НАУКА ТОҒЫЗЫНАҢ АЙҒАСЧАТХАН ЧААҶЫЛАР
03.03.2017
Хабарлар
Степан ТОРОКОВ (сол саринда) арғыстарынаң хада
Пістің хазнабыстың президентi Владимир Путиннің чарадии хоостыра 2013 чылда Россияның армиязында наука роталары тӧстелгеннер. Тӧрт чыл аразына анда илееде оол служба иртібіскен, оларның санында пістің чир-суғҷыбыс Степан Тороков.
Таныхтирға кирек, наука роталарынзар техническай вузтарны хызыл дипломға алай пӧзік баллға тоосхан оолларны ла алчалар. Кӧзідімге, пылтыр кӱскӱзін Хакасиядаң армияа хабылған 731 призывниктең ікі ле кізі наука ротазынзар алылған.
Асхыс аалның чуртағҷызы Степан Тороков службаны 2015-2016 чылларда Томсктағы политехническай университетте бакалаврға ӱгреніп алған соонда ирткен. Ол чоохтапча: «2011 чылда мин, Хакас гимназиязын тоозыбызып, Томсктағы политехническай университетсер «электроника паза наноэлектроника» специальностьха ӱгренерге кірібіскем. Армияда службаны иртербін тіп ікінҷілебеем, че пастап магистратураны тоос саларға сағынғам. Улуғ курстарда наука роталарынаңар піліп алғанда, бакалавр степеньін алып, службаны иртібізерге чаратхам».
Степанның таниинаң, ол позын наука ротазынзар албастар тіп чочынтыр. Андар чахсы ӱгренчеткен, істезігліг тоғыстар апарчатхан, наука-практика конференцияларында паза олимпиадаларда ӧткін араласчатхан оолларны алчалар. Чиит оол вузты хызыл дипломға тоозыбысхан, че наука тоғызынаң айғазарға ол сағынмаан даа. Армияа ол 2015 чылда чайғызын парыбысхан.
«Службаны мин Россияның Тирігліг кӱстерінің тиксі войсколар академиязының наука ротазында ирткем, - узаратча чооғын Степан. - Ол Москвада орныхча. Ротада 60 чааҷы полған, оларның ӱзі ле гуманитарнай ӱгредігліг, пасхазы техника вузтарын тоосхан кізілер. Хада служба ирткен арғыстарым Москвадаң, Санкт-Петербургтаң, Тула, Иркутск, Ростов, Екатеринбург областьтарынаң полғаннар. Кӧбізі магистр диссертациязын арачылирға маңнантыр, кем-де, аспирантурада ӱгренчеткенде, армияа парыбысхан, аннаңар ротада мин часха прайзынаң кічіг полғам. Наука ротазындағы чааҷыларны операторлар тіп адапчалар. Прай операторларны ӱс ӧмее чарыбысханнар. Пастағы ӧме Сухопутнай войсколарның ӧӧн управлениезінің кирексіністерін толдырған, ікінҷізі - Кии-десант войсколарының командованиезінің, ӱзінҷізі - Россияны арачылаҷаң национальнай кіннің. Мин халғанҷы ӧмеде служба ирткем».
Наука ротазының операторлары Москвадағы чааҷылар училищезінің общежитиезінде чуртапчаттырлар. Пастағы паза ікінҷі ӧмелер андох істезігліг тоғыстар апарҷаңнар паза компьютер программаларын пасчаңнар. Ӱзінҷі ӧмедегі ооллар понедельниктең пятницаа теере Россияны арачылаҷаң национальнай кінзер тоғынарға чӧрҷеңнер.
Степан таныхтапча: «Ӧӧнінде операторлар компьютер программаларын тимнеҷеңнер, че пір арғызыбыс служба тузында ӱгредіг пособиезін пасхан. Операторлар тимнеен статьялар наука журналларында сыбыра сыхчаңнар. Піс ідӧк чиит чааҷы курстарын ирткебіс, стройнаң чӧрерге, чаалазарға ӱгренгебіс. Спортха улуғ хайығ салылҷаң, прай операторлар хайди даа тренажер залынзар чӧрҷеңнер».
Чир-суғҷыбыстың таниинаң, чааҷы ооллар удур-тӧдір ынағ тудынҷаңнар, оларның кӧбізінең ол палғалыс тутча. Степан Тороковнаң хада служба ирткен чииттернің ікі чааҷызы офицер полыбысхан, пір арғызын ФСБ-зар тоғынарға алып алғаннар. Хакас оолны армияда халарға чӧптептірлер, че чиит кізі ынабиндыр.
Служба иртчеткенде, Степан Томсктағы политехническай университеттің магистратуразынзар кіріп аларға маңнанған. Амды ол пастағы курста ӱгренче. Магистр диссертациязын арачылаан соонда, чиит оол тӧреен чирінзер айланарға сағынча. Чооғының халғанҷызында Степан таныхтаан: «Санапчам, полған на чиит кізее службаны иртерге кирек. Армия оолларның хылиин тыытча, сидіксіністерні тобырарға ӱгретче».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы