УҢДУДАРҒА ЧАРАБАС
08.05.2019
Хабарлар
Пайрамға удур. Илбек Чиңіс кӱні алнында Ағбанда Н.Ф.Катановтың адынаң Хакас хазна университедінің филология паза культуралар аразыңдағы палғалыс институдының хакас кафедразы «Ундударға чарабас» хумартхылас иирін иртірген. Аны тимнеен филология наукаларының кандидады Наталья Таскаракова. Анда ӧӧнінде 4-ӌі курстың студенттері араласханнар
Чааҷы кип-азахтығ студенттер «Чаада сарнасса» улуғ нимес ойын турғысханнар. Анда чаа тузында окопта одырчатхан чиит оол-хыстар чоох алысчалар, сарыннар толдырчалар, ибде халған iҷе-пабаларын, харындас-туңмаларын сағысха кирчелер. Ідӧк олар ханнығ чаада чуртастары ӱзілген арғыстарын хумартхылапчалар. Іди чат халғаннарның пірсі офицер Иван Кичеев полча.
Хайди чоохтапча Наталья Николаевна, пу ойын тиктең нимес сценада турғызылған. Чаа хайдағ даа хорғыстығ, аар паза ханнығ полза, анда сарыннар толдырарға тус табылҷаңох. Че нимедеңер олар? Пілдістіг - чаадаңар паза хыныстаңар. Ідӧк пу ойында Наталья Николаевна чаадаң айланмаан чиит офицернің чуртас ӱзігін кӧзіт пирерге пӧгін турғысхан.
- Нинҷе-де чыл мының алнында саблығ ученай, этнограф Кузьма Патачаковтың «Наа чуртас ӱчӱн» книгазы мағаа орта пол парған. Анда Кузьма Михайлович чааҷы Иван Кичеевтің чуртас чолынаңар пасча. Офицернің тыны хатығ харбазығ тузында ӱзілген, ибінзер, тізең, ол ікі ле пічік ызарға маңнанған. Аның пазылғаны минің чӱреемні тың тибіреткен. Аннаңар «Чаада сарнасса» ойында Иван Кичеевтің пічии пір дее алыстырылбин пирілген. Ол Тӧӧ чирінде тӧреен, - таныхтаан чооғында Наталья Таскаракова.
Сынап таа, Илбек Ада чаада нинҷе чиит оол-хыстың чуртазы ӱзілген, нинҷе кізі ибінзер, сӧбірезінзер айланмаан?! Оларның хайзы-да фронттан ибінзер пічіктер ысхан, кем-де, тізең, аны даа ызарға маңнанмаан ...
«Ундударға чарабас» мероприятие-де ідӧк магистрант Карина Кулумаева «Ах хазың» сарынны толдыр пирген. Таныхтирға кирек, Карина - уғаа чайаачы кізі. Ол позы кибелістер пасча паза оларны ӧтіг хығырча. Ікінҷі курстың студенті Иван Чичинин поэт Николай Доможаковтың «Галина» поэмазының ӱзігін тыыда хығыр пирген. Иван ідӧк «Кӱн сузы» ансамбльның араласчызы полча.
Илбек Ада чааға чарыдылған сарыннарны алып алза, «Катюша» иң саблығ сарын полар. Аны Хакас хазна университедінің студенттері ӱс тілнең толдырғаннар: хакас, орыс паза англия. Хакас тіліне «Катюша» сарынны Наталья Таскаракова тілбестеен.
Илбек Ада чааға чарыдылған мероприятие тоозылғанда, студенттер свечі тамысханнар, анзы чаада чат халғаннарны піс хаҷан даа ундутпин-чатханыбысты киречілепче...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы