ПӰДІРІГ КИРЕЕН АЙНЫДЫП...
19.04.2019
Хабарлар
Боградтағы ГОК-тың менеджері Даниил КОХ предприятие сығарызынаң таныстырча
«ХакСтройЭкспо-2019». 18 - 20 апрельде республиканың музей-культура кінінде «ХакСтройЭкспо-2019» регионнар аразындағы ХП пӱдіріг кӧзідіг-форумы иртче.
Хакасияда пӱдіріг киреенең айғасчатханнарға 12 чыл аразына «ХакСтройЭкспо» кӧзідіг-форум уғаа танығлығ пол парған. Мында пӱдіріг материалларын сығарчатханнар паза полызығлар пирчеткеннер чыылысчалар, пірдең араласчылар, Хакасиядаң на нимес, пасха-пасха регионнардаң килчелер.
Кӧзідімге, музей-культура туразы алнында Минсуғдағы лего-кірпис сығарчатхан идінҷек Сергей Прокудин турча. Кӧзідіг орны ӧңніг лего-кірписнең сиденнелтір. Иреннің чооғынаң, мындағ кӧзідіглер наа палғалыстар тӧстирге хабасча. Сергей Прокудин «ХакСтрой-Экспода» ікінҷі чылы араласча. Аннаң ырах ниместе аар таарлағ машиналары паза автомобильлер кӧзідіге сығарылтыр. Ӧӧн ізіктерні ирткенде, кӧзідігде илееде кізі паза предприятие араласчатханы кӧрінче. Піске, тізең, Хакасияда ниме-ноо сығарчатханнарны кӧріп аларыбыс килген. Оларның санында Боградтағы ГОК-ты адирға чарир. 20 азыра чыл тоғынчатхан предприятие хум, сай паза істіндегі пӱдіріг тоғыстарына тимде пораластар сығарча. Іди киҷее, хосхар айының 18-ӌі кӱнінде, музей-культура кінінде «ХакСтройЭкспо» кӧзідіг-форум тоғынып пастады. Пӱӱн паза таңда аның тоғызы узарадылар.
«ХакСтройЭкспоны» азарында Хакасия пазының орынңызы Юрий Курлаев, Ӧӧркі Чӧптің экономика политиказынңа, промышленностьча паза пӱдірігңе комитет кнезі Василий Шулбаев паза пӱдіріг паза ЖКХ министрі Илья Кононенко араласханнар. Юрий Курлаев Хакасия пазы Валентин Коноваловтың адынаң пӱдірігҷілерге республиканың хазна программаларында араласчатханнары ӱчӱн алғызын читірген. Юрий Курлаев, кӧзідіг-форум пӱдіриинің 12-ҷі кірпизін салып, аны пайрамни асчатханнаңар чарлаан.
- Хакасияда, Россия президентінің майдағы чарадығларын чуртасха киріп, 2024 чылға теере 43 наа пӱдіріг турғызылар. «Кимдегі Сибирь» регионнар аразындағы проектче республикада 12 инвестиция проекті чуртасха кирілер, ол санда 11 проект инфраструктура тилізіне теелче. Аннаңар пӱӱнгі кӱнде пӧгін турча - тоғысты табырах паза тузында толдырары. Ол теелче прайзына: толдырығлығ ӱлгӱдегілерге, законнар тимнепчеткеннерге, - таныхтаан чооғында Василий Шулбаев.
Пастыхтар пасха-пасха регионнардаң килген араласчыларның кӧзідіге сығарған ниме-нооларынаң паза полызығларынаң чағын танысханнар. Чоохтирға кирек, пу олаңай ла кӧзідіг нимес, ідӧк форум полча. Аннаңар кӧзідігдең пасха кіннің ікінңі хадылында пу кӱннерде 10.00 - 18.00 частарда студенттерге «WORLDSKILLS RUSSIA-2019» секция тоғынар. Пӱӱн, тізең, ӱзінҷі хадылында «Урбанистика паза городтағы нап-наа оңдайлар» секция тоғынар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы