ХАЗНА АЛЫМЫ ХЫЗЫРЫЛЧА
26.04.2019
Хабарлар
Ӧӧркі Чӧп. Хакасияның Ӧӧркі Чӧп президиумының чыылиин Ӧӧркі Чӧп кнезінің пастағы орынӌызы Юрий Шпигальских иртірген. Ӱзӱріге сығарылған ӧӧн сурығларның пірсі бюджеттеңер полған.
Иң пастағызын ӱзӱріге «Хакасияның имнег страхованиезін хайди даа идер территориальнай чыынды бюджеді 2018 чылда хайди толдырылғаннаңар» республика законының проектінеңер сурығ сығарылған. Хайди искірген пу чыындының директор орынҷызы Ирина Баутина, Хакасияның имнег страхование чыындызы бюджедінің парыстығ чардығы 8,522 миллиард салковайға тиңнелген, хорадығлығ чардығы - 8,703 миллиард салковайға.
Ирина Баутина, дефицит парын таныхтап, хайдағ статьяларҷа нинҷе ахча хорадылғаннаңар кӧп сан адаан. Юрий Шпигальских имнег киреенде ам даа сидіксіністіг сурығлар кӧп сығысчатханын таныхтаан, Ӧӧркі Чӧптің хазых хайраллирынҷа паза социальнай политикаҷа комитедіне пазағы сессияда ол сурығларны ӱзӱрерге тимнен саларға чахығ пирген.
Хакасияның финанстар министрі Ирина Войнова «Республика бюджеді 2018 чылда хайди толдырылғаннаңар» Хакасия законының проектінеңер чоох тутхан. Аның искіриинең, ирткен чылда республика бюджедінің парыстығ чардығы 34 миллиард салковайға тиңнелген, хорадығлығ чардығы - 31 миллиард салковайға. Хазна алымын чабарына 2,7 миллиард салковай ызылған. Пу алым кӧріл парған график хоостыра чабылча. 2018 чыл пасталчатханда, хазна алымы 136 процентке тиңнелген полза, чыл тоозылчатханда, ол сан 96 процентке тиңнелген.
Бюджеттің 24 миллиард салковайы республиканың позының парыстары полған (НДФЛ паза пасха даа налогтар), 10 миллиард салковайы - федеральнай бюджеттің трансферттері. Кредиттерҷе алымнарын пылтыр республика ікі хати хызырыбысхан. Бюджеттің хорадығлығ чардығы ӧӧнінде бюджет сферазындағы тоғынҷыларнын чал ахчазын тӧлиріне, социальнай хабазығлар пиреріне, муниципальнай пӱдістерге полызарына парған.
Юрий Шпигальских Ӧӧркі Чӧптің бюджетче паза налогтар политиказынҷа комитедіне паза Сыныхтағ-сананыс палатазына 23 майда иртер бюджет ӱзӱріглеріне тимнен саларға чахаан.
Чыылығда ідӧк «Россия Федерациязындағы ӱгредігдеңер» федеральнай законның 70-ҷы статьязына алызығлар кирердеңер» федеральнай законның проектіне ӱндезіг пирердеңер сурығны Ӧӧркі Чӧптің культураҷа, ӱгредігҷе паза наукаҷа комитеттің кнезі Оксана Разварина чарытхан. Мында хысхаҷахти чоохтаза, пӧзік ӱгредіг заведениелерінзер кірерге экзаменнер тударға алай ЕГЭ салтарларынҷа кірерге чарадылардаңар чоох парча. Мының алнында кізі школаны экзамен тудып тоосхан полза, амды вузсар ағаа экзамен тудып кірерге чарадылар.
Ӧӧркі Чӧптің экологияҷа, чир-чайаан ис-пайынҷа паза чир-чайааннаң тузаланарынҷа комитеттің кнезі Валерий Старостин «Производствоның паза тузаланғанның артхан-халғанынаңар» федеральнай законға алызығлар кирердеңер» федеральнай законның проектіне ӱндезіг пирердеңер сурығҷа чоох тутхан.
Хайди ол таныхтаан, пу сурығ прай чуртағҷыларға теелче. Сӧп-сап чыыр ӱчӱн тарифтерні хызырарға киректелче. Аннаңар мында город-аалларға чағын полигоннарнаң ӱр нимеске тузаланарға чарадардаңар чоох парча. Чӧптезіг идіп, чағын регионнардағы полигоннаң тузаланарға чарадылар. Андада тарифтер дее хызырылар.
Чыылығда Юрий Шпигальских СМИ-лар аразында «Хрустальный барс» марығ 29 апрельдең пасталчатханнаңар искірген. Ідӧк кізі праволарынҷа Хакасиядағы уполномоченнайның тоғызын толдырчатхан Ольга Крафтты Ӧӧркі Чӧптің Аарластығ пічиинең сыйыхтирдаңар чарадығ алылған.
Автор :
Николай САЛТАРОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде