ХАКАСИЯ ӰЧӰН ПӦЗІК СИНДЕ ТУРЫСЧАТХАН ХЫЗЬІӋАХТАР
30.04.2019
Хабарлар
Танығлығ кирек. Хакасия пазы Валентин Коновалов Асхыс аймаандағы хызыҷахтарның футбол командазынаң, правительство туразында тоғазып, чоох алысхан. Тиксі Россиядағы мини-футболҷа марығның чиңісчілерін пӧзік синде чеестеділер.
Пістің «Хабар» газетаның хабарҷызы Михаил Идимешевтің «Хайдағ ынағ чонзар» минифутбол мариинаңар статьязы апрельнің пастағы кӱннерінде сыххан. Анда Михаил Асапович Москвада ирткен марығлардаңар, пос хараанаң кӧрген чіли, уғаа чахсы пас салған. Аның ӱчӱн хығырығҷылар алғыс сӧстерін читірчелер. Пу кӱннерде редакциязар Саяногорсктың чуртағҷызы, боксча тренер Виктор Кочелоров кірген. Олғаннарны спорт киреене кӧніктірчеткен тренер, ол статьяны хығырып, харах чазым тоолаан теен.
Кӧп кізі, матыр футболист хызыҷахтардаңар піліп алып, чӱрексеен полар. Ізе, сыны пӧзік нимес хызыҷахтар командазы, тиксі Россия мариинда прайзын хыра утып, пастағы орын алған. 2008-2009 чылда тӧреен хызыҷахтар «Мини-футбол - школаа» Россия проектінде араласханнар. Финал ойыннары парчатханда, Хакасияның командазы, Москваның «Коммунарка» командазынаң тоғыр ойнап, 2:0 саннаң утып алған.
Чиңісчілерні Хызылчар аэропортында удурлап чеестееннер. Анаң, ибзер читкенде, аймах синінде оларны алғыстааннар. Че Хакасияның пазы Валентин Коновалов пістің редакциязар хабарҷыларнаң тоғазарға кил парғанда, Калининдегі ортымах школа ӱгренҷілерінең правительствода тоғазығ иртірердеңер сурыныс полған. Валентин Олегович тоғазығ пу чағында полар тіп пісті ізендірген.
25 апрель футбол ойнапчатхан хызыҷахтарға пазох ла танығлығ полды. Командаа кірчеткен читі ӱгренҷіні Хакасияның правительство туразында, удурлап, чеестееннер.
- Сірернең мындағ тоғазығ иртірілчеткеніне ӧрінчем! - теен Валентин Коновалов. - Сірер тиң частығларға паза футболист хызыҷахтарнаң паза іҷе-пабаларынаң хада пасхазына хайди чиңіске чидерін кӧзіт пиргезер. Сыннаң даа, сидік марығда араластырзар. Че сірер, азынада тимненіп, тренировкаларға чӧргезер. Пӧзік синде иртірілчеткен пасха даа марығларда республика ӱчӱн турызарға тимдезер. Саблығ спортсмен полары кічігдең нооза. Улуғ алғыс сірерге пӧзік чидіг ӱчӱн!
Валентин Коновалов Хакасия правительствозы адынаң аарластығ пічіктер паза сыйыхтар читірген. Чахсы тоғынчатхан, профессиональнай узы паза тиксі Россия проекті «Мини-футбол - школаа» марығда чиңіс тутхан ӱчӱн, аарластығ пічік Калининдегі ортымах школаның физкультура ӱгретчізі Валентин Иванович Тормозаковха читірілген. Пӧзік чидіге читкен ӱчӱн, аарластығ пічіктерні футболист хызыҷахтар Айсили Сунчугашева, Амели Гринчук, Наталья Тумоякова, Екатерина Тюмерекова, Оксана Чучунова, Светлана Чучунова, Полина Шроо алғаннар. Ідӧк прайзына танығлығ сыйыхтар читірілген.
Алғыстастар соонаң Валентин Олегович прайзынаң хада сомға суурынған. Таныхтирға кирек, пу тоғазығда тренер Валентин Тормозаков Хакасия пазынзар школада спортзал пӱдір пирерге сурыныснаң айланған. Пӱӱнгі кӱнде оларның спортзал чоғыл. Спорт тренировкалары пасха ааллардағы спортзалларда иртчеттір. Валентин Коновалов пу сурығ хоостыра Хакасияның спорт министрінзер айланғаннаңар искірген. Мыннаң мындар спортзал пӱдірии апарылары кӧрілче.
Ӱгренҷілерге спортзал хайди даа кирек. Уламох пӧзік чидіглерге читчеткен кічіг олғаннар пар полза. Спортнаң, тренировкаларнаң айғазар алынҷа орын парынаң мыннаң мындархы чидіглер палғалыстығ нооза.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы