ВЕТЕРАННАРҒА ЧЫЛЫҒ ХАЙЫҒ
13.05.2020
Хабарлар
Полызығ. Илбек Чиңістің пайрамнығ кӱні алнында «Благодарение» полызығлығ фонд Хакас национальнай гимназияның ветераннарына ас-тамах паза ахчалығ сыйых читірген
- Хакас национальнай гимназия пістің пір ле, - тіпче «Благодарение» фондтың директоры Тарика Торокова. - Анда пістің палаларыбыс ӱгренчелер. Тӧстегҷілерібіс андох ӱгренгеннер. Пӱӱнгі полызығ Сталбек Степанович Мишаковтың сылтаанда пирілче.
Тарика Торокова гимназия ветераннарының чуртапчатхан орыннарын Хакасияның ӱгредіг министерствозынаң таап алған. Министр орынҷызы Юрий Гаврилович Сагалаков 16 ветераннаңар искір пирген.
- Піс чыл сай 9 Май алнында гимназияның ветераннарын алғыстапчабыс. Ол кибірге кір парған. Торт, конфеттер алып, чей ісчеңміс. Че пӱӱл іди тоғазып, одырып алҷаң оңдай чоғыл, кізілерге ибдең сығарға чарабас нооза. Аннаңар, улуғларыбысха ас-тамах читіріп, мындағ оңдайнаң оларны Илбек Чиңістің пайрамнығ кӱнінең алғыстапчабыс, - чоохтаан Тарика Торокова.
«Благодарение» фондтың кізілері, пастап ас-тамахты «Алтын Арығ» юртада машинаа таарлабызып, Ағбандағы 4 микрорайонда чуртапчатхан ветераннарзар чол тутханнар. Машина тінін Тарика Александровна позы тутхан. Олох ветераннарға, азынада сығдырадып, килчеткеннерінеңер искірген. Ӧӧрезі Зоя Валерьевна, тізең, чиистіг аар харчахтарны хаап чӧрген. Анда фрукттар, соктар, чағбан хайах, чарбалар, конфеттер, чейлер, консервалар, колбасалар полғаннар.
Ветеран Зоя Константиновна Кадышева, «Благодарение» фондтың абахай хыстарын ачых-чарых удурлап, ӧрінізін чазырбинчатхан:
- Ам Кӱске чылы, аннаңар ибде одырҷаң режим тузында, кӱскеҷек чіли, ибімнең сыхпинчам. Садығ туразынзар пар килчем, анаң ибзер маңзырапчам.
Зоя Константиновна национальнай гимназияда 12 чыл істен салған. Ол интернаттың директор орынҷызы полған, соонаң тынаға сыхханҷа химия урогын апарған. Амғы ибде одырҷаң режим тузында кибелістер пасча.
Нина Константиновна Кучугешева Хакас национальнай школаның интернадында, кастелянша полып, 20-ӌе чыл істен салған. Анда ол 1982 чылдаң 1999 чылға теере тоғынған.
- Ол чылларда национальнай школаның ӱгренҷілерін тонандырҷаңнар. Мағаа оларның кип-азаа, тӧзек-частығы арығ ползын тіп сыбыра сыныхтирға килісчең. Пала илееде полған, - сағысха кирче Н.К.Кучугешева.
Нина Константиновна национальнай школадаң пис часха улуғ. Ол 1940 чылда 5 ноябрьда тӧреен. Пӱӱл ветеранға 80 час толар, национальнай гимназияа, тізең, 75 чыл, аннаңар 2020 чыл Нина Константиновнаа ікі хати танығлығ саналча.
- Чаа тузында ӧкіс халған палаларны, прай Хакасиядаң чыып, национальнай школада ӱгретчеңнер, - сағысха кирче ветеран. - Мин олғаннарның кип-азаа паза тӧзек-частығын Жуковтың орамазында орныхчатхан мылчаның прачечнайынзар чуурға апарҷаңмын. Олох мылчазар пістің школаның ӱгренҷілері чуунарға чӧрҷеңнер. Тӧзек-частыхты прачечнайзар апарарға автобус пирілҷең. Ол ниме-нооны таарлирға ӱгренҷілерӧк полысчаңнар. Ынағ чуртаҷаңмыс.
Ибде одырҷаң режим тузын Нина Кучугешева дачазында иртірче. Улуғ частығ ууха ам даа чітіг пас чӧрче.
Ідӧк таныхтирға сағынчам, «Благодарение» полызығлығ фонд ӱр ниместе Асхыс, Пии аймахтарындағы паза Ағбандағы кӧп палалығ сӧбірелерге ас-тамах таратхан.
- Карантин кирілгенде, кӧп кізі тоғыс чох халған. Кӧп палалығ сӧбірелер аал чӧптері пастарынзар, полызығ сурап, айланғаннар, - чарытхан Тарика Торокова.
«Благодарение» полызығлығ фонд ікі чыл тоғын парир. Пу хысха тус аразына ол кӧп кізее полызарға маңнанған.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде