ИМНЕГ ТУРАЛАРЫНА - НАА АВТОМОБИЛЬЛЕР
18.01.2019
Хабарлар
Хазна хабазии. Хакасиязар пу наада табырах имнег полызиин пирӌең 13 наа автомобиль читірілген.
НАА МАШИНАЛАР ФЕДЕРАЛЬНАЙ БЮДЖЕТ АХЧАЗЫНА АЛЫЛҒАННАР. ХАКАСИЯНЫҢ ХАЗЫХ ХАЙРАЛЛАҶАҢ МИНИСТЕРСТВОЗЫ КӰСТЕНІЗІНЕҢ РЕСПУБЛИКА АВТОМОБИЛЬ ПРОМЫШЛЕННОЗЫНА ХАБАЗАРЫНҶА ФЕДЕРАЛЬНАЙ ПРОГРАММАА КІРІП АЛҒАН. АМ АНЫ ХООСТЫРА РЕГИОНҒА ИМНЕГ ТУРАЛАРЫНЫҢ ТРАНСПОРТЫН НААҶЫЛИРЫНА ХАЗНА ХАБАЗИИ 3 ЧЫЛ ИЗЕРЕ ПИРІЛГЕН. ПӰӰЛ ОЛ ПОЛЫЗЫҒ УЗАРАДЫЛЧА. ПӰӰЛ РЕСПУБЛИКАА ХОЗА 13 НАА АВТОМОБИЛЬ ПИРІЛДІ, ОЛ САНДА 11 «ГАЗЕЛЬ» ПАЗА 2 «УАЗ» МАШИНАЛАР. ОЛАРҒА ТИКСІ 37 МИЛЛИОН АЗЫРА САЛКОВАЙ ХОРАДЫЛҒАН.
КИҶЕЕ, 17 ЯНВАРЬДА, НАА МАШИНАЛАРНЫҢ КЛӰСТЕРІН АҒБАНДА ПАСТАҒЫ МАЙ ПЛОЩАДЬЫНДА ПАЙРАМНИ ЧИТІРГЕННЕР ГОРОД-АЙМАХТАРДАҒЫ ИМНЕГ ТУРАЛАРЫНЫҢ ӦӦН ИМҶЛЕРІНЕ. ОЛАРНЫ МЫНДАҒ ТАНЫҒЛЫҒ КӰННЕҢ АЛҒЫСТААН ХАКАСИЯ ПАЗЫ ВАЛЕНТИН КОНОВАЛОВ.
Хакасия пазы Валентин КОНОВАЛОВ наа машина клӱзін Харатастағы табырах имнег полызии станциязының ӧӧн имӌізі Александр ФЕДОСЕЕВКЕ читірче.
Хайди ол таныхтаан, пылтыр декабрьда республиканың город-аймахтарындағы имнег тураларынзар 9 наа машина пирілген. Пӱӱн хоза наа автомобильге чидініп аларға ӱлӱс тӱсті. Оларның сылтаанда, табырах имнег полызиин ыраххы аалларда пиріп, кізілернің чуртазын ал халар оңдай пар. Ідӧк регион пазы Хакасияның хазых хайраллаҷаң министерствозының тоғынҷыларына паза министр Владимир Костюшха кӱстеністері ӱчӱн алғызын читірген.
Пістің хазнада сығарылчатхан «В» класстығ автомобильлер Ағбандағы, Харатастағы, Саяногорсктағы табырах имнег полызии станцияларына, Пии, Таштып паза Орджоникидзе аймахтарының ӧӧн имнег тураларына пирілгеннер.
Ағбандағы табырах имнег полызии станциязына 7 «ГАЗель» машина пиріл парған. Пу станцияның тоғынҷылары чыл сай 67 муң азыра хати имнег полызиин пирерге чӧрчелер, суткада - 200-че хати. Харатастағы табырах имнег полызии станциязына 1 «ГАЗель» пирілген. Анда чылда 27 муң азыра хати имнег полызиин пирер ӱчӱн чорыхха сыхчалар, суткада - 70-ҷа хати. Андағох автомобильліг саяногорсктағылар чолға сыхханнар. Оларзар, имнег полызиин киректеп, чуртағҷылар чылда ідӧк 20 муң азыра хати айланчалар. Пии аймааның ӧӧн имнег туразына 2 автомобиль пирілген. Таштыптағы ӧӧн имнег туразына 1 «Соболь» машина. Копьевтағы ӧӧн имнег туразына - 1 «УАЗ».
Таштыптағы имнег туразының ӧӧн имҷізі Александр Фридманның чооғынаң, халғанҷы туста пу имнег туразына чыл сай пірер наа транспорт пирілче. Пу - ӱзінҷі машина. Ам имнег туразының автопаркында табырах имнег полызиин пирҷең 5 машина тоғынар. Наа транспортта прай кирек оборудование пар: электрокардиограмма аппарады, дефибриллятор, тыныс приборы паза реанимация иртіреріне киректелчеткен пасха даа аппараттар. Алында андағох оборудованиеліг автомобильлер пирілген, че олар «УАЗ» машиналар полчалар. «Пістің имнег туразына табырах имнег полызиин пирҷең ам даа ікі машина кирек. Алында имнег туразында ікі ле иргі машиналығ тоғынҷаңнар», -таныхтаан Александр Владимирович. Пу имнег туразында, табырах имнег полызиин пирер ӱчӱн, чуртағҷыларзар имҷілер чылда 12 муң азыра хати чӧрчелер, суткада - 12-ҷе хати.
Наа автомобильлер пирілчеткеніне ӧӧн имҷі уғаа ӧрінче. Ол имнег тоғынҷыларының тоғызын нииктепче нооза. Ыраххы аалларзар наа машиналығ чидіп аларға сидік нимес. Ол сайбалбин тоғынар тіп ізенче ӧӧн имҷі. Наа транспорттың «тынын» тут парарға килген водительлер Игорь Чебодаевнең Сергей Ратманов ӧӧн имҷінің ӧрінізінең ӱлескеннер. Оларға наа машиналығ тоғынарға ідӧк хай-хай ниик полар.
Наа автомобильлерге одырып, ол кӱн площадьтаң пасха даа имнег тоғынҷылары аалларынзар паза городтарынзар уғаа ӧрчіліг айланғаннар.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы