«КІЧІГДЕГІ ЧӀЛИ ХОЛ МАТАП КӦДІРГЕБІС»
12.02.2019
Хабарлар
Аймах чылларда школа тоосхан улус піди чыылысхан
Школа тоосханнарның тоғазии. Пӱӱл ол азығ айының ікінӌі кӱнінде ирткен. Чоғархы Асхыстағы школазар чон ідӧк кӧп чыылысхан.
Чоғархы Асхыстағы ортымах школаны тоосханнар аалдағы пасталығ класстар школазынзар чыылысханнар.
Тоғазыға килгеннернің иң улуғлары пістің класстағылар полған. Піс 1969 чылда школа тоосхабыс. 1959 чылда пастағы классха 40 азыра пала килген. Пастап пісті пасха-пасха ӱгретчілер ӱгреткеннер. Соонаң Екатерина Трофимовна Кызласованың холына пирілгебіс. Школаны, 10 классты чізе, 18 пала тоосхабыс: 12 хызыҷах, 6 оолах. Хызыҷахтар - Аля Ахпашева, Света Майнагашева, Люба Сунчугашева, Пелагея Ахпашева, Тамара Угдыжекова, Надя Сунчугашева, Фая Санзараева, Фая Угдыжекова, Мария Артамонова, Зоя Алагашева, Клава Киргинекова, Люда Сунчугашева. Оолахтар - Слава Сунчугашев, Саша Тинников, Миша Чочиев, Юра Шипеев, Валера Угдыжеков паза мин.
Тоғазығда, тізең, тӧртӧлең не полғабыс: Тамара Угдыжекова, Пелагея Ахпашева, Людмила Сунчугашева паза мин. Пасхазы кил полбиндыр, піреезі испеен дее полар. Че сын чирзер парыбысханнар парох.
Ӱгретчілер матап тимнентірлер. Коридорда сомнар илееде полғаннар. Иргі сомнарда школабысты сабландырған ӱгренҷілер. Оларның аразында Михаил Николаевич Угдыжековтың сомы. Ол Чоғархы Асхыстағы школаны азарында кӧп тоғыс иттір.
Тоғазығ иирін апарған Елена Валентиновна Окунева сӧс пирген школа устағҷызы Вадим Константинович Мамышевке. Ол пісті піди ааллап килген ӱчӱн алғыстаан паза даа кӧп чылығ сӧстер чоохтанған.
Анаң школа тоосханнарға чоох пиргеннер. Олар, соон сӱрістіре сығып, алғыс сӧстерін читіріп, ӱгретчілерге, школаа улуғ нимес сыйыхтар читір турғаннар. Аразында пасталығ класстың ӱгренҷілері піске постарының чайаачыларын кӧзіткеннер - ырлааннар, теелбек салғаннар.
Елена Валентиновна ойын оңдайынаң піснең уроктар иртірген. Математика предмедіне килістіре таптырғастар пирче, піс нандырчабыс. Нандырар алнында хол кӧдірерге кирек. Иң пурнада нандырыбызар ӱчӱн, кічігдегі чіли холларыбыс чоо сӧӧ тартчабыс. Полған на сурыға орта нандырыбыссаң, пис балл алчазың.
Сарыннар урогында хынығ пол чӧрібіскен. Сарыннарны орта пілгені анҷох, че ырлабызарға кирек, тооза даа полбаза, че пір чардых хайди даа ырла. Пілбинчезің - утыр салчазың.
Іди уғаа хынығ ирткен пу тоғазығ иирі. Марығлар ирт парғанда, чоохтазып-хабарлазып, нинҷе дее одырыңар тееннер школа устағҷылары. Удаа тоғаспинчатханда, чоохтасчаң чоох кӧп нооза. Илееде ниме сағысха кирчезің.
Андағ даа полза, аны-мыны сурбин халғанын соонаң сағысха кирчезің. Телефон номерлерін дее алызып аларға сағыс читпиндір.
Пісті піди чыып, хынығ иир иртірген ӱчӱн, Чоғархы Асхыстың ӱгретчілеріне улуғ алғыс. Оларның пістең дее пасха ӱгренҷілері кӧп нооза. Тоғыстары ӱзілбинче, чыл сай наа олғаннар школаа килчелер. Хайзынаң даа тіл алыс пілерге кирек. Оой ла тоғыс нимес.
Нина Антоновна Амзараковаа алғызым читірчем. Ол, минің телефоным таап, мағаа сығдыратхан. Мин анаң хада ӱгренгеннеріме сағба идерге кӱстенгем.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы