ИБДЕГІ ЧИҢІСТЕР
11.12.2018
Хабарлар
Меспектіг хоккей. Ағбандағы «Саяны» команда меспектіг хоккейнің 2018-2019 чыллардағы сезонында позының айғызында 6-7 декабрьда пастағы тоғазығларны иртірді. Пістіңнер Хызылчарның «Енисей-2» командазынаң ойнааннар.
МЕСПЕКТІГ ХОККЕЙҶЕ РОССИЯ ЧЕМПИОНАДЫНЫҢ ПӦЗІК ЛИГАЗЫНДА ОЙНАПЧАТХАН АҒБАНДАҒЫ «САЯНЫ» ПӰӰНГІ КӰНДЕ ИҢ ЧИИТ КОМАНДАЛАРНЫҢ ПІРСІНЕ САНАЛЧА. ХОККЕИСТТЕРНІҢ ОРТЫМАХ ЧАСТАРЫ - 22-23. 18 ЧАСХА ЧИТКЕЛЕКТЕРНЕҢ ХАДА 30 ЧАС АС ПАРҒАННАР ОЙНАПЧАЛАР, ПАЙ ОПЫТТАРЫНАҢ ЧИИТТЕРНЕҢ ӰЛЕСЧЕЛЕР.
АННАҢАР ДАА, ТАСХАР СООХ ТАА ПОЛЗА, ЧИР-СУҒҶЫЛАРЫБЫСТЫҢ КӦҢНІН КӦДІРЕРГЕ, ОЛАРНЫ ЧИҢІСКЕ КӦӦКТІРЕРГЕ ГОРОДТЫҢ ӦӦН СТАДИОНЫНЗАР КІЗІЛЕР ИЛЕЕДЕ ЧЫЫЛЫСХАН. ХОККЕИСТТЕРЗЕР, КӦРІГҶІЛЕРЗЕР АЛҒЫСТАС СӦСТЕРІНЕҢ АЙЛАНҒАННАР ХАКАСИЯ ПАЗЫ ВАЛЕНТИН КОНОВАЛОВ, ХАКАСИЯНЫҢ ӦӦРКІ ЧӦП КНЕЗІНІҢ ПАСТАҒЫ ОРЫНҶЫЗЫ, РЕСПУБЛИКАНЫҢ МЕСПЕКТІГ ХОККЕЙ ФЕДЕРАЦИЯЗЫНЫҢ ПРЕЗИДЕНТІ ЮРИЙ ШПИГАЛЬСКИХ, ХАКАСИЯНЫҢ СПОРТ МИНИСТРІНІҢ ТОҒЫЗЫН ТОЛДЫРЧАТХАН ЕВГЕНИЙ КОСТЯКОВ ПАЗА ДАА ПАСХАЗЫ.
Анаң ойын пасталыбысхан. Пу ікі команданың хайзы даа сыбыра чиңіс тударға харасча, сіліг ойын кӧзітче. Андағох оңдайнаң тудынғаннар хоккеисттер пастағы тоғазығда, 6 декабрьда. Хызыл ӧңніг меспек аар-пеер ле учух чӧрчеткен. Ам на пістіңнер «Енисей-2» команданың хаалхазы хыринда ӧткін хайынысчатхан ползалар, паза ла кӧрзең, хызыл меспекті айғы ээлері пыластырыбызып, арачыланарға маңзырапчатханнарына хомзынчазың. Стадион тымыл парча.
Хайдағ ӧрчіліг хысхырыстар - «Саяны» команданың капитаны Евгений Ткачук кӱремҷігін чоғар кӧдірче -гол! Орта, ибде пастағы голны хайди даа айғы ээлері кирерге кӱстенчелер. Мында сах іди пол парды. Кӧрігҷілернін ӧрінізі тохтаалахта, Александр Захваткин махтаға сыхча. Кізілер, 28 градус соохха даа хайығ айландырбин, ӱннері харылғанха аахтасчалар, ікінҷі голны ізіг чейнең таныхтапчалар, стадионзар тикке килбиндірбіс тіпчелер.
Хазыр ойынның пастағы чардығы тоозылғанда, пістіңнер 2:0 саннаң алнында парчатханнар. Мына стадионзар чыылысхан чонға хомзынар тус читті. Ойынның ікінҷі чардығы пасталар-пасталбастаңох, Олег Тарнауцкий пістің хаалхаа гол кирібісче. Чох-а, іди поларға чарабас, маңат арачыланарға кирек. Уламох чахсы поларҷых, пірее гол кирібіссе. Аннаңар кӧрігҷілернің хысхырыстары тыыпча.
Ойын кӧрчеткен кізілернің кӧңнілерін кӧдірерге сағынған чіли, Руслан Гавричков гол кирібіскен. Кӧрігҷілер сала ниик тынчалар. 3:1 саннаң «Саяны» алнында. Че «Енисей-2» команданың хоккеисттері іди ле оой утырарға хынминчалар. Илья Деревцов пазох пістіңнерні хомзындырча. 3:2 сан пол парды. Чочындырчатхан кӧзідім.
Аалҷылар, тізең, саннарны тиңнестіріп аларға харазып, алнынзар матап харасчалар. Хаалха хадағҷызы Сергей Саблинге хатығ чухча. Ағаа сыбыра сизіктіг тудынарға килісче. «Саяны» команданың защитниктері ағаа маңат полысчалар, аалҷыларны хаалхаа чағын кирбеске харасчалар. Андағ кӱстеніс тик чирге парбинча, аалҷылар паза гол кир полбин салғаннар. Пістіңнер санынаң Дмитрий Бутаковнаң Александр Захваткин пірер гол кирібіскеннер. Ибде ойнап, айғы ээлері 5:2 саннаң чиңіс тутханнар. Аалҷыларны утарға оой полбаан.
7 декабрьда андағох соох кӱн полған. Меспектіг хоккейге хынчатханнар анзына хайығ салбинчалар. Оларның саны сыбыра алызып одырча. Хайдағ даа соох кӱнде стадионзар чиде салчатханнарның аразында хакастар даа асхынах нимес. Пірее хати олар, пуухти одырыбызып, пос тілінең тыыда хысхырысчатханнарын ис халарға килісче. «Саяны» команданың прай даа хоккеисттерін чахсы таныпчатхан чіли тудынчалар, алнынзар чӱгӱрчеткен спортсменнерні ады-солазынаң адап, оңнығ ла кӧгліг хысхырыспинчалар, гол кирібізерге кӧӧктірчелер. Анзы гол кирібіссе, постары махтаға сыххан чіли ӧрінісчелер.
«Ок, пӱӱн пістіңнерге хатығ чуххадағ, утыр салбазыннар... Ибде утарға кирек», - чоохтасчалар олар.
Сынап таа, ікінҷі ойын тузында айғы ээлеріне хатығ чуххан тиирге чарир. Анзын тоғазығның пастағы чардығы 1:1 саннаң тоозылғаны даа маңат кӧзітче. Мының алнындағы ойыннарның салтарларын санға алза, аалҷыларның кӧзідімнері ӧрініс ағылбинча. Подгруппадағы командалар аразында «Саяны» алнындағылар санында полза, «Енисей-2» команда ортызында парчатханнар санына даа кір полбинча. Аннаңар полған на тоғазығ тузында ағаа чиңіс тударға кӱстенерге килісче.
Ойынның ікінҷі чардығы пасталыбысханда, чир-суғҷыларыбыс командазының капитаны Евгений Ткачук «Саяныны» алнынзар сығарча, гол кирібісче. Тынарға ниик полыбысты. Амды арачыланысха ӧӧн хайығ айландырарға чарир. Аалҷылар тудығ чох алнынзар харасчалар. Оларға хайди даа чиңіс кирек. Алай ба тиңни дее ойнабызарға. Анзы утырғаны нимес нооза.
Мына Евгений Ткачук пазох ла алнынзар ойлапча. Меспекті позынаң ырах позытпинча, аалҷыларны піліп алаахтыр парчадып, кӧрібіскенде, Александр Захваткин хайығ чох халтыр. Ідӧк алнынзар табырах чӱгӱрче. Евгений паза даа ӱр чубанмаан, меспекті нанҷызынзар учухтырыбысхан. Александр андағ «сыйыхнаң» орта тузаланған, хаалха хадағҷызы Данил Клюшкиннің хыринҷа меспек кирібіскен.
Амды айғы ээлері сала пос салыныбысханнар. 3:1 саннаң утчалар. Ойын тоозыларға чит тее парды. Аннаңар пістіңнернің хаалхазы хыринда сайбаг иділген. Марығ чарғыҷызы 12 метр танығзар кӧзітче. Футболда пенальти поларҷых, хоккейде - буллит.
Аалҷылар аразынаң Семён Чупин сых килді. Пу оол Ағбанда хоккей ойнап пастаан. Амды пістіңнердең тоғыр ойнапча. Мындағ чахсы оңдайны Семён орта тузалан халған, гол кирібіскен. Ойын тоозыларға 2 ле минута халған полған. Пілдістіг, саннар паза алыспааннар. Тоғазығ оой нимес оңдайда ирткен дее полза, чиңіс пісти полды. Анзы, тізең, айғы ээлері, ікі ойында утып, постарына 6 сан хосханына тиңнелче.
Пӱӱл чайғызын, хаҷан «Саяны» команданың ӧӧн тренеріне Евгений Ерахтин турғызылғанда, ол хоккеисттернің алнында чоох тутхан, мындағ пӧгіннерінең ӱлескен: «Полған на тоғазығ тузында чиңіске кӱстенербіс, прай узыбысты кӧзідерге харазарбыс. Че меспектіг хоккейҷе Россия чемпионадының суперлигазынзар сығарға піске ам даа ирте. Тимде нимеспіс. Нинҷе-де чыл пӧзік лигада ойнап аларға, узыбысты таптирға кирекпіс». Евгений Николаевич пӧгінін чуртасха кирерге харасча.
Амды «Саяны» позының айғызында 14 - 15 декабрьда Арсеньев городтың «Восток» командазынаң ойнир. Аалҷылар мының алнындағы тоғазығларны ибде иртір турғаннар, чиңістер тутханнарох, утырғаннарох. Амды «Восток» алнында парчатхан командалар санында. Пістіңнерге ол хайдағ-да изі чох «ыырҷы». «Саяны» аннаң тоғыр хаҷан даа аар, сидік ойнапча. Ойын 13.00 часта пасталар. Кірері тикке.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде