НАА ПРОЕКТТЕР - НАА ОҢДАЙЛАР
05.04.2019
Хабарлар
КЭФ-2019. Хызылчардағы экономика форумында Сибирьні тилідерге хабазар инвестиция проекттері ӱзӱрілген, ол санда «Кимдегі Сибирьге» кирілер проекттер. Хакасияда андағ нинҷе-де проект тимнелче.
.
Хайди піс таныхтаабыс, Хызылчардағы экономика форумы Хакасияа иң пастағызын «Кимдегі Сибирь» килкім инвестиция проектінең танығлығ. Форумда 110 миллиард салковайға нинче-де инвестиция проектін чуртасха кирердеңер чӧптезіглер иділген. Аннаң пасха, республика пазы паза правительство кізілері инвесторларнаң алынҷа тоғасханнар. Форумның ӧӧн сессияларының пірсінде Сибирь регионнарын тилідерінҷе пастағлар ӱзӱрілген. Оларның санында «Бентонит Хакасии» компанияның бентогранулалар сығарызын тилідерінҷе проекті ӱзӱріге сығарылған. Хакасияның культура министрі Леонид Ерёмин, тізең, «Поднебесье» турист-рекреация комплексін тӧстирінҷе проектнең таныстырған.
Тиксі хазнада сығарылчатхан 800 муң тонна тойның чарымы пістің республикада сығарылча. Промышленность тиліпчеткенде, Россияда ағаа даа кирексініс ӧсче. Аны санға алып, сығарысты ӧскірер ӱчӱн, 2019 - 2021 чылларда «Бентонит Хакасии» компания предприятиені алғыдарға, наа оборудование аларға пӧгінче. Ідӧк той наа чирлерде анылар. Пазағы чылларда предприятие тоғызын пос алынҷа оңдайға кирер. 2021 чылда, тізең, пӧзік сығарыстығ линия тоғындырылар. Ол той маттарын - сӧп-сап чығҷаң полигоннар, шлам ӱртӱннерін, нефть паза ГСМ хайраллаҷаң орыннарны, АЗС-тарны, промышленность паза пасха кирексіністерге тулғорларны пӱдірчетсе, чирзер оолығ ниме-нооларны иртірбес паза чир алтындағы суғны ӧттірбес экраннарны - сығарар. Компания пӱӱнгі кӱнге тиліс проектіне 300 миллион салковай пос ахчазын хорат салған. Чағынғы чылларда хоза чарым миллиард салковай позыдылар. Проекттің чуртасха кирілгені регионға наа тоғыс орыннарын тӧстирге, налог тӧлеглерін ӧскірерге полызар паза республиканың инвестициялар тартар сарин чахсыландырар.
Тиксі проектнең танысхан соонаң Хакасияның экономика тилізі министрі Николай Евдокимов аның кӱстіг сариларын таныхтаан.
«Бентонит Хакасии» компанияның ниме-ноо сығарызынҷа наука даа, техника даа тоғыстары чахсы тимнелген. Тойдаң тимнеен ниме-ноолар Россияда даа, пасха хан чирлерінде дее кирексініснең тузаланча. Аннаңар Хакасия правительствозы оларның тилирге кӱстенчеткеннеріне чӧпсінче паза полызарға тимде, - теен министр.
Алынҷа таныхтирға кирек «Поднебесье» турист комплексінің проектін. Ол Асхыс аймаандағы Палыхтығ суғ аалның хыринда орнығар. Пастағҷы полча идінҷек Виктор Вардугин. Проект ідӧк Хакасияның культура министрі Леонид Ерёминнің кӧңніне кірген. Республикада туризм сурығлары культура министерствозының хайиинда полчатханнаңар, Леонид Валентинович аны тилідердеңер паза наа синге сығарардаңар сағыссырапча. Тиліс оңдайларының пірсі - «Поднебесье» комплекс. Проектче комплекс нинҷе-де кӧстегҷе тоғынар, аннаңар ол туристтерге чыл ибіре хынығ орын полар. Нименең хайхадар комплекс? Ин пастағызын, ас саннығ шорларның кибірліг чуртазынаң таныстырар. Туристтерге чазағ паза чалаң чӧрҷең чоллар тимнелер, суғҷа инер оңдайлар тӧстелер. Хысхызын, тізең, саналығ чыларға чарир полар. Комплекске 100 муң гектар чир пӧлілер. Наа тынағ орны чылда чарым миллион кізіні удурлирға тимде. Проектті чуртасха киреріне 5 миллиард салковай инвестиция киректелче.
«Кимдегі Сибирь» инвестиция проекті 2027 чылға теере тоғынар, тузазын кӧзітсе, узарадылар даа. Аннаңар, сағынчам, ол наа проекттерні толдырарына чахсы оңдайлар пирче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде