ФЕДЕРАЦИЯ ЧӦБІНДЕ ТОҒЫНҶАҢ КІЗІ ТАБЫЛДЫ
01.03.2019
Хабарлар
Оӧркі Чӧп сессиязы. Депутаттар Хакасия пазына орыҷыларын турғызарға чарадығ пиргеннер паза Россияның Федерация Чӧбінзер сенаторны тапханнар.
Оӧркі Чӧп сессиязы. Депутаттар Хакасия пазына орыҷыларын турғызарға чарадығ пиргеннер паза Россияның Федерация Чӧбінзер сенаторны тапханнар.
Хакасияның Ӧӧркі Чӧп депутаттары 27 февральда теестегі сессияа чыылысханнар. Сессия Ӧӧркі Чӧп кнезі Владимир Штыгашевтің устаанынаң ирткен. Аның тоғызында Хакасияның пазы Валентин Коновалов, Россияның Хазна Думазының депутады Надежда Максимова, республика правительствозының кізілері, город-аймахтарның пастары паза депутаттары араласханнар.
Пастағы ӧӧн сурығлар санында Хакасия пазының ікі орынҷызын чарадары полған. Республиканың Конституциязы хоостыра оларны турғызарына Ӧӧркі Чӧп чарадығ пирерге кирек. Кандидатураларнаң Валентин Коновалов позы таныстырған. Хакасия пазының социальнай политика сурығларынҷа орынҷызына Татьяна Курбатованың кандидатуразы сығарылған. Ол ӱгредии хоостыра ӱгретчі, Ағбандағы ӱгретчілер институдын тоосхан. Ағбан пилтіріндегі школаның директоры, анаң Ағбан пилтірі аймаа пазының орынҷызы полған. Ідӧк Ағбан пилтірі аймааның депутаттар чӧбінің кнезі полып тоғынған.
- Татьяна Анатольевнаның ӱгредіг сферазында опыды пар, - таныхтаан Хакасияның пазы Валентин Коновалов, депутаттарның алнында чоох тудып. - Депутаттар паза муниципальная пӱдістер пастарының кӧбізі аны чахсы таныпча. Амғы туста Хакасия пазы орынҷызының тоғызын толдырча, кандидатуразына чарадығ пирерге сурынчам.
Ӧӧркі Чӧп депутаттары Татьяна Курбатовадаң тоғыр полбааннар, ӱн пиріс салтарларынҷа (ӱчӱн - 36, тоғыр -9, тудыныбысхан - 1) республика пазының орынҷызына турғызылған.
Чарадығ алыл парған соонаң Валентин Коновалов теестегі орынҷызына кандидатуранаң таныстырған. Ха-касияның пазы ЖКХ сурығларынҷа орынҷызына Юрий Курлаевті турғызарға чӧпнең сыххан.
- Юрий Николаевич - чонға ідӧк чахсы таныс кізі, -искірген регион устағҷызы. - Істеніс чолын Пии аймааның «Бондарев» совхозында пастаан. Ӱр тус Бондарев аал чӧбінең устаан, 2009 чылдаң сығара - Пии аймааның пазы.
Депутаттар кӧбізі ӱннең (ӱчӱн - 28, тоғыр - 15, тудыныбысхан - 3) аның кандидатуразына чарадығ пиргеннерӧк.
Мының соонаң иң таластығ сурығның теезі чит килген - Россияның Федерация Чӧбінзер Ӧӧркі Чӧптің кізізін табары. Таныхтирға кирек, полған на регион Федерация Чӧбінзер ікі кізіні таапча: пірсін - толдырығлығ ӱлгӱдең сығара (кемні турғызарын регион устағҷызы позы таллапча), ікінҷізін - закон сығарҷаң ӱлгӱдең сығара (Ӧӧркі Чӧп сессияда таапча). Валентин Коновалов, ирткен чылның ноябрь айында чарадығ алып, Федерация Чӧбінзер тоғынарға Ӧӧркі Чӧп депутады полған Валерий Усатюкты (КПРФ) ызыбысхан полза, Ӧӧркі Чӧптең сығара сенаторны табары, нымзах чоохтаза, сӧӧ тартыл парған. Сенаторны ирткен чылдох, табығлар соотаң, таап саларға киректелген. Че октябрьдағы сессияда Ӧӧркі Чӧп депутаттары кандидатура хоостыра пір чӧпке кил полбааннар, 2006 чылдаң сығара сенатор полып тоғынған Евгений Серебренниковха («Единая Россия») 49 депутаттаң 20 ле депутат ӱнін пирген.
Амды Ӧӧркі Чӧп пу сурығзар хати айланған. Нинцеде ай соонаң кӧп партиядаң пӱтчеткен Ӧӧркі Чӧп, хайди полза, ікі кандидатурада тохтабысхан: «Единая Россиядаң» - Александр Жуков, ЛДПР-даң - Валерий Старостин. Пу сессияда пу ікі кізідең хайзында сенаторға табарға киректелген.
- Федерация Чӧбінзер Ӧӧркі Чӧптің кізізін табарынҷа ӱн пиріс чазыт оңдайнаң иртірілче, - искірген Ӧӧркі Чӧп кнезі Владимир Штыгашев. - Электроннай система пастыра алай чаҷыннығ бюллетеньнер полызиинаң. Хайдағ чӧптер полар?
ЛДПР депутады Татьяна Янусик чаҷыннығ бюллетеньнернең, тузаланып, ӱн пирерге чӧпнең сыххан, «Единая Россия» депутады Валерий Кяри - электроннай оңдайнаң. Депутаттарның кӧбізі бюллетеньнер ӱчӱн ӱнін пирібіскен. Аннаңар Ӧӧркі Чӧпке сананыс комиссиязын тӧстирге киліскен. Андар Алексей Нежевец («Единая Россия»), Ольга Ширковец («Патриоты России»), Татьяна Янусик (ЛДПР) паза Софья Колмакова (КПРФ) кирілгеннер.
Кандидаттар, Ӧӧркі Чӧп депутаттары алнында чоох тудып, постарынаңар чоохтааннар паза Федерация Чӧбіндегі сенатор хайди то-ғынарға кирек полчатханынаңар сағыс-кӧрістерінең ӱлескеннер. Абазадағы рудниктің директоры, Ӧӧркі Чӧп депутады Александр Жуков Федерация Чӧбінде республиканың сидіксіністерін істінең пілчеткен паза муниципальнай тоғыста опыды пар кізі (ол 2009 -2014 чылларда Сорығ городтың пазы полып тоғынған) тоғынарға кирек полчатханын таныхтаан.
- Андағ опыт минің пар, - искірген ол. - Кандидатха сығарылған тустаң сығара мин сірернің полғаныңарнаң на тоғасхам, прайзыңарнаң піс пір тіл тапхабыс. Республика федеральнай кіннің хабазии чох тиліп полбас. Мин, Федерация Чӧбінде тоғынып, республиканың кирексіністері ӱчӱн турызарға тимдебін. Прай фракцияларнаң чӧптезіп тоғын турарбын.
Ӧӧркі Чӧп депутады Валерий Старостиннің кӧрізінең, Федерация Чӧбі чахсы законнарға чол пирчеткен, хомайларны тохтатчатхан фильтр чіли тоғынарға кирек. Аннаңар анда законнар сығарарынҷа опыды пар кізі тоғынарға киректелчеткенін таныхтаан.
- Мин халғанҷы 10 чыл тоғынғам мында (Ӧӧркі Чӧпте
- ред.), - айланған депутаттарзар ол. - Прайзынаң ӱгренгем паза ам даа #ӱгренерге тимдебін. Федерация Чӧбінің кізізі хайди даа Ӧӧркі Чӧптің тоғызында, республиканың чуртазында ӧткін аралас турарға кирек тіп санапчам. Че иң не ӧӧні - хайдағ тоғыс иткенінеңер сан пиріс ит турарға.
Чазыт оңдайнаң ӱн пиріс. Сананыс комиссиязы салтарларны искірче: ӱн пирісте араласхан 46 депутат, 9 бюллетень сын нимеске саналған, Александр Жуковтың ӱчӱн
- 26 ӱн, Валерий Старостиннің ӱчӱн - 11. Андағ оңдайнаң Федерация Чӧбінзер Александр Жуков табыл парған.
- Александр Аркадьевич Хакасияның кирексіністері ӱчӱн турыстығ турызар тіп санапчам, - чоох тудып, таныхтаан Владимир Штыгашев. - Сенатор кізінің хылии аймах кӧрімніг поларға кирек, ол санда махачы даа. Киртінчем, аның андағ хылии пар. Аннаңар Хакасия чуртағҷыларының сурығларын паза сидіксіністерін федеральнай синде истіп саларлар тіп ізенчем. Александр Аркадьевичке тӱзімніг тоғынарға алғапчабыс.
Сессияның пасха сурығлары республика законнарынзар алызығлар кирерінең палғалыстығ полған. Алызығлар ӧӧнінде федеральнай законодательство алыс парғаны хоостыра кирілгеннер. Халғанҷы сурығ, тізең, «правительство чазы» полған. Пу хати ол республика ӱлгӱлері часхыдағы суғ тазар паза ӧрттер сығызар тусха хайди тимненчеткеніне чарыдылған.
Хакасияның ГО, ЧС паза ӧрттең арачыланарынҷа устаа пастығы Николай Старковтың искіриинең, амғы туста муниципальнай пӱдістернің часхыдағы суғ тазарына тимненізі сыныхталча, суғларда хорғыс ағылчатхан орыннар ілезіне сығарылча паза кирек орыннарда пусты харалтар, чара чачырадар тоғыстар иртірері кӧрілче. Гидротехническай пӱдіріглерні сыныхтир тоғыстар пасталыбыстыр. Сағыбаан саайларны чох идерінде араласчаң кӱстер паза техника азынада кӧріл партыр.
- Анзынаң пасха сағыбаан саайларға Хакасия правительствозының резерв чыындызы тӧстелген, - искірген Николай Старков. - Аның сині - ӱс миллион салковай паза орындағы пос устаныс органнарында 26 миллион салковай артиинаң.
Ӧрттер сығызар тусха тимненіс ідӧк план хоостыра апарылчаттыр. Кӧйчеткен отты тохтатчатхан минерализованнай полосаларны нааҷылиры, ӧрт ӱзірҷеңнерге суғ алҷаң орыннарны сыныхтиры паза пасха даа тоғыстар прай кӧріл партыр.
- Правительство ӧрттең арачыланарынҷа тоғыстарны азынада иртірче, че пістің сағыбаан саайлар удаа кинетін сығыс килчеткенін ундирға чарабас, - таныхтаан Ӧӧркі Чӧп кнезі Владимир Штыгашев. - Мин кӱскӱзін прай даа город-аймахтарҷа чӧргем. Кирек уйан, дачаларның паза олаңай ағас тураларның кӧбізі пуртах отха пастыр салған. Тоғыс апарылча, анзы чахсы. Че аймахтарның паза городтарның устағ-пастаан пу сурыға хайиин тартарға кирек.
Депутаттарның пасха даа чӧптер пар полған, оларны, прай чыып, Ӧӧркі Чӧптің республика правительствозына чӧп пирчеткен чарадиинзар кир салғаннар. Мыннаң сессияның тоғызы тоозылған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы