ГАЗЕТАНЫ ЧАРЫМ ЧӰС ЧЫЛ ХЫҒЫР ПАРИР
15.05.2020
Хабарлар
Марығ. Пӱӱн піс «Иң сиргек хығырығҷы» марығның кӧрік айының чиңісчізін - Асхыс аймаандағы Ӱс чулдағы ортымах школаның ӱгретчізі Татьяна Тюмерекованы - алғыстапчабыс
Газетаның ай сай иртірчеткен марии хығырығӌылар кӧңніне кірчеткені, сурығларға нандырар тус чит килзе, чахсы кӧрінче. Хосхар айының 7-ӌі кӱнінде кӧрілген тусха, 9.00 час иртенге, телефон сығдыр-сағдыр тӱскен. Таң сурығлар сынында оой полғаннар, таң хығырығӌылар газетабысты іди сиргек хығырчалар, пастағызын сығдырадып алған кізі прай сурығларыбысха орта нандыр пирген. Ол полған Асхыс аймаандағы Ӱс чул аалдағы школаның хакас тілі паза литература ӱгретчізі Татьяна Тимофеевна Тюмерекова. Сах андох піс аны, орта нандырып, кӧрік айының иң сиргек хығырығӌызы полыбысханынаң алғыстаабыс.
Чоохтирға кирек, хосхар айы пасталчатханда, ибде одырар режим наа ла кирілген полған, аннаңар сыйых читірері сӧӧ тартыл парыбызарын пілгебіс паза чиңісчіні сизіндіргебіс. Кӧрік айында «Иң сиргек хығырығӌы» марығның спонсоры полыбысхан Ағбан городтағы идінӌек Яна Толмачева. Ол городта пайрамнығ иирлер иртірӌең «Алтын Арығ» тадар иблер комплексін тутча. Ах иб - иң улуғ. Анда 350 дее аалӌыны чыып аларға чарир. Хости сала кічіг ағас иб турча. Анда иң кӧп 50 кізіні чыып аларға чарир. Спонсор чиңісчее 3000 салковайға сертификат тимнеп пирген. Ол ахчаа чарир комплексте тимнеен чиисті ибзер чахып аларға. Ибдең сыхпас режим чарлалғанда, «Алтын Арығ» тадар иб комплексі тимде ас-тамахты ибзер читірерінең айғасча. Ідӧк кибірли редакция адынаң «90 чыл чоннаң хада» кинде сыйыхха тимнелген.
Хакас чирі» газетаның ӧӧн редакторы Радион Сунчугашев киндеде, марығ чиңісчізін адап, хол салған. Пу кинде хакас газетазының 90 чылына сығарылған паза аның тархынына, ӧмезіне чарыдылған.
Пу сыйыхтарны тимнеп алып, сілкер айының 8-ҷі кӱнінде піс Тӧӧ чирінзер чол тутхабыс. Ікі минута аразына сыйыхты читір пиріп, Татьяна Тимофеевнаны сомға суурып алғабыс. Сурығларыбысха, тізең, иң сиргек хығырығҷыбыс телефонҷа нандырған. Татьяна Тимофеевна Тюмерекова ӱгретчі тоғызын 49 чылы апар парир. Пу син тус аразына аның істеніс чолында пӧзік чидіглер пар. 1993 чылда ол «Хакасияның саблығ ӱгретчізі» атха турысхан. Ӱгретчі-методист ат алып, 5-9-ҷы класстарға «Хакас тілі» паза 1011 класстарға «Хакас литературазы» учебниктернің автор-составительі полча. Ӱгретчілерге уроктарны иртірер чӧптер сығарған. Пу тоғыстары ӱчӱн Улуғлар чӧбі аны «Чахсы киректер ӱчӱн» орденнең сыйыхтаан. Россия паза Хакасия синінде, позының узын кӧзідіп, пілістерінең ӱлезіп, аймах марығларда араласча. Ікі хати, 2007 паза 2015 чылларда, Россия президентінің премиязына турысхан. Олғаннарның таланттарын тилітчеткен ӱчӱн, «Алтын парыс» медальнаң таныхтатхан.
- Тиксі істеніс чолымда хакас газетазын алып, тоғызымда тузаланчам. Газета уғаа тузалығ. Аны пастағы страницазынаң халғанӌызына теере хығырчам, анаң тузалығ статьяларны, хыплап, ӧнетін тимнелген чыындыда кӧстегліг пӧліксер хосчам, - ӱлесче Татьяна Тимофеевна. - Іди мин газетаны ал сыхханнаң итчем.
Иргі хығырығҷыбыс газетаны 1971 чылдаң сығара ал сыххан. Андада ол пастағызын на школазар тоғынарға килген. Че аның алнында даа Татьяна Тимофеевна газетаны хығыр турҷаң. «Удаа почтада садызып алҷамын, - тіпче ол.
- Пӱӱнгі кӱнде газетаны хығырбазам, истенминчем».
Піди дее газетаны тооза хығырчатхан кізі ноға марығда араласпас? Салтар - кӧрік айының иң сиргек хығырығҷызы. Редакция ӧмезі Татьяна Тимофеевнаны пу чиңіснең алғыстапча паза газетанаң пик палғалысты мыннаң мындар узарадарына ізенче.
Кӧрік айында пирілген сурығларны паза оларға нандырығларны пирчебіс:
1. Хайдағ федеральнай программаа кіріп аларға пӧгінче Хакасияның экология министерствозы? - «Арығ кии» федеральнай программаа - 3.03.2020, 4 стр.;
2. Вера Тинникова тоғыс соонҷа хайдағ аалзар кӧскен? - Казанов аалзар - 4.03.2020, 5 стр.;
3. «Ӧӧні фамилия нимес, иң пастап синің хакас тілін тилідеріне кӧп кӱс салчатханын кӧрерге кирек!» - кемнің пу сӧстері? - Элла Замшани - 17.03.2020, 4 стр.;
4. Кем совхоз тӧстебізерге тимде, сынап ам даа 100 час чазирын пілген полза? - Сергей Мамышев - 27.03.2020, 14 стр.;
5. Туғаннары ікі похоронка алған, че чааҷы ибінзер хазых айланған. Кем ол? - Антон (Апон) Угдыжеков - 20.03.2020, 15 стр.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде