ЧААҶЫ ПОС ЧИРІНЗЕР АЙЛАНДЫ
09.04.2019
Хабарлар
ПЫЛТЫР ЯНВАРЬДА «УСПАС ОТ» КЛУБТЫҢ ВОЛОНТЁРЛАРЫ, МОСКВА ОБЛАЗЫНЫҢ ОДИНЦОВО ГОРОД ОКРУГЫНДА ЯКШИНО ААЛ ХЫРИНДА ТІЛЕГ ТОҒЫСТАРЫН АПАРЫП, АДЫ-СОЛАЗЫ ЧОХ ЧААҶЫНЫҢ СӦӦГІН ТААП АЛҒАННАР. ХЫЗЫЛ АРМИЯНЫҢ ЧААҶЫЗЫН АРҒЫСТАРЫ ЧААЛАСХАН ОКОБЫНДА ЧЫЫП САЛТЫРЛАР.
АЛЕКСЕЙ КОБЯКОВ УСТАПЧАТХАН КУБИНКАДАҒЫ «УСПАС ОТ» ЧАА-ТАРХЫН КЛУБЫНЫҢ ТІЛЕГҶІЛЕРІ ЧААҶЫНЫҢ АДЫ-СОЛАЗЫН ПІЛІП АЛҒАННАР. ОЛ АЛЕКСАНДР МИХАИЛОВИЧ БАЙКАЛОВ ПОЛТЫР. АНЫҢ СООНДА ХЫЗЫЛ АРМЕЕЦТІҢ ТУҒАННАРЫН ТІЛИР ТОҒЫС ПАСТАЛҒАН. ВОЛОНТЁРЛАРҒА ОҢ ПОЛҒАН, БАЙКАЛОВТЫҢ ЧЕЕННЕРІ ХАКАСИЯНЫҢ ПИИ АЙМААНДАҒЫ УЛУҒ НОНЫП ААЛДА ТАБЫЛҒАННАР.
Хакасиядаң чааға парып, Москваны арачылир чаалазығларда сағба чох чіт парған, че ӱр ниместе табылған матыр чир-суғӌыбыс, хызыл армеец Александр БАЙКАЛОВТЫҢ сӧӧгін чааӌылар самолёттаң Ағбандағы аэропортсар апарчалар.
Хумартхылас. Илбек Ада чаада 1941 чылда Москва ӱчӱн чаалазығларда чуртазын пир салған Хызыл Армияның чааӌызы Александр Байкаловтың сӧӧгін 5 апрельде Хакасиязар ағылғаннар.
1907 чылда тӧреен Александр Байкалов, Илбек Ада чаа пасталыбысханда, фронтсар чаалазарға парыбысхан. 1941 чылда ноябрьда Москваны арачылир чаалазығларда ол сағба чох чіт парған. Покровка аалда (ам ол аал чоғыл) чуртаан туғаннары амға теере аннаңар пір дее ниме пілбееннер. Волонтёрларның тілег тоғызы сылтаанда пу кирек чарыдыл парды.
Хакасия пазының орынҷызы Юрий Курлаев паза республиканың Москвадағы тӧреміл представительствозының устағҷызы Юлия Исмагилова, Москваны арачылап, чуртазын пир салған чааҷының сӧӧгін кічіг чир-суунзар ызар траур мероприятиезінде араласханнар. Байкалов Хакасияда тӧреен, мыннаң чааға парыбысхан.
5 апрельде чир-суғҷыбыс Александр Байкаловтың сӧӧгін «Москва-Ағбан» авиарейс толдырчатхан самолётнаң Ағбанзар читіргеннер. Хайди искірген Хакасияның чааҷылар комиссарының полысчызы, запастағы подполковник Олег Пагельс, чааҷының сӧӧгін, Пиизер апарып, андағы тигірибзер пирерлер. Анда аны туғаннары, орындағы ӱлгӱ кізілері, казактар пірігізінің араласчылары удурлирлар. Хызыл армеецтің сӧӧгін Илбек Чиңіс кӱні алнында, 6 майда, Улуғ Нонып аалдағы сыыратта чыып саларлар.
Ағбандағы аэродромда чааҷылар Россия флагынаң чабылған харачахты, самолёттаң сығарып, строевой хаалағнаң аэропортсар апарғаннар. Анда оларны Пиизер апарҷаң автомобиль сағаан. Чааҷының сӧӧгін Москвадаң Юрий Курлаев паза Хакасия Ӧӧркі Чӧбінің депутады Виталий Ермолюк ағылғаннар.
- Волонтёрлар, Москва хыринда чаалазығлар парған орыннарны хазып, пістің чир-суғӌыбыстың сӧӧгін таап алғаннар. Ол Москва облазының Одинцово город округындағы Якшино аал хыринда, чаалазып, чуртазын пир салтыр.
Александр Михайлович Байкаловты хада чааласхан арғыстары аның окобындох чыып салтырлар. Аннаң хада капсула пар полтыр, анда аның ады-солазы, Хакасиядағы Улуғ Нонып аал чӧбінең чааға парғаны пазылых полтыр. Улуғ алғыс тілегҷілерге, Байкаловтың туғаннарын таап алған ӱчӱн. Олар улуғ, тузалығ тоғыс апарчалар. Піс чааӌыны тапхан волонтёрларны Хакасиязар хығырғабыс, оларны мында экскурсияа ал чӧрербіс, Байкаловты чыып салған орынны кӧзідербіс.
Хакасияның пазы Валентин Коновалов чааӌыны иптеп чыып саларға тоғысчы ӧмезін тӧстирге чахығ пирген Александр Байкаловты чеестеп, турыстыра чыып саларбыс. Ідӧк алғызым читірчем Одинцово город округының депутаттар чӧбінің кнезіне. Ол позының тоғынӌыларынаң хада траур мероприятиелерін иртіреріне чахсы хабасхан Пістің Ӧӧркі Чӧп депутады, бизнесмен Виталий Ермолюкты мероприятиелер иртірерге ахчанаң полысхан ӱчӱн алғыстапчам, - чоохтаан Юрий Николаевич.
Байкаловтың сӧӧгін Пиизер ӱдезерінде Виталий Ермолюк ідӧк араласхан. Аның чооғынаң, ол Ӧӧркі Чӧпсер Пии аймаанаң табылған. Аннаң чааға парып, чуртазын Ада чир-суубыс ӱчӱн пир салған чааҷының сӧӧгін чыып саларына хабазарын ол позының киреене санапча. Ідӧк чаа-патриот тоғызын апарчатхан волонтёрларға алғызын читірген.
Пос чирінзер айланған Александр Байкаловтың сӧӧгін автомобильнең Пиизер апарыбысханнар. Ада чир-суубыс ӱчӱн, амғы чуртас ӱчӱн постарының чуртастарын пир салған чааҷыларның аттары хачан даа ундудылбазын.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде