ИДӀНҶЕК ПОЛАРҒА ХЫҒЫРЧАЛАР
07.02.2020
Хабарлар
Кӱн сурии. 2020 чылда республикада «Хакасияда пос киреен тӧсте» наа проект тоғынып пастапча. Ӱлгӱдегілер аның ӧӧн сағызын пресс-конференцияда читіргеннер
Хакасияның ӱлгӱлері республикада пос киреенең айғазарына истіг оңдайлар тӧстирін узаратчалар. Анзына республикада алылған чарадығлар паза нацпроекттер чахсы хабасчалар. Че пирілчеткен хабазығлардаңар паза тӧстелчеткен оңдайлардаңар тиксі искіріг пос киреенең айғасчатханнарға паза айғазарға сағынчатханнарға тузында читірілер ӱчӱн, аннаңар тӧреміл чоохтирға кирек. Ол, тізең, наа проекттің пӧгіннерінің пірсі. Че «Хакасияда пос киреен тӧсте» проекттің ӧӧн пӧгіні - идінӌектерні республиказар айландырып алары! Ниме аның ӱчӱн иділче паза иділер? Мына пу сурығларға нандырығларны Хакасия пазының орынӌызы Ирина Войнованың устаанынаң тимнеп килгеннер экономика тилізі министрінің орынӌызы Татьяна Речкова, федеральнай налог службазының Хакасияӌа управление устағӌызы Светлана Диденко, ис-пай паза чир хайызығлары министрінің орынӌызы Евгения Темерова, энергетика паза тарифтерні хайығда тударынӌа хазна комитедінің кнезі Манук Данданян, идінӌектер праволарын арачылирынӌа уполномоченнай Василий Кудашкин паза Тиліс чыындызының директоры Денис Пауль.
Татьяна Речкова идінӌектерге кӧрілген хабазығлардаңар чоохтаан. Пӱӱл пос киреенең айғасчатханнарға налог сині тӱзірілгеннеңер піс пір ле хати искірбеебіс. Амды кічіг паза ортын пос киреенең айғасчатханнар 4-7,5 % парысха налог тӧлирлер, аның сині идінӌек таллап алған налог системазынаң палғалыстығ. Че пар орыннар, хайда тоғынып пастапчатхан идінӌекке пастағы пис чыл пір дее налог тӧлебеске чарир. Ол Абазада, хайзы чуртас-экономиказы алында тиліпчеткен орын адына турысхан паза Харатас городта, хайзы моногородтар тилізі программазына кирілген. Килкім бизнеске, кем республикаа чахсы инвестициялар итче, ідӧк чахсы льготалар кӧріл парған.
Хакасия «Кічіг паза ортын пос кирее паза идінӌектің пастаана хабазары» нацпроектте араласча. Нацпроект идінӌектерге чахсы оңдайлар пирче, ол санда моногородтарда социальнай пос киреен азарына 1,5 миллион салковайға гранттар, Гарантия чыындызынаң 3 чылға 3 миллион салковайға теере тӧбін проценттіг (3,125 - 10 % теере) ӧдісті. Процент сині ідӧк идінчектің залог артысчаң оңдайларынаң паза орныхчатхан орнынаң палғалыстығ.
Светлана Диденко пос позына тоғыс таапчатханнарға налогтаңар (пічікте - «Профессия парызына налог») чарыт пирген. 2019 чылда наа налог тӧлечең система тӧрт регионда чуртасха кирілген, пӱӱл оларға 19 регион хозылған, ол санда Хызылчар крайы паза Омск облазы. Устағҷының искіриинең, пу системанаң тузаланчатхан улус аны чӧпсіністіг паалапча. 2020 чылның 1 июльынаң ол прай регионнарға тарадылар. Пос позына тоғынчатхан кізі, кӧзідімге, парикмахер алай пірее ус, «Мой налог» приложениені телефонына турғызып алза, ағаа паза пір дее чирзер чӧрерге кирек чох полар. Анда ол прай иткен тоғыстары ӱчӱн парызын санап полар. Олаңай кізілерге полызығ пирчеткеннерге налог сині - 4 %, юридическай лицоларға - 6 %.
Хакасияның ис-пай паза чир хайызығлары министерствозы республиканың паза муниципалитеттернің чирлерін паза тибіреділбинчеткен ис-пайын санға алған. Толдыра пічікнең правительство порталында министерствоның пӧлиинде танызып аларға чарир. Хакасия правительствозы чарадии хоостыра идінҷектерге хазна ис-пайының аренда тӧлеглеріне льгота пирілче: пастағы чыл аренда ӱчӱн тӧлегнің 40 % тӧлирге чарир, ікінҷі чылында - 60 %, ӱзінҷі чылында - 80 %.
Евгения Темерованың искіриинең, министерство ідӧк тибіреділбинчеткен ис-пайның кадастр паазы хатап саналчатханнаңар искірген. Чайғы тоозыларына ол искіріг тимде полар паза идінҷектерге, оларнаң, танызып, чараспинчатса, ӧнетін тӧстелген комиссиязар айланарға чарир.
Идінҷектерге иң ағырсымнығ сурығларның пірсі - чарытхы паалары. Олар тузаланчатхан чарытхы кӱзі илееде аарлыға турча: НН (тӧбін кӱстіг чарытхы) 1 Мегаватт/час турча 6087,8 салковай, СН2 (ортымах кӱстіг) - 4909,82 салковай. Пу январьда турғызылған паалар. Манук Данданянның таниинаң, 2019 чылның июльындағы пааларнаң тиңнестірзе, пу паалар пілдірте тӧбін, че хазна комитеді пааларны тӱзірерінче тоғысты узарадар.
Василий Кудашкин идінҷектерні сыныхтирын хызырарынҷа тоғыс хазна синінде апарылчатханына хайығ айландырған. Ідӧк идінҷектерге «ізіг линия» телефоны тоғынар: 8-913-056-78-67. Аннаң пасха, уполномоченнайның интернет-приёмнайы тоғынча. Пічікті электроннай почта адрезіне ызарға чарир: khakasia@ ombudsmanbiz.ru.
Ирткен чылда декабрьда Ағбан городта «Минің пос киреем» кін азылған. Денис Паульның искіриинең, аның ӧӧн пӧгіні - идінҷектерге полызығларны пір орында пирері.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
24 | 25 | 26 | 27 | 28 | 29 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде