ИҢ АРТЫХТАРЫ ЧЫЫЛЫСТЫ
27.02.2019
Хабарлар
Спорт. Суғҷа чӱзерінӌе Сибирьдегі федеральнай округтың чемпионады паза первенствозы «Ағбан» спорткомплекстің бассейнінде пасталыбысты. Анда улуғлар паза чииттер араласчалар.
Марығ азарында араласханнар Ағбан город пазы Николай БУЛАКИН паза Хакасия пазы орынӌызының тоғызын толдырчатхан Татьяна КУРБАТОВА.
КИҶЕЕ, 26 ФЕВРАЛЬДА, «АҒБАН» СПОРТКОМПЛЕКСКЕ КІРЧЕТКЕН БАССЕЙНДЕ СФО МАРИИ ПАСТАЛҒАН. ПІСТІҢ ГОРОДСАР СИБИРЬДЕГІ ФЕДЕРАЛЬНАЙ ОКРУГТЫҢ ИҢ ЧАХСЫ СПОРТСМЕННЕРІ КИЛДІЛЕР. АМДЫ ОЛАР 1 МАРТХА ТЕЕРЕ СУҒҶА ЧӰЗЕРІНҶЕ МАРЫҒЛАЗАРЛАР. СЫЙЫХТЫҒ ОРЫННАРҒА СЫХХАННАРЫ РОССИЯ ЧЕМПИОНАДЫНДА ПАЗА ПЕРВЕНСТВОЗЫНДА АРАЛАЗАРЛАР. АННАҢАР АРҒА-МӦРІЙ УҒАА ХАЗЫР ОҢДАЙДА ИРТЕР.
УЛУҒЛАР ПАЗА ЧИИТТЕР АРАЗЫНДА СФО МАРИИН ПАЙРАМ КИБІРЛИ АСЧАТХАНДА, ОРГКОМИТЕТ КНЕЗІ, АҒБАН ГОРОДТЫҢ ПАЗЫ НИКОЛАЙ БУЛАКИН ПРАЙ СПОРТСМЕННЕРНІ, ТРЕНЕРЛЕРНІ, КӦРІГҶІЛЕРНІ МЫНДАҒ СПОРТ ПАЙРАМЫНАҢ ЧЫЛЫҒ АЛҒЫСТААН. НИКОЛАЙ ГЕНРИХОВИЧТІҢ СӦСТЕРІНЕҢ, ПӰӰЛ АҒБАНЗАР УҒАА КӦП КІЗІ КИЛДІ - 1000 АРТИИНАҢ. ПЕЕР СПОРТСМЕННЕР, ОЛАРНЫҢ ТРЕНЕРЛЕРІ, МАРЫҒ ЧАРҒЫҶЫЛАРЫ, КОМАНДА УСТАҒҶЫЛАРЫ КІРЧЕЛЕР. АННАҢАР ОРГКОМИТЕТКЕ, ПУ АРҒА-МӦРІЙНІ ПӦЗІК СИНДЕ ИРТІРЕР ӰЧӰН, УЛУҒ ТИМНЕГЛІГ ТОҒЫС АПАРАРҒА КИЛІСКЕН.
Марығ араласчыларынзар алғыстас сӧстерінең айланғаннар, ізестіг чиңістер тударға алғааннар Хакасия пазы орынҷызының тоғызын толдырчатхан Татьяна Курбатова, Россияның суғҷа чӱзерінҷе федерациязының кізізі Сергей Кашников.
Таныхтирға кирек, суғҷа чӱзерінҷе СФО марии пістің городта пӱӱл пизінҷі хати иртірілче. Ағбандағы бассейн Сибирьде иң чахсылар санына кірчеткені уғаа ӧріністіг. Кирек іди ле парза, «Ағбан» спорткомплексте мыннаң даа улуғ марығлар иртіріп пастирына ізенербістер.
Хабарҷыларнаң алынҷа тоғазығ полғанда, марығның ӧӧн чарғыҷызы Екатерина Приезжева мындағ саннарнаң таныстырған. Арға-мӧрійде прай 455 спортсмен араласча. Олар Сибирьдегі федеральнай округтың сигіс регионынаң чыылысханнар. Улуғлар аразында постарының тимненістерін сыныхтапчатханнар хайди даа пастағы разрядтығ поларға киректер. Че мында ӧӧнінде спорт устары паза спорт узына кандидаттар. Чоннар аразындағы класстығ спорт устарының саны 14 тиңнелче. Олар Россия, Европа паза тилекей марығларында араласхан, сыйыхтығ орыннарға сыххан спортсменнер.
- Пу марығлар тоозылза, 11 мартта Ағбанзар пазох чииттер чыылызарлар. Ол марығ Ағбан город пазының сыйии ӱчӱн «Сибирь Кубогы» адалча. Пістің чииттерібіс анда сыбыра араласчалар, -таныхтаан хабарҷыларнаң тоғасхан туста Николай Булакин.
Аның сӧстерінең, городта мындағ чахсы, тиксі Сибирьде ле нимес, хазна синінде махтаға сыхчатхан бассейн пӱдірілгенде, марығлар удаа иртіріп, спорт устарын кӧбдин тимнирге кирек. Чииттернің устары, тізең, мындағ марығларда ла удаа араласса, чахсы ӧзер. «Сибирь Кубогы» марығ араласчыларының саны уламох кӧп полҷаң осхас. Пістің чир-суғҷыларыбыс таа чиңістер тударына, кӧрігҷілерні ӧріндір турарына ізеніс пар.
Аалҷыларны чылығ удурлирға, арға-мӧрій тузында пӧзік чидіглерге чидер чахсы оңдайлар тимниріне кӧнік парған оргкомитет пӱӱл дее андағ-мындағ сайбағлар чох тоғынча тиирге чарир. Спортсменнер тынағ-маң тустарын орта, тузалығ иртірері алынҷа программада кӧріл парған. Пасха орыннардаң пістің городсар килген аалҷылар Ағбанның танығлығ орыннарынаң хайди даа чағын танысхлап алчалар. Нинҷе кізінең мындағ марығлар тузында чоохтазарға, сурастырғлирға килісче, оларның прайзы даа сала ла пір ӱннең нимес ас-тамахты тың махтапчалар.
Суғҷа чӱзерінңе СФО марии пайрам кибірли азылғанда, спортсменнер постарының устарын сынап пастабысханнар. Хайди таныхталған, пу арға-мӧрійде улуғлар паза чииттер араласчалар. Мында сыйыхтығ орыннарға сыххан спортсменнер Россия чемпионадында паза первенствозында постарының устарын сынирға тимненіп пастирлар. Аннаңар Ағбандағы бассейнде суғ «хайниры» ӱр нимеске дее тохтабин турар. Хайдағ даа команда, постарының спортсменнерін чиңіске кӧӧктіріп, матап хысхырысча.
Пір командаа 50 - 100 кізі аларға чарадылча. Аннаңар Ағбанзар анҷа кӧп спортсмен килгені таныхталча. Ағбанның командазында пӱӱл 40 кізі саналча. Оларның піреезі сыйыхтығ орынға сығып аларына ізенерге халча. Чир-суғҷыларыбыс санынаң Дарья Мочалкина даа, Антон Брагин даа, мындағ марығларда аралазып, спорт устары полыбысханнар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде