СУҒЛАР ТАЗАРЫНА ТИМНЕНІС
05.03.2019
Хабарлар
Чыылығ. Хакасия пазы Валентин Коновалов сағыбаан саайларҷа комиссия (КЧС) чыылиин иртірген.
Пӱӱнгі кӱнде республика суғлар тазар паза ӧрттер сығар тусха тимненче. Чыылығның ӧӧн сурығлары ағаа теелген. Че пастап Харатаста чылығ пирҷең системада пол парған саай салтарлары чох иділчеткені ӱзӱрілген. Амғы туста ол саайның сылтаа істезілче. Саай пол парған участок хазнани нимес предприятие холында саналча. Анда тыхтағ тоғыстарын «ХакТЭК» ООО толдырча. 2017 чылдох системада сайбағлар ілезіне сығарылған даа полза, амға теере чылығ пирҷең сетьтер нааҷылалбааннар. Саайның ӧӧн сылтаа - сетьтер иргілен парғаны, аны хоостыра трубалар, чуға пол парып, таттап парғаны. Аннаң пасха, чылығ пирҷең системада тиксі тыхтағ тоғызы кӧп тус толдырылбаан.
Харатас ирткен чылда хысхы тусха тимненіс паспортын албааннаңар, анда тураларзар чылығ пирҷең тус хайди иртчеткенін прокуратура органнары сыныхтағда тутчалар. Декабрьдаң сығара городта чылығ пирҷең тус сағыбаан саай режимінде иртче. Харатас городтың прокуроры должностьтағы кізілерге представление ызыбысхан. «Хак-ТЭК» ООО-ның должностьтағы кізізі административнай нандырыға тартылған. Че саай тузында прай ведомстволар табырах тоғыныбысханы таныхталған. Республика пазы Валентин Коновалов сыныхтағ органнарына чылығ пирҷең сетьтерні хати сыныхтабызарға чахаан.
Ведомстволар аразындағы комиссия муниципальнай пӱдістернің суғлар тазар паза ӧрттер сығар тимненізін сыныхтапча. Прай муниципальнай пӱдістер профилактика мероприятиелер планын тимнеп салғаннар. Амғы тусха Ағбан, Алтай паза Ағбан пилтірі аймахтары сыныхтағны иртібіскеннер. Прай читпестер тузында чох иділчелер.
Саайлар тузында чонға ӱр нимес чуртаҷаң пункттар прай муниципальнай пӱдістерде тимде. Ол пункттарзар прай кирек ниме-нооларны читірерге, ааллар чӧптері пастарына старосталарнаң тоғынарға, чоннаң иртірілер тренировкалар планын тимнебізерге, чуртағҷыларға хорғыс чох правилоларны читірерге паза гидротехническай пӱдіріглернің (ГТС) страховказын узарадыбызарға чахығ пирілген. Ідӧк нинҷе-де ГТС-та тиксі тыхтағ тоғызы толдырылча. Амғы туста саайлар салтарларын чох итчеткен ӧмелерге оборудование толдыразынаң алылбаан. Ведомстволар Ағбан суғдағы пусты Хубачар паза Абаза хыринда чара чачырадарға тимненчелер.
Пӱӱнгі кӱнге ікі орында хуруғ от ӧртке хабылғаны санға алылған. Пӱӱл хар асхынахтаңар, ӧрттердең хорғыс ағылчатхан тус ирте пасталар. Хакасия пазы муниципалитеттер ол сурыға улуғ хайығ саларға киректер тіп таныхтаан. Кӧп аалда сағыбаан саайлардаңар искірчеткен системалар турғызылбаан. Патруль ӧмелерін хорғыс ағылчатхан тусха тимнирге кирек тіп таныхталған чыылығда.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде