ТАШТЫПТАҒЫЛАРҒА - АЗЫХ УРОК
21.03.2017
Хабарлар
Таштыптағы 1 № школаның 10-11 класстар ӱгренҷілері паза Таштып аймааның Чииттер парламентінің кізілері Ӧӧркі Чӧптің азых урогында араласханнар. Ол урок Хакасияның Ӧӧркі Чӧбіне 25 чыл толчатханы хоостыра иртірілген.
Урокты Хакасияның Ӧӧркі Чӧп кнезі Владимир Штыгашев апарған. Парламент устағҷызы республиканың закон сығарҷаң ӧӧркі органы хайди тӧстелгенінеңер паза хайдағ тоғыс апарчатханынаңар чоохтап пирген. Владимир Штыгашев алынҷа парламенттің тоғызында тохтаан.
- Представитель тоғызы - ол чуртағҷылар паза ӱлгӱ аразында полғаны, закон сығарҷаң тоғызыох чіли уғаа кирек ниме, - таныхтаан Ӧӧркі Чӧп кнезі, - аның ӧӧн кӧстеглерінің пірсі -округтың тоғызында аралазары, табығҷыларның сидіксіністерін пӧгеріне хабазары. Депутатты чон таапча, аннаңар уғаа нандырығлығ тоғынарға кирек. Мин Таштып аймаанаң табылғам, андағы чуртағҷыларға алымнығ полчатханымны пілчем. Табығҷыларның прай сурыныстарын толдырарға кӱстенчем.
Аалҷыларға парламент сессиялары иртчеткен залны, Ӧӧркі Чӧп президиумы чыылығларын иртірчеткен кічіг залны кӧзіт пиргеннер. Чииттер ӱр нимеске постары депутаттарға айлан парғаннар - Хакасияның хазна гимнін орыс паза хакас тілінең истіп алғаннар, ідӧк ӱн пирҷең оңдайнаң танысханнар.
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы