ТОҒЫНАР ОРГАНИЗАЦИЯЛАР САНЫ ХОЗЫЛДЫ
07.04.2020
Хабарлар
Ӱлгӱ. Хакасияда хосхар айының 12-ч,і кӱніне теере тиксі чонға ибдең сыхпас режимні узарадардаңар чарадығ алыл парған
- Республиканың аарлығ чуртағӌылары! Хакасияда коронавируснаң ағырыбысхан пастағы чуртағӌы, Германиядац айланған ирен, имненіп алған. Ол амды ибде. Ікі кізінің ағырии ниик оңдайнаң иртче. Че Россияның пірее регионнарында эпидемиология кирее уйан. Хакасияда киректі хомайландырбас ӱчӱн, ибде одырар режим хосхар айының 12-ӌі кӱніне теере узарадылар. Пӱӱн оперативнай штабтың теестегі чыылии ирткен. Амғы туста республика правительствозының чарадиина алызығлар кирілче. Санға алылар Роспотребнадзорның паза право хайраллаӌаң органнарның чӧптері. Хосхар айының 6-ӌы кӱнінең сығара істен полар предприятиелер паза организациялар саны алғыдылар. Сағам прайзыбыс тудынчабыс алындағы пӧзік тимненіс режимінеңер чарадыға.
Хосхар айының 6-ӌы кӱнінең сығара прай ӱгредіг учреждениелері ибдең ӱгредіге кірчелер. Ибдең ӱгренер оңдай чох орыннарда олғаннарға каникуллар тузы узарадылар.
Паза республикада эпидемиология кирее хомайланза, хатығластар хозылар. Хакасияның аарлығ чургатӌылары, пу ниик нимес туста полған на кізіні нандырығлығ поларға паза посты орта тудынарға хығырчам. Ибіркі чоннаң палғалысты хызырарға киректелче. Пос хазиинаңар сағынып, сірер туған-чағыннарыңны, арғыстарыңны ағырығдаң хайраллапчазар. Оңарарға кирек, ағырығның тарапчатханын піс хада ла тохтат поларбыс.
Роспотребнадзорның паза чуртағӌыларның чӧптерін санға алып, республикада тоғынарға чарадылчатхан организацияларның саны алғыдылған. Хосхар айының 4-ӌі кӱнінде Хакасия пазы Валентин Коновалов чарадығда хол салыбысхан.
Регион чуртағӌыларына ам даа ибдең сыхпасха чӧп пирілче, сығарға чарадылча, табырах (соона салдырбас) имнег полызии киректелчетсе алай чуртасха паза хазыхха хорғыс пар полза; пу чарадығ хоостыра организация тоғызы тохтадылбаан полза, тоғысха читіре парарға, ибге, гаражха алай дача участогына читіре парарға, ағырығ, алай социальнай хайығдағы туғанның соонӌа кӧрерге.
Чарадылча сӧп-сап сығарарға, чағынғы садығ туразында алай аптекада ниме-ноо аларға, турадаң 300 метр оортахта адайнаң чӧрерге. Палаларнаң хада, чурттаң 300 метр ырах парбин, тасхар чӧрерге чарир, олох туста пасха кізілерге 1,5 метрдең чағын чӧрбеске, алынӌа арачыланыс тиріглерінең тузаланарға.
Республикада пос транспортынаң чӧрерге чарир, че паспорт, тоғыс орнынаң справка алай парчатхан орынға, гаражха, дачаа алай пасха ис-пайға, пічіктер хада поларға кирек.
Москвадаң килгеннерге наа кирексініс кирілче. Хырығ озаринаң килгеннер чіли, олар хайди даа ікі неделя карантинде поларлар.
Хосхар айының 6-ӌы кӱнінең пасти прай ӱгредіг учреждениелері ибдең ӱгредіге кирілчелер. Техническай оңдайлар чох орыннарда каникуллар тузы узарадылар. Олған садтарына дежурнай ӧмелернің тоғызын узарадарға чӧп пирілген, че оларның тоғыс оңдайларын муниципалитеттер чаратчалар.
Прай хазна учреждениелері, МФЦ, чонға тоғыс табарынӌа службалар, ГАИ, ЗАГС паза пасхазы чуртағӌыларнаң азынада пазынған хоостыра тоғынарлар.
Президент чахиинда таныхталған кӧстеглер кӧрімнеріне, хайзыларына тоғынмас неделя режимі теелбинче, пу кӧрімнер хозылған: аал, ағас хонии, аңниры, палыхтиры паза палых ӧскірері; чир-чайаан ис-пайын аниры; ниме-нооны аннаң андар тимнирі; чарытхы, газ паза оор читірері; суғ читірері, сӧп-сап сығарары, кірні арығлирынҷа тоғыс; пӱдіріг; чуртағҷыларға нимес опт садии; автотранспортты сыныхтиры паза тыхтиры, ол санда чууры паза шиномонтаж; кізіні чыырын иртірері паза аннаң палғалыстығ полызығлар; ниме-ноо тартары паза хайраллиры; искіріг паза палғалыс тоғызы; чонға паза организацияларға чурт-коммунальнай полызығларын пирері; компьютерлерні, ибдегі ниме-нооларны тыхтиры; чир-чайаанны хайраллиры; ас-тамах сығарызы; мал имҷізінің полызии; хазна, чуртағҷылар киректерінҷе нотариустар тоғызы.
Пасха организацияларға тоғынмас кӱннер режимі теелче. Хосхар айының 12-ҷі кӱніне теере Хакасияда чарабас тоғынарға:
- сілігленҷең, массаж паза СПА-салоннарға, солярийлерге, мылчаларға паза мындағ полызығ пирчеткеннерге;
- ӱтертіс, тынағ паза олғаннар кіннеріне;
- физическай культура паза спорт орыннарына, ол санда спортзалларға паза бассейннерге;
- чонны азырапчатхан организацияларға;
- пос имнег организацияларына, кабинеттерге паза стоматологияа, табырах паза соона салдырбас имнег полызиин киректепчеткенінең пасха.
Ідӧк розница садии чарадылбинча, аптекалардаң, сотовай палғалыс салоннары, ас-тамах, пӱдіріг, ибде киректелчеткен ниме-ноолар, садха ниме-ноолар, газета-журналлар, мал-хусха ниме-ноолар, имнер паза иң кирек ниме-ноолар садығ тураларынаң пасха (Россия правительствозының 27.03.2020 чылдағы 762-р № чарадиинда кӧзіділген), оларның санына хозылған пу ниме-ноолар:
1. Алынҷа арачыланыс ниме-ноолары паза оларны тимниріне материаллар.
2. Имнег паза дезинфекция ниме-ноолары.
3. Автотранспортха хоза чардыхтар, ол санда сӱрткі, шина, камера.
4. Санитар-техника ниме-ноолары.
5. Кізіні чыырға ниме-ноолар.
6. Очки, линзалар паза оларның чардыхтары.
7. Палғалыс ниме-ноолары: мобильнай телефоннар, сим-карталар.
8. Ӧртті чох идерінҷе паза аны ӱзірерінҷе ниме-ноолар.
Пасха ниме-нооны ырахтын, кӧрілген орынзар читіріп, садарға чарир.
Хосхар айының 12-ҷі кӱніне теере изіртчеткен іскі садии 10.00 - 15.00 часта ла чарадылар.
Хосхар айының 12-ҷі кӱніне теере тоғынчатхан организацияларға тоғынҷыларына алынҷа арачыланыс ниме-нооларын пирерге, ит ізиин синирге, тоғыс орыннарында санитар тоғыстарын толдырарға, ідӧк санитар-эпидемиология киреенең палғалыстығ кирексіністерге тудынарға киректелче.
Республикада коронавируснаң палғалыстығ наа искіріглерні Хакасия правительствозының сайтында (https://r-19.ru/) паза республика пазының социальнай сетьтердегі пӧліктерінде (Вконтакте: https:// vk.com/konovalov1917 паза Инстаграмда: https://www.instagram.com/konovalov_ khakasia19/) кӧріңер.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде