«ХАКАСИЯНЫҢ ХОЙ ИДІ» ЗАВОДЫ ТОҒЫНАРҒА ТИМНЕНЧЕ
26.03.2019
Хабарлар
«Хакасияның хой иді» завод мал сохчаң цеғын сыныхтапча.
Мал сохчаң цехты тоғындырып кӧреріне Хакасияның кресен-фермер хоныхтарынаң 50-ӌе пас хой алылған. Предприятиенің устағ-пастааның чооғынаң, мал сохчаң цех тоғынарға тимде полза даа, алнында ам даа кӧп тоғыс. Ол санда читпестерні тӱзедібізері, ит орааӌаң пленка суриин пӧгібізері.
Че ӧӧні - ол рынокта хой идінің хайдағ чардығы кирексіністе поларын ілезіне сығарары.
- Кирексіністе хойның кӧксі дее, пилі дее, чодазы даа полар. Хакасия чуртағӌылары хайдағ итті алчатханын тӧреміл сыныхтағда тудып, тоғызыбысты аның салтарларынӌа тударбыс, - теен ӧӧн технолог Ольга Мирошникова.
Предприятие пӱдіриине чарым миллиард салковай хорадылған. Кирек оборудование Австралиядағы 40 азыра чыл тоғынчатхан «BERTSCH-LАSКА» фирмадаң алылған. Амғы туста менеджер Филипп Либнер паза технолог Франц Райнел оборудование-нің хайди тоғынчатханын сыныхтапчалар паза тоғынӌыларны ӱгретчелер.
- Европада хойларны чазыда ӧскірӌең оңдайлар чоғыл. Мында, тізең, хой хадарӌаң чир кӧп. Ит уғаа татхыннығ, - таныхтаан Франц Райнел.
Хой идін тимнирінӌе кӧп тоғыс толдырарға килісче: хойны соғыбызарға, идін оохтабызарға, пленкаа ораабызарға, тоңдыр саларға паза пасха даа тоғыстар. Заводтың тоғын полар кӱзі - пір сменада 200 - 250 пас хойның идін тимге сығарары. Завод тоғызын толдыразынаң пастабысса, предприятие устағ-пастааның ӧӧн сурии полар - хойлар тілирі.
- Минің кӧрізімнең, пу Хакасияда ла нимес, Урал кистінде дее амғы тусха килістіре чалғыс предприятие полча. Пу цехты пістің республикада пӱдірерге чаратхан ӱчӱн инвесторларға алғыс читірчебіс. Амды аал хонии министерствозы алнында республикада хой санын ӧскірібізерге пӧгін турча. Иң пастап пу чахсы ас-тамахты Хакасияда садарынаңар завод устағ-пастаанаң чӧптес салғабыс. Анаң на пасха регионнарзар апарарға чарир, - чоохтапча республиканың аал хонии паза ас-тамах министрі Сергей Труфанов.
Чайғы тоозылчатса, кӱскӱзер, кізілер хойларын соғып пастапчатхан туста, «Хакасияның хой иді» ООО толдыразынаң тоғынып пастир. Ол тусха хайдағ ит аймаа тимге сығарылары паза хайдар садылары кӧріл парар.
Автор :
Алексей БАИНОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде