ХАБАРҶЫЛАРНЫ ПІРІКТІРІП...
21.11.2018
Хабарлар
Россияның журналисттер пірігізіне - 100 чыл. 13-14 ноябрьда Москвада пайрамнығ мероприятиелерде Хакасияның хабарҷылары араласханнар.
100 чыл. Ол уғаа кӧп тус! Хазна тархынын алза, хайдағ тустарны тобырарға киліскен Россияа 1918 чылдаң пасти амға теере. Хабарҷылар, тізең, ол киректернің сын киречілері полчалар! Хазнабыстың журналистиказына 300 азыра чыл саналча. Аның тархыны «Ведомости» газетаның пастағы сығарызынаң пасталча. Че тиксі хазна хабарҷыларының пірігізі позының тоғызын 1918 чылның 13 ноябрьынаң пастаан, хаҷан Тиксі Россиядағы хабарҷыларның пастағы съезді иртірілген...
Россияның журналисттер пірігізінің (СЖР-ның)100 чылына чарыдылған пайрамнығ мероприятиелеріне тиксі хазнадаң, ол, тізең, 85 регион, паза хонҷых хазналардаң 1500 азыра хабарҷы чыылысхан. Хакасиядаң Москвазар пар килерге 12 кізее оңдай пирілген. Делегациянаң республиканың хабарҷылар пірігізінің кнезі
Ольга Ширковец устаан.
13 ноябрьда хабарҷыларға федеральнай министерство-ведомстволарда паза редакцияларда тоғазығлар иртірілген. Хакасияның хабарҷылары Россияның істеніс паза социальнай арачыланыс, экономика тилізі министерстволарында пол килгеннер. Істеніс министрінің пастағы орынҷызы Алексей Вовченко министерство араласчатхан «Демография» паза «Повышение производительности труда и поддержка занятости» национальнай проекттердеңер чарыда чоохтап пирген паза хабарҷыларның сурығларына нандырған.
14 ноябрьда Россия армиязының Ӧӧн академическай театрында СЖР-ның 100 чылына чарыдылған пайрамнығ мероприятие ирткен. Республикабыстаң парған хабарҷылар пасхазының хайиин хакас оңдайлығ чазанҷыхтарынаң тартханнар.
Ипчілер сигедектер, поғолар кис салғаннар, иреннер хоосталған хамзоллығ полғаннар. Пастағы алғыстас сӧзі Россия президентінің администрация устағҷызының орынҷызы Сергей Кириенкоға пирілген. Ол президенттің алғыстазын читірген. Ідӧк СЖР-ға Дмитрий Медведевтің, Вячеслав Володиннің паза пасха улуғ пастыхтарның адынаң чылығ сӧстер читірілген. Че хабарҷыларны Москваның мэрі Сергей Собяниннің алғыстазы иң тың ӧріндірген. Ол СЖР-ның кнезі Владимир Соловьевха Журналисттернің ӧӧн туразын тиксі тыхтирына 300 миллион салковайға сертификат читірген. Аарлығ сыйых ӱчӱн Москва мэрін хабарҷылар ізіг айа сабызынаң алғыстааннар.
Хайди піс таныхтаабыс, 100 чыл - ол СЖР-ның на нимес, тиксі хазнанын тархыны. Концертте хазнаның паза халых пірігізінің тархыны театр кӧзідіглерінде піріктірілген. Аразында саблығ ырҷылар паза ӧмелер сых турғаннар: Лариса Долина, Олег Газманов, Ярослава Дегтярёва, Турецкийнің хоры паза пасхазы.
Иң танығлығ кирек - Россияның журналисттер пірігізінің аарластығ сыйыхтарын читірері - соона артызылған. Хабарҷыларны «Журналистика легендазы», «Россияның алтын перозы», «Чыл медиаменеджері», «Профессия узы ӱчӱн» номинацияларҷа чеестееннер. «Журналистика легендазы» атха турысхан Россияның журналисттер пірігізінің аарластығ кнезі Всеволод Богданов. «Россияның алтын перозы» премияны алғаннар санында НТВ телеканал ведущайы Ирада Зейналова, «Известия» газетаның хабарҷызы Дмитрий Соколов-Митрич паза пасхазы.
Хакасияның хабарҷылары танығлығ мероприятиеде пол килгеннеріне ӧрінчелер. Чоохтирға кирек, ыраххы чорыхха хабарҷылар Россияның журналисттер пірігізінің паза спонсорларның полызиинаң чӧргеннер. Пайрамнығ мероприятиенің спонсоры «Норникель» компания полча. Делегация устағҷызы Ольга Ширковец паза араласчылары СЖР-ның 100 чылына чарыдылған пайрамнығ мероприятиелерде аралазарға Москвазар пар килерге оңдай пирген прай кізілерге, организацияларға алғызын читірчелер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы