«ХАЗЫХ ХАЙРАЛЛИРЫ» НАЦПРОЕКТ ЧУРТАСХА КИРІЛЧЕ
23.01.2019
Хабарлар
Чыылығ. Хакасия правительствозында федеральнай нацпроекттерні чуртасха кирерін сыныхтағда тутчатхан тоғысчы ӧменің теестегі чыылии ирткен.
Чыылығда араласхан Хакасия пазы Валентин Коновалов. Ол анда таныхтаан: «Нацпроекттер - регионны тилідерінҷе пӧгіннерібісті чуртасха киріп алар чахсы оңдай. Оларның полызиинаң республика уғаа кирек социальнай объекттерні пӱдір полар, коммунальнай сидіксіністернің чардығын паза чуртағҷыларның пасха даа ағырсымнығ сурығларын пӧгер».
Теестегі чыылығда республиканың хазых хайраллаҷаң министерствозының сан пирізінең танысханнар. Республика «Хазых хайраллиры» национальнай проектке кіріп алған, ам аны хоостыра регионның алты проекта чуртасха кирілер. Ол кӧстеглерге ахча федеральнай, республика бюджеттерінең паза хайди даа имнег страхованиезі фондынаң тиксі 13 миллиард азыра салковай позыдылар. Федеральнай проект 2019 - 2024 чылларға кӧріл парған.
Иң не улуғ проект - «Онкология ағырығларынаң кӱрезері». Ағаа тиксі 11 миллиард азыра салковай хорадылар. Ол ахчаа онкология полызиин пирҷең амбулатория кіннері тӧстелер. Пӧгінде - республиканың онкология диспансерінзер оборудование алары. Олох диспансернің радиология корпузы пӱдіриине 1,5 миллиард салковай кӧріл парған. Онкологияҷа имнег полызиин пиреріне паза пу ағырығлар профилактиказына - 9 миллиард азыра салковай.
«Пастағы имнег-санитарнай полызығ тилізі» регион проектіне 900-че миллион салковай позыдылар. Ол ахчаа Хакасияда имнег амбулаториялары, фельдшер-акушер пункттары пӱдірілер. Пӱдіріглер 100 азыра кізі чуртапчатхан аалларда апарылар. Илееде ахча - 638 миллион салковай - тың ағырчатхан кізілерні республиканың имнег учреждениелерінзер санитарнай авиациялығ апарарына кӧрілген.
«Чӱрек-тамырлар ағырығларынаң кӱрезері» регион проектінҷе 2019 - 2024 чылларда 538 миллион салковай хорадылар. Хакасияда республиканың чӱрек-тамырлар ағырығлары кінінзер паза пу ағырығларча пастағы имнег полызиин пирҷең пӧліктерзер оборудованиелер алылар. Республиканың имнег учреждениелерінің материально-техническай базазы чахсыландырылар.
Регионның алынҷа проекті олғаннар хазиин хайраллирының тилізіне кӧстелче. Аны хоостыра олған поликлиникаларынзар оборудование аларына 250 миллион азыра салковай кӧрілген. Ідӧк пӧгінде - олған поликлиникаларында паза имнег организацияларының поликлиника пӧліктерінде тиксі тыхтағ, олаңай тыхтағ тоғыстарын иртірері.
«Имнег организацияларында квалификациялығ кадрлар читкіҷе полары» регион проектінҷе аннаң андар чуртасха кирілер «Земский доктор» паза «Земский фельдшер» программалар.
Пірге саннығ система тӧстирінҷе регион проектінің пӧгіні - Хакасияның прай имнег учреждениелерінде Интернетнең тузаланҷаң оңдай полары, электроннай регистратуралар, пірге саннығ сетьтер тӧстирі.
Аннаң пасха, Хакасияда федеральнай проекттерні чуртасха киреріне кӧстелчеткен хоза ікі регион проектінҷе тоғыс апарылар. Олар «Демография» национальнай проектке кірчелер: «Чонның хазиин пиктирі» паза «Улуғ тӧл». Олар хазых хайраллирында алынҷа мероприятиелер полчалар.
Автор :
Хакасияның хазых хайраллаӌаң министерствозы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде