ООЛАҒАСТАР ЧАПЧАҢ ОЙНААННАР
08.02.2017
Хабарлар
Ағбанда «Ӱрілген меспек» клубтың меспектіг хоккейҷе тиксі Россия марииның финал ойыннары узарадылча.
Анда сигіс команда араласча: «Юность-ИЦС» (Иркутск), «Кузбасс» (Кемеров), «Енисей» (Хызылчар),
«Родина» (Киров), «Водник» (Архангельск), «ДЮСШ Абакан» (Ағбан), Индіркі Новгород облазының піріктірілген командазы паза «Ерофей» (Хабаровск).
Киҷее тӧрт ойын ирткен. Пастағы ойында «Юность-ИЦС» (Иркутск) паза «Кузбасс» (Кемеров) командалар тоғасханнар. Мында «Юность-ИЦС» 3:0 саннаң чиңіс тутхан. Голлар Данил Пашков (22, 36 мин) паза Иван Воробьев (31 мин) киргеннер. 33-ҷі минута пар-чатханда, «Кузбассха» пенальти сабар оңдай пирілген. Че Дмитрий Демидов
12 метрдең меспекті хаалхадаң чаза сабысхан.
Ікінҷі ойында «Енисей» (Хызылчар) паза «Родина» (Киров) командалар тоғасханнар. «Енисей» 2:3 саннаң утырт салған. «Родина» ӱчӱн турызып, Антон Пысин (3 мин), Илья Чернов (20 мин) паза Кирилл Шитов (36 мин) голлар киргеннер. «Енисей» командада ікі голны Антон Савлук 27-ҷі паза 35-ҷі минутада кирібіскен. Ікізінде дее пастар ағаа Вадим Уполовников пирген. 35-ҷі минутадағы гол пулуңнаң кирілген.
Ідӧк киҷее «Водник» (Архангельск) паза «ДЮСШ Абакан» командалар тоғасханнар. Ойын уғаа табырах парған. 14-ҷі минута парчатханда, «Водниктің» хоккеизі Виктор Луковников «ыырҷызын», правилоларны сайбап, хаалхазының хыринда тохтадып алған. Че «ДЮСШ-тың» хоккеизі Сергей Кильчичаков пенальти сапханда, хаалха хадағҷызы меспекті тудып алған. 15-ҷі минутада Виталий Дроздов пас пиргенде, Сергей Кильчичаков гол кирібіскен. Пастағы таймда паза гол кирілбеен.
Ікінҷі таймның 2-ҷі минутазында «Водник» санны тиңнестірібіскен. Голны Клим Четвериков кирібіскен. 32-ҷі минутада Виталий Дроздов меспекті Сергей Кильчичаковха читірген, анзы ікінҷі голын кирібіскен. Пістің олғаннар 33-ҷі минутада атакаа парчатханда, «Водниктің» хоккеизі Вадим Кадин правилоны сайбабысхан. Че Сергей Кильчичаков пазох 12 метрдең гол кир полбаан. Сергей ідӧк 35-ҷі минутада меспекті хаалхаа кире сабысхан. Ойын тоозылчатханда, 40-ҷы минутада «Водниктің» хоккеизі Василий Холопов ДЮСШ-тың хаалхазынзар ікінҷі гол кирген. «ДЮСШ Абакан» 3:2 саннаң чиңіс тутхан.
Киҷее Индіркі Новгородтың паза Хабаровсктың командалары тоғасханнар. Ойын 2:2 саннаң тоозылған. Индіркі Новгород командада Тимофей Якушенко (8 мин) паза Иван Захаров (25 мин), «Ерофей» командада Артём Гучок (9 мин) паза Кирилл Рекунов (32 мин) голлар киргеннер.
Ойыннар уғаа хынығ ирткеннер. Олғаннар «ыырҷыларына» кирілген полған на голға ӧрінгеннер. Гол кирібіссе, команда хоккеисттері, матап хуҷахтазып, удур-тӧдір алғыстап турғаннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы