ХАКАСИЯНАҢ БЕЛАРУСЬТЫҢ САДЫҒ ПАЛҒАЛЫЗЫ ТИЛІПЧЕ
10.04.2019
Хабарлар
Беларусьтың Россиядағы илҷізі Владимир СЕМАШКО паза Хакасия пазы Валентин КОНОВАЛОВ хабарҷыларның сурығларына нандырчалар
Тоғазығ. Хакасия пазы Валентин Коновалов паза республика правительствозының кізілері пу неделяда Беларусь Республиканың Россиядағы илҷізі Владимир Семашконың устаанынаң улуғ делегациянаң тоғасханнар.
БЕЛАРУСЬ РЕСПУБЛИКАНЫҢ ДЕЛЕГАЦИЯЗЫ ТОҒЫС ЧОРЫҒЫНАҢ ХАКАСИЯЗАР КИЛ ПАРАРДАҢАР ПАСТЫХТАР ХЫЗЫЛЧАРДАҒЫ ЭКОНОМИКА ФОРУМЫ ТУЗЫНДА ЧООХТАС САЛҒАННАР. НЕДЕЛЯ ПАЗЫНАҢ, ТІЗЕҢ, ААЛҶЫЛАР УЛУҒ ДЕЛЕГАЦИЯНАҢ ЧИТТІЛЕР. БЕЛАРУСЬТЫҢ РОССИЯДАҒЫ ИЛҶІЗІ ВЛАДИМИР СЕМАШКОНЫҢ УСТААНЫНАҢ РЕСПУБЛИКАЗАР 19 КІЗІ КИЛГЕН, ОЛ САНДА ПОСОЛЬСТВО КІЗІЛЕРІ ПАЗА АЙМАХ ПРЕДПРИЯТИЕ УСТАҒҶЫЛАРЫ.
8 АПРЕЛЬДЕ ХАКАСИЯ ПРАВИТЕЛЬСТВОЗЫНЫҢ ТУРАЗЫНДА РЕСПУБЛИКА ПАЗЫ ВАЛЕНТИН КОНОВАЛОВТЫҢ ПАЗА БЕЛАРУСЬ РЕСПУБЛИКАНЫҢ РОССИЯДАҒЫ ИЛҶІЗІ ВЛАДИМИР СЕМАШКОНЫҢ ТОҒАЗИИ ИРТКЕН. ТОҒАЗЫҒДА КӦДІРІЛГЕН СУРЫҒЛАР ПАЗА АЛЫЛҒАН ЧАРАДЫҒЛАР ПРОТОКОЛҒА КИРІЛГЕННЕР.
- Тоғыс чорығынаң кил парған ӱчӱн Беларусь делегациязына алғызым читірчем. Республикаа ол сынында уғаа танығлығ. Беларусь Республика пістің ізестіг партнерларыбыстың пірсі полча. Хакасияның паза Белоруссияның аразында ниме-ноо садии чахсы парча. Ол хада-пірге тоғыс чахсы апарылчатханнаңар паза садығ-экономика палғалызын тилідер оңдайлары парынаңар чоохтапча. Пӱӱн піске мыннаң мындар хада-пірге тоғынар кӧстеглерні, палғалыстарны тилідер оңдайларны таныхтирға киректелче, - теен Хакасия пазы Валентин Коновалов.
- Пісті республиказар хығырған ӱчӱн алғыстапчам. Кӧп сурығ таныхтал парған: аал хониинда, промышленностьта, чурт-коммунальнай хониинда паза пасха кӧстеглерде. Піс прай даа кӧстеглерӌе тоғынарға тимдебіс, - таныхтаан чооғында Владимир Семашко.
Владимир Семашко Беларусь Республиканың экономикадағы чидіглерінеңер искір пирген, ол санда Хакасиянаң садығ-экономика палғалыстарынӌа. Ағбан город аның кӧңніне кіртір. Ол ідӧк пірее микрорайонның тиксі пӱдіріг проектін дее тимнеп пирерҷікпіс теен. Чоохтирға кирек, Беларусьтың Россияда андағ опыды пар полтыр. Хонӌых хазнадағылар Калининград городта нинӌе-де микрорайон пӱдір салтырлар.
Кӱн суриина сығарылған сурығларны Хакасияның экономика тилізі министрі Николай Евдокимов чарыдып пастаан. Аның искіриинең, 2016 чылда Хакасия паза Беларусь садығ паза промышленность, наука паза технологиялар, гуманитарнай кӧстеглерҷе хада-пірге тоғынардаңар чӧптес салғаннар. Андағ оңдайнаң, 2019 чылда садығ палғалыстары 55 миллион долларға алай 3,5 миллиард салковайға чит парғаннар. Беларусь Хакасияа кип-азах, коммунальнай, тағ паза аал хонии техниказын сатча. Хакасия - Беларусьха: алюминийні, фольганы, хара тасты паза пасха ниме-нооларны. Хайди піс кӧрчебіс, ӧӧн палғалысты промышленностьтағылар тӧстепчелер. Николай Евдокимовтың кӧрізінең, Хакасияның паза Беларусьтың садығ паза промышленность палғалыстарын тилідеріне чир ис-пайын аниры ӧсчеткені, тиксі тыхтағ тоғыстары хоостыра кӧп квартиралығ тураларда лифттер алыстырылчатханы, аал хонии тилізі хабазар. Чоохтирға кирек, республикада чуртасха кирілер инвестиция проекттері илееде, ол санда «Кимдегі Сибирь» ӱс хонҷых регионның килкім инвестиция проекті.
Беларусь делегациязында 19 кізі полған, ол санда Беларусьтың Россиядағы посольствозының Хызылчардағы пӧлиинің советнигі Виктор ЩЕТЬКО (ортызында)
Николай Евдокимов ідӧк Беларусьтың техниказын алчатхан предприятиелер пааларны чардыхти тӧлиріне алай тӧбін паалар поларына, чахсы оңдайлығ лизинг пирілеріне ізенчеткеннерін читірген.
Беларусь посольствозының Хызылчардағы пӧлиинің советнигі Виктор Щетько хазнадағы предприятиелер сидік сурығларны хайығда тутчатханын таныхтаан. Оларның санында БелАЗ самосвалларына шиналар, гарантиядағы сыныхтағ паза тыхтағ тоғыстары паза пасхазы. Техника аннаң тузаланар предприятиелерге, фермерлерге кӧні садыларға кирек, аннаңар Хакасияда дилер полар компанияларнаң чӧптезіглер иділче. Чоохтирға кирек, Владимир Ильич Семашко полған на чӧпті, наа сағысты ідӧк делегацияның алынҷа протоколына кирерге сурынған. Пірее сурығны пӧгерге киректелзе, ол анзына тус кӧр турған.
Хакасияда мал теерізінең сурығ турчаттыр. Аны предприятиелер паза хоныхтар чирзер кӱрепчеттірлер. Регионда аннаң парыстанҷаң идінҷек чоғыл. Беларусьтағылар сах андох пу кӧстегҷе тоғынарға тимде полчатханнарын искіргеннер. Оларның тоннар, киптер сығарчатхан фабрика пар. Мал тутчатханнарға теердең ідӧк парыс аларға чарир полар.
Пасха сидік сурығ - ас-тамах, садығ тураларынзар читкенҷе, нинҷе-нинҷе «холҷа» иртчеткені, салтарында ас-тамах паазы илееде ӧс парча.
- Садығ туразынзар кіргем, Беларусьтаң ас-тамах садылчаттыр. Чахсы. Че паалары... - таныхтаан Владимир Семашко. - Хойытхан сӱтті 120 салковайға сатчалар, хаҷан пісте ол 47 салковайға позыдылча! Олох туста чолға хорадығларның сині - 6 - 8 процент ле!
Аның кӧрізінең, ас-тамахты садығ тураларынзар кӧні читірзе ле, пу сурығны пӧгіп аларға чарир.
Республикада Беларусь паза МТЗ тракторларын «Союз» ООО-да алай Хызылчар крайында дилер полчатхан компанияда садызып аларға чарир. Олох туста аал хонии тракторларын тыхтап полар механиктерні тимнирге киректелчеткеннеңер искірген Хакасияның аал хонии паза ас-тамах министрі Сергей Труфанов. Аның ӱчӱн Ағбан пилтірі аймаандағы училищеде ӧнетін класс азарға чарир теен ол. Олох туста дилернің таниинаң, республикада аал хонии тракторын алчатхан чуртағҷылар аны постары тыхтапчаттырлар. Че беларусьтағылар пу сурығны ідӧк хайыға аларға тимделер.
Тоғазығда ӱзӱрілген сурығлар, оларны пӧкчең чарадығлар протоколға кирілгеннер, хайзында хол салғаннар Хакасия пазы Валентин Коновалов паза Беларусьтың Россиядағы илҷізі Владимир Семашко. Анаң «ТД МТЗ-Сибирь» ООО-ның ӧӧн директоры Дмитрий Белайц паза «Союз» ООО-ның ӧӧн директоры Виктор Белоусов тракторлар читірердеңер чӧптес салғаннар. Чӧптезіг хоостыра Хакасиязар садыға 400 азыра трактор читірілер, оларның І00-ін пӱӱл садыбызарға кирек.
Хакасия пазы Валентин Коноваловтың кӧрізінең, тоғазығ республиканың Беларусьнаң палғалызын тыыдарға паза тилідерге уламох хабазар.
Беларусь делегациязы 8-9 апрельде ідӧк республикадағы техника садылчатхан компанияларҷа, аны тыхтирынаң, сыныхтағда тударынаң айғасчатхан сервистерҷе паза техниканаң тузаланчатхан разрезтерҷе чӧргеннер, оларның тоғыстарынаң танысханнар. Владимир Семашко, тізең, ідӧк Ағбан город пазы Николай Булакиннең тоғасхан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы