ХАКАСИЯДА АРХЕОЛОГИЯ ИС-ПАЙЫНЫҢ КІНІН ТӦСТИРГЕ
15.03.2017
Хабарлар
Хакасияның пазы Виктор Зимин, Москвада тоғыс чорығынаң полып, пасха хан чирі киректерінҷе министр Сергей Лавровтың хығыртии хоостыра регионнар аразындағы тоғысчы чыылығда араласхан. Тоғазығ Россия МИД-інің туразында ирткен. Хығыртылған регион устағҷыларының аразында Татарстанның президенті Рустам Минниханов, Башкортостан Республиканың пазы Рустэм Хамитов, Саха (Якутия) Республиканың пазы Егор Борисов, Алтай Республиканың пазы Александр Бердников полғаннар. Чыылығда ідӧк Россияның ЮНЕСКО киректерінҷе комиссиязының нандырығлығ хачызы Григорий Орджоникидзе, Россия президентінің культураҷа паза искусствоҷа советнигі Владимир Толстой араласханнар.
Чыылығ национальнай республикаларда иртірілчеткен танығлығ мероприятиелерні хайди-да піріктірер оңдай тілиріне чарыдылған. Хакасия тархын-культура ис-пайын хайраллирына чарыдылған дискуссиялығ площадказын ӧткін тилітче. Пасха субъекттерде постың мероприятиелері пар. Хайди чоохтап пирген республика пазы Виктор Зимин, хазнаның пасха хан чирі киректерінҷе министрі оларны, пір календарьға киріп, піріктірібізерге паза хабазығ пир турарға чӧп пирген.
- Піс пос чирінде кӧп хынығ паза кирек мероприятиелер иртірчебіс, че олар удаа иртірілчеткен чирдең ырах сых полбинчалар. Аннаңар пӱӱн кӱстеністерні піріктірерге, халых чонның паза эксперттернің, ол санда пасха хан чирлерінің, хайиин тартарға ӱгреніп аларға кирек. Піс пӧкчеткен пӧгіннер кӧп хабазығ паза хайығ табар ӱчӱн, хынығ паза олох туста азых арах пол турар ӱчӱн, - тоғазығның салтарларынҷа сағыс-кӧрізінең ӱлескен В.М.Зимин. - Мына, кӧзідімге, пістің тархын-культура ис-пайынҷа форумыбыс. Аның полызиинаң піс кӧп пӧгіннерні пӧк сыххабыс. Иң не пастап, пістің археология ис-пайын республиканы тилітчең кӱске паза культурадағы аарластығ нимелерні хайраллаҷаң системаа айландырар ӱчӱн.
Республика пазының чооғынаң, форумның иң улуғ чидіглерінің пірсі Хакасияның музей-культура кінінің пӱдірии полча. Ол ідӧк аймах кӧзідіглер, чарыдығлығ паза ӱгредігліг мероприятиелер, этнотуризм, наука істезіглерін иртірҷең орын полар пӧгіннең пӱдірілген.
- Хакасия пістің хазнаның иң улуғ музейлерінең, ол санда Эрмитажнаң, Хазнаның тархын музейінең, Россияның этнография музейінең, Кунсткамеранаң, пірге тоғынардаңар чӧптезіглер ит салған, - хосхан республика устағҷызы. - Чыылығда мин регионның археология ис-пайын хайраллирынҷа хайдағ тоғыс апарылчатханынаңар чоохтап пиргем. Улуғ Салбых кӱргені тӱрчедең ЮНЕСКО-ның тиксі тилекейдегі ис-пайының санына кирілердеңер. Хакас хазна университедінде республикада ЮНЕСКО кафедразын тӧстирінҷе улуғ тоғыс пасталыбысханынаңар. Ол кафедра ӱгредігліг, наука проекттері пастыра Сойан-Алтай чоннарының пос оңдайлығ культуразын хайраллирына паза тилідеріне хозым идер.
В.М.Зиминнің кӧрізінең, пӱӱнгі кӱнде республикада археология ис-пайын хайраллирынҷа паза пасхазын аннаң таныстырарынҷа тоғыс апарарына прай оңдайлар тӧстелген. Ідӧк регион устағҷызы Виктор Зимин Хакасияда Евразиядағы археология ис-пайының кінін тӧстирге чӧпнең сыххан.
- Полған на регионның саблығ нимелері, площадкалары пар, че піс кӱстеністерібісті піріктірерге кирекпіс, кӧп арах удур-тӧдір, пасха хазналарның кізілерінең хада чоохтазарға. Анзына полған на мероприятие хазнаның танығлығ киректер календарьында пос орнын табарға кирек, пір туста иртірілбин. Кӧзідімге, археология ис-пайын хайраллирынҷа сурығлар
- Хакасияни, анзынаң пірдеезі таласпинча. Пасха регионнарның - постың чапсых нимелері. Піс прайзы удур-тӧдір полыс полар оңдайлығбыс, андада кӧп нимее чидербіс. Мына мындағ нимелердеңер паза федеральнай кін ол сурығларҷа хайдағ хабазығ пир полардаңар парған чоох пу чыылығда, - таныхтаан Хакасияның пазы.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде