ІҶЕ КАПИТАЛЫН - МАЛ ПАЗА ААЛ ХОНИИ ТЕХНИКАЗЫН АЛАРЫНА
19.04.2019
Хабарлар
Ӧӧн сурығларнаң Пётр ВОРОНИН паза Евгений МОЛОСТОВ таныстырғаннар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиум чыылиин иртірген. Ӧӧн сурығларның пірсі республиканың іӌе капиталынаң (100 муң салковайнаң) тузаланар оңдайны алғыдыбызардаңар полған.
Хакасияның Ӧӧркі Чӧп президиумы 17 апрельде, теестегі чыылиин иртіріп, он артиинаң сурығ ӱзӱрібіскен. Ӧӧн сурығлар республиканың законнарынзар алызығлар кирчеткен закон проекттері полған.
«Постың полызығлығ хониинаңар» республика законынзар алызығлар кирчеткен закон проектінең аал хонии политиказынҷа, ас-тамахча паза чирнең тузаланарынҷа комитеттің кнезі Пётр Воронин таныстырған. Хайди ол чарытхан, алызығлар пістің законны тӱптестірер пӧгіннең кирілчелер. Ирткен чылда чирде чурт пӱдірерінең палғалыстығ федеральнай законодательство алыс парған. Амды постың полызығлығ хониин апархаң чир участогында чуртаҷаң тура пӱдіреріне пірге кирексіністер турғызылған.
- Мының алнында постың чир участогында нинҷе дее хадыллығ тура, ползын ол тӧрт, пис алай алты даа хадыллығ чурт, пӱдірерге чарадылҷаң, - чарытхан Пётр Воронин. - Амды посха чурт пӱдірерінде прайзына пірге кирексіністер турғызылча - ол алынҷа турчатхан, чир ӱстӱнде ӱс хадылдаң кӧп нимес, пӧзии 20 метрдең аспинчатхан тура.
Чурттың улиин алза, мында сағам алызығлар чоғыл тіп хосхан комитет устағҷызы. Президиумдағылар, республика законын федеральнайға килістіре тӱптестірерге кирек полчатханынаң чаразып, закон проектін чағынғы сессияда ӱзӱріге сығарарға чарат салғаннар.
Ікінҷі закон проекті республика бюджедінең пирілчеткен іҷе капиталына теелген. «Хакас Республикада кӧп палалығ сӧбірелерге социальнай хабазығ пирҷең хоза оң-дайлардаңар» республика за-конынзар хайдағ алызығлар кирілчеткенінең хазых хайраллирынҷа паза социальнай политикаҷа комитеттің кнезі Евгений Молостов, ол ідӧк закон проектін тимнееннернің пірсі полча, таныстырған.
- Чоох парча республиканың іҷе капиталынаң ол федеральнай іӌе капиталына хоза республика бюджедінең пирілчеткен 100 муң салковай (республиканың кічіг аалларында чуртапчатханнарға - 200 муң салковай), тузаланар оңдайны алғыдыбызардаңар, - чарытхан Евгений Молостов.
Амғы туста республикадағы іҷе капиталына сертификаттары пар кӧп палалығ сӧбірелер ол ахчанаң ӱс ле кӧстегҷе тузалан полар оңдайлығлар: чурт оңдайларын чахсыландырарына, палаа (палаларға) ортын профессиональнай алай пӧзік ӱгредіг пиреріне, паланы (палаларны) имниріне. Че федеральнай закон регионнарның ізебінең тӧлелчеткен іҷе капиталын пасха даа кӧстеглерге позыт турарға чаратча осхас. Евгений Молостов закон проектін тимнирінде федеральнай законодательство паза пасха регионнарның опыды санға алылғанын таныхтаан.
Іди федеральнай законодательствоҷа ол ахчаны кинек палаларға кирек ниме-ноолар паза полызығлар аларына позыдарға чарир. Закон проектінҷе ідӧк республиканың іҷе капиталынаң тузаланарына наа кӧстеглер кирері кӧрілче: мал-хус, аарлар паза аалда тоғынарына кирек аал хонии техниказын алары. Аннаң пасха кирілчеткен алызығларҷа регионның іҷе капиталын палаларны имнирге ле нимес, ідӧк іҷе-пабаны имниріне хорадарға чарадары кӧрілче.
Президиумдағылар хоза кирілчеткен кӧстеглер, иң пурнада аалдағыларға - ахчаны мал-хус, аал хонии техниказын аларында тузаланары, тузалығ полчатханын таныхтааннар. Че олох туста закон проектіне Хакасия правительствозының ӱндезии киректелчеткеніне хайығ айландырғаннар. Закон алыл парза, іҷе капиталынаң сах андох тузаланарға сағыныбысханнарның саны ӧс парарға айабас. Че сыдазар ба анзына республика бюджеді? Пу чылға бюджетте пу кӧстегҷе нинҷе ахча кӧріл парғанын санға аларға паза аны хоостыра закон проектінҷе хоза тоғынарға чарат салғаннар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде