ААЛЛАРҒА ХАЗНА ПРОГРАММАЗЫ ХАБАЗАР
04.12.2019
Хабарлар
Аал хонии. Хакасия аалдағы чирлерні тилітчең федеральнай проектсер кір парған
Хакасияның нинҷе-де аалы «Аалдағы чирлернің комплекстіг тилізі» хазна программазының араласчызы полыбызар. Программаны президенттің чахиинҷа Россияның аал хонии министерствозы тимнеен, чуртасха кирілер тузы - 2020 - 2025 чыллар.
Проекттің ӧӧн кӧстеглері аразында - аал чуртағҷыларын хайраллиры, аалларда благоустроеннай чурттарнын санын 50%-ке теере ӧскірері.
- «Аалдағы чирлернің комплекстіг тилізі» программа 2020 чылның 1 январьынаң чуртасха кирілер. Пӧгін уғаа улуғ - пис чыл аразына аалдағы чуртағҷылар санын, паза иң ӧӧні аалдағыларның чуртас синін, ӧскірібізері. Алынҷа хайығ саларға кирек инфраструктура тилізіне: имнег полызығларына, ӱгредіге, чолларға, транспортха, - таныхтаан Хакасияның аал хонии паза ас-тамах министрі Сергей Труфанов.
«Аалдағы чирлернің комплекстіг тилізі» программа хоостыра иң кирек пӧгіннерні пӧгері кӧрілче: аалларзар чиит, пӧзік квалификациялығ кадрларны тартары, инженернай паза социальнай инфраструктураны тилідері, чурт пӱдірері. Кӧзідімге, аалдағыларға льготалығ, чылдағы 3% ставкадаң пӧзік нимес, ипотека пирері кӧріл парған.
Хазна программазынзар Хакасияның ӱс аймаа кір парған - Таштып, Ағбан пилтірі паза Алтай. Килер чылда, кӧзідімге, Хубачарда арығлаҷаң пӱдіріглер, спорт площадказын пӱдір салары, аймахтың имнег туразына оборудование алары кӧрілче. Томыҷахтар аалында культура-тынағ кіні, спорткомплекс тыхталар, спорт площадказы пӱдірілер паза амбулаторияа оборудование алылар.
Планзар ідӧк Таштып аймаандағы Ибіг паза Индіркі Ибіг ааллар кір парған. Мында, школаның, олған садының, Культура туразының тиксі тыхтаан иртірерінең пасха, санитар паза школа транспортын алары кӧріл парған.
Проекттің паазы - 350 миллион салковай. Тиксі Россиядағы аалны чахсыландырарына ікі триллион артиинаң салковай позыдылар.
Автор :
Алексей БАИНОВ
Пн | Вт | Ср | Чт | Пт | Сб | Вс |
24 | 25 | 26 | 27 | 28 | 29 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы