ХИРУРГИЯДА - НАА ОБОРУДОВАНИЕ
27.06.2018
Хабарлар
Имнег кирее. Ағбанда республиканың Г.Я.Ремишевскаяның адынаң имнег туразында наа технологиялар кирілчеткені хоостыра тоғазығ ирткен.
Имӌі-хирург А.В .РЯЗАНЦЕВ
Хайдағ аппарат имнег туразында тоғынып пастапчатханнаңар ӧӧн имӌі Алексей Тихонович чарытхан: «Пӱӱл пістің имнег туразына наа оборудованиелерні алар тоғыс аннаң андар узарадылча.
Оборудованиелер алары 2016 чылда пасталған, пӱӱл ол тоғыс тоозылча. Ол хорадығларға пір миллиард азыра салковай кӧріл парған. Пӱӱл 736 миллион салковай хорадары кӧрілче. Таныхтирға кирек, ахча федеральнай паза республика бюджеттерінең позыдылча. Ӧӧнінде оборудованиелер алылчалар, че ідӧк тоғысха киректелчеткен хай пірее мебель алылған. Наа оборудованиелер имнег киреенде уғаа киректелчелер, ағаа хоза хай піреезі Хакасиядағы имнег тураларында чох полған».
Г.Я.Ремишевскаяның адынаң имнег туразының хирургия корпузында вакуум терапия аппарады тоғынча. Улуғ нимес аппарат кізі хазиина туза ағылча.
Атеросклероз паза сахар диабедінең ағырчатхан кізілернің тамырлары, удаа ніске полып, чітче. Андада кізі ханы тамырларӌа чахсы ойлабинча, уламох азахтардағы, холлардағы тамырлар «туюхтал» парчалар. Имӌілер таниинаң, тамырлары удаа ағырчатхан кізілернің «синдром диабетической стопы» адалчатхан ағырығ улғаатча. Аны тузында имнебин салза, кізі азах чох халарға айабас. Наа аппарат полызиинаң кізілерге азах-холларын хайраллап аларға оңдай пар. Наа оборудованиенің тоғызын паза тузазын Пии аймааның чуртағӌызы Иван Панов позында сынаан. «Мин сахар диабедінең сигіс чыл ағыр парирбын. Азаам іди тың ағырыбысханын сизінмин дее халғам. Мының алнында полған полза, азаам чох халарӌыхпын. Амды азаамны, имнеп, ал халғаннар. Мин автобус водительі полчам, имнен полбаан ползам, тоғыс чох халарӌыхпын. Азаам ал халған ӱчӱн имӌілерге улуғ алғыс», - алғыстаан Иван Борисович.
Имӌі-хирург Александр Рязанцев вакуум терапия препарады хайдағ оңдайнаң тоғынчатханын паза хайдағ туза ағылчатханын чарытхан.
- Улуғ хомзынысха, республикада сахар диабедінең ағырчатханнарның саны чыл сай хозылча. Аннаңар мындағ ағырығнаң кӧп кізі айланча. Пістің имнег туразынзар республика аймахтарынаң ағырығлары улғаат парғаннар айланчалар. Оларны наа оборудование полызиинаң имнепчебіс. Кӧзідімге, нинҷе-де чыл мының алнында Иван Пановтың азаан тізек ӱстӱнҷе кизібізерге килізерӌік. Пір салаазын на кизібіскебіс, азаан, тізең, наа аппарат полызиинаң ал халғабыс. Ағаа хоза, вакуум терапиязының аппарады хан ойлапчатхан тамырлардағы сайбалған орыннарны имнирге полысча, - чоохтаан Александр Викторович.
Алында, вакуум терапиязы аппарадынаң кізілерге иң чағын Хызылчардағы имнег туразында имненерге килісчең. Амды андағ чорыхха чӧрерге киректелбинче, Ағбанда республиканың имнег туразында имнепчелер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде