ЧИР-СУҒНЫ ӰГРЕНЕР, ПОС ТУСТЫ ТУЗАЛЫҒ ИРТІРЕР ОРЫН
23.02.2019
Хабарлар
Аал библиотеказы. Виктория Анатольевна Кокова Чоохчылдағы культура туразының устағңызы полча. Олох библиотекарьның тоғызын толдырча
ТАРХЫННАҢ ПӰӰНГІЗЕР
Библиотекарь тоғызы пурунғы профессияларның пірсіне саналчаттыр, ағаа тӧрт муң чарым чыл артиинаң полтыр. Пастағы библиотекарьларға той табличкаларда пічіктер пасчатхан кізілер саналғаннар. Кӧп чыл аразына той, тос, ағас чардылары паза чаңын орнына чуртасха пӱӱнгі кӱңдегі технологиялар кирілгеннер. Ідӧк тиңнестірерге чарир амғы библиотекарьның тоғызын мының алнындағызынаң. Хаҷан-да олар книгаларны, чыып, санға алып, хығырығҷыларға читірҷеңнер.
Амғы туста чонның книга хығырарына тартылғаны тӧбін синге тӱс парғаны хайхастығ нимес. Чиит тӧл Интернетнең паза гаджеттернең тузаланча. Олар книгадаң пілістер аларын чуртастаң хыйа идіп одырчалар. Че кізі книганы хаҷан даа аарлаан. Аннаңар олар чох халас чох чуртас полар чіли пілдірче. Чон хығырар
ӱчӱн, олар библиотекаларда хайраллалчалар.
Совет тузында кӧп ыраххы аалда библиотекалар, тӧстеліп, тоғынып пастааннар. Ӧӧнінде Илбек Ада чаа соонда оларның саны кӧптелген осхас. Пастағы тоғынҷылар 5 - 10 книгадаң даа библиотекаларын пайыдып одырғаннар. Хайдағ ол книгалар полған полҷаң, амды пілерге дее чапсых.
Пӱӱнгі библиотекаларға, хығырығҷыларның санын хозар ӱчӱн, амғы тусха килістіре тоғыс апарарға киректелче. Че аалдағы библиотекалар компьютер технологияларына пай тіп полбассың.
СЕМЁН КАДЫШЕВТІҢ АДЫНАҢ БИБЛИОТЕКАДА
Шира аймаандағы Чоохчыл аалның библиотеказы орындағы культура туразында орныхча. Аймахтың Чоохчылдағы библиотека пӧлии пастағызын 1953 чылда азылтыр. Анда Мария Николаевна Кокова тоғынған. 1957 чылда, наа клуб азылғанда, аның чардығында библиотекаа орын пирілген. 1967 чылда чыындаа 7607 книга кірген. Кӧп чыл анда Татьяна Ивановна Аёшина маңнаныстығ тоғынған. Ол тоғызына саңай пирін салған ипчі полған. Аннаңар аны кӧп хати хазна сыйыхтарынаң таныхтааннар.
1997 чылдаң сығара орындағы библиотека Семён Прокопьевич Кадышевтің адын ал чӧрче. Амды анда библиотекарь тоғызын Чоохчылдағы культура туразының устағҷызы Виктория Кокова толдырча. Пір турада орныхчатхан культура учреждениелерінің тоғызы хада-пірге апарылып одырча тиирге чарир. Виктория Анатольевнаның сылтаанда библиотека книга ла пирҷең орын полбинча. Амды анда сыбыра тоғынчатхан чарых пулуңастар пар, наа кӧзідіглер турғызыладыр, аалдағы олғаннар «Кӧклӧ» клубсар чӧрчелер, чоох-чаахнаң одырарға ууҷалар кіредір. Аалдағы библиотека, клуб чіли, халых паза культура чуртазының кіні полча. Ідӧк анда книгаларны ибзер аларға чарир. Библиотека Культура туразынаң паза школанаң хада тоғыс апарча. С.П.Кадышевтің адынаң библиотеказар олғаннар хынып чӧрчелер. «Кӧклӧ» клуб араласчылары аймах ойнаҷахтарны тимнепчеттірлер. Поғоларны хоостапчалар, хыплапчалар алай ба нинҷі салчалар. Оларның тимде кӧклӧлері алынҷа пулуңаста турғлапчатханнар.
Ікі пӧлікке чарылчатхан библиотеканы Семён Прокопьевич Кадышевтің улуғ портреді чазапча. Хайҷаа чарыдылған пічіктер чыындызынаң хығырығҷаа танызып алар оңдай пар. «Хакасия Россияны чазапча», «Тӧреен чирім - Хакасия», «Чуртас» пулуңастар библиотека істін чазапчалар. Виктория Анатольевнаның чооғынаң, «Чуртас» пулуңасты 2011 чылда гранттар мариин утып алған сылтаанда тимнеп алғаннар. Грант ахчазына компьютер, принтер, столлар, стеллажтар паза литература алғаннар.
Прай пу нимелер библиотекаа хаҷанох киректелгеннер. Че Интернет палғалызы чохта, модем пастыра тоғындырчалар осхас.
Библиотеканың чыындызында пӱӱнгі кӱнде 9 муң артиинаң книга саналча. Піди сағын кӧрзе, парчан пу книгаларны пір кізее хығырып алар оңдай пар ни? Чох, чоғыл сағынчам. Хығырығҷы книганы пос хынғанни таллап алча нооза. Саңай хығырбас кізіні, тізең, хамҷылап таа хығырт полбассың. Библиотека книгаларның ӧргезі паза культураның улуғ чардығы полча.
Сеерчектерге толдыра турчатхан книгаларның аймаа харах ойнатча. Пілдістіг, мында иргі книгалар кӧп, ідӧк нааларның саны ас нимезӧк. Хоос литератураның аймаа парох. Аймах кӧстеглерҷе литература аал хониина, имнег киреене, иб аразындағы кирексіністерге, істеніс экономиказына паза пасха тузалығ нимелерге чарыдылчалар. «Хабар», «Хакасия», «Ширинский вестник» газеталар паза Россия синінде сыхчатхан ӱс журнал алчаттырлар.
Амғы библиотекаларның ӧӧн тоғызы чон пілізін, культура кибірлерін хайраллап халарына айлан парған. Кічіг дее аалдағы библиотека, орындағы тархынны чыып, хайраллап, тӧллерге халғысча. Аалда культура ис-пайы тӧріпче, чон кибірлері хайраллалча. Чоох-чылдағы библиотека тоғынҷызы чир-суғны ӱгренҷең киректі сыбыра апарча. Тархын паза пӱӱнгі кӱннің ӱзілбес палғалызын олар толдырчалар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде