единства российской нации и гармонизация межнациональных отношения в Республике Хакасия» подпрограмма кірче. Аның ӱчӱн, Хакасияның национальнай политика министерствозынаң пасха, ӱгредіг, культура, спорт министерстволары нандырығлығ полчалар.
Подпрограмма хоостыра пістің регионға 2018 чылда 14 миллион 446 муң салковай позыдылған (2017 чылдағызынаң 50,4 %-ке кӧп). Ол ахчаның 10 миллион 328 муң салковайы мероприятиелер иртіреріне пирілген.
Ол марығ-пайрамнарның санына Славян чонның пічиине паза культуразына чарыдылған хоостар марии, орыс тіліне чарыдылған республика форумы, «Чылтызахтар», «Хакас тілі - чонның худы», «Ине тілі» фестивальлар кірчелер.
Национальнай паза территориальнай политика министерствозы 2018 чылда ідӧк аймах нациялар пірігістеріне ӱлӱкӱннер иртірерге чахсы хабасхан. Кӧзідімге, Хакасияның Улуғлар чӧбінең хада-пірге Чыл пазы, Ӱртӱн тойы иртірілген. «Алтынай» ипчілер пірігізі, Асхыс, Таштып, Ағбан пилтірі аймахтарынзар чӧріп, чоннаң тоғасхан, ол-пу ағырсымнығ сурығларны ӱзӱрген.
Кибірліг пайрамнарын иртіреріне ідӧк Азербайджан, Хырғыс, Корея чонына, поляктарға, немецтерге улуғ полызығ иділген. Паза, таныхтирға кирек, пылтыр пастағызын на диаспоралар аразында кічіг футболҷа «Кубок дружбы народов Хакасии» марығлар ирткеннер. Олар ідӧк национальнай спорт фестивальында хынып араласханнар.
Хакасияда чурттығ аймах нациялар хайди даа Россияның танығлығ кӱннерін прайзынаң хада пайрамнапчалар. Тиксі алза, 2018 чылда национальнай паза территориальнай политика министерство хабазиинаң иртірілген мероприятиелерде 12 муң кізі араласхан. Олар прайзы хада-пірге пайрам-ӱлӱкӱннернің улуғ тузазын таныхтааннар. Ана оларда культуралар палғалызы, удур-тӧдір улуғлас тыыпча нооза.
Хакасия пазы Валентин КОНОВАЛОВ Таштып аймаандағы «тамыр» шорлар пірігізінің кнезі Борис ШУЛБАЕВКЕ алғыстас пічиин читірче
МУНИЦИПАЛЬНАЙ ПӰДІСТЕРГЕ ХАБАЗЫП
Хакасияның национальнай паза территориальнай политика министерствозы коммерческай нимес пірігістернең (НКО-лар) пик палғалыстығ - оларға грант пирер - тоғыс апарча.
Пӱӱнгі кӱнде Хакасияда андағ 693 пірігіс. Пылтыр оларға тиксі 2 миллион салковай позыдылған. Ол ахча чиңісчі полыбысхан 15 пірігіс аразында ӱлестірілген. «Алтынай» лига - чиңісчілернің пірсі. Хакас ипчілернің проекті Тун пайрамда чуртасха кирілген. Олар иртірген регионнар аразындағы конференцияда Туваның, Тағлығ Алтайның, Шорияның ипчілері араласханнар.
Хакасиядағы НКО-лар ідӧк Президент чыындызының гранттар мариинда араласчалар. Пылтыр 13 пірігіс анда чиңіс тутхан. Оларға 12,2 миллион салковай пирілген.
Хакасияда прай 99 муниципальнай пӱдіс. Национальнай паза территориальнай политика министерствозының паза пір ӧӧн пӧгіні - оларның тилізіне хабазары.
Пылтыр министерство 2007 чылда чуртасха кирген «Республиканың иң артых муниципальнай пӱдізі» мариин узаратхан. Анда 57 муниципальнай пӱдіс араласхан. Чиңісчілер паза призерлар санына 29 пӱдіс кирілген. Оларға социальнай проекттерін чуртасха кирерге 200 - 600 муң салковай пирілген. Тиксі пу марыға 10 миллион салковай позыдылған.
Іди Асхыс поселокта, Чоғархы Таштыпта суғлар кизіре тахталар, Пирікчулда саналығ чылҷаң чол, Бондаревте музея нааҷылалғаннар. Хубачарда, Буденовкада, Новотроицкаяда Илбек Ада чаа араласчыларына чарыдылған хумартхы тастарны иптебіскеннер. Пыдырахта олғаннарға ойнаҷан орын тимнеп пиргеннер. Томыҷахтағы паза Хойзадағы клубтарда наа кӧзенектер турғызылғаннар. Аршаннарда, тізең, хакас иб кӧрімніг этнокультурнай кін пӱдір салғаннар.
«Пу марығ аал-поселоктарның чуртазын чахсыландырарға тың тузалығ. Орындағы бюджет ахчазы андағ ла кӧп нимес нооза. Аннаңар піс ол аннаң андар иртіріл турзын тіп сағынчабыс», - ӱлескен Таштып аймааның пазы Алексей Дьяченко, залдағы устағҷыларзар айланып.
Орындағы пос устаныстарға ідӧк чахсы полысчалар ТОС-тар. Амғы туста оларның саны 143-тең 184-ке теере ӧс парған. Оларның аразында национальнай паза территориальнай политика министерствозы ахча утар марығлар иртірібӧкче. Пылтыр ТОС-тарнаң хада тоғынчатхан иң артых муниципальнай пӱдісті таллааннар. Сыйых чыындызындағы ахча 1 миллион 200 муң салковайға тиңнелген.
ЧОН СУРЫНЫЗЫ
Мына мындағ оңдайнаң чарыт пирген министерствоның ӧӧн кӧстеглерін Михаил Побызаков.
Анаң, 2018 чылда иртірілген «Иң артых муниципальнай газета» марығның салтарын идіп, муниципальнай газета устағҷыларына, тоғынҷыларына министерствоның алғыстас пічіктерін читірген. Пӱӱл министерствоның пу мариинда чиңісчілер Харатастағы, Таштыптағы паза Ширадағы газеталар полыбысханнар.
Министрнің чон алнында ирткен чыл хоостыра піди сан пирістіг чоох тудары кибірге киріл парған. Пӱӱл Михаил Побызаков, министрнің тоғызын толдырчатхан кізі полып, чон алнынзар сыххан. Аннаңар аны истерге килген кізілернің кӧбізі аарластығ аалҷы полған Хакасия пазы Валентин Коноваловтаң аны «и.о» чох министрге табырах турғыс саларға сурынған. Халых пірігістерінің, НКО-лар араласчылары, орындағы пос устаныс пастыхтары ағаа Михаил Анатольевич Побызаковтың тоғызына чӧпсінчеткеннерін толдыразынаң чарыт пиргеннер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы