ПАТРИОТИЗМ - ПІСТІҢ САҒЫС-КӦГІЗІБІС
26.04.2019
Хабарлар
Россияның Матыры Вячеслав БОЧАРОВ паза Хакасияныц Халыхтар палатазының кнезі
Ольга ЛЕВЧЕНКО «тегілек стол» иртірчелер.
Матырнан тоғазығ. Хакасияның Халыхтар палатазында «Кізілерні патриотизмге ӱгредер сурығларда халых чон паза хазна хада-пірге тоғынары» сурығӌа «тегілек стол» ирткен.
Хакасияның Халыхтар палатазының хығыртиинҷа республиказар Россияның Матыры, ФСБ-ның Ӧнетін кӧстегліг кінінің «Вымпел» управлениезінің офицері, отставкадағы полковник Вячеслав Бочаров килген. Ідӧк аннаң хада килгеннер Россияның Халыхтар палатазының араласчызы, Россияның саблығ арачылағҷызы Сергей Щетинин паза Халыхтар палатазының араласчызы Денис Разумов.
Вячеслав Бочаров Бесланда полған теракт тузында заложниктерні арачылирында араласхан, анда ол аар палығлатхан. Чааҷы службазында 40 чыл полып, 1981 чылда Афганистандағы чаадаң пастап, ол прай даа «ізіг точкаларда» полған. Бесландағы терактта школазар ол пастағылар санында кире хонған, кізілерні спортзалдаң хорғыс чох орынзар сығарған. Россия президентінің Указынаң, ӧнетін пӧгінні толдырчадып, махачы паза матыр тудынған ӱчӱн, полковник Вячеслав Алексеевич Бочаровха Россияның Матыры ат пирілген. 2010 чылда ол отставкаа сых парған.
2014 чылдаң Вячеслав Бочаров Россияның Халыхтар палатазының араласчызы полча, амды ол Халыхтар палатазы хачызының пастағы орынҷызы. Ідӧк ол Россияның Паралимпийскай комитеді исполкомының араласчызы, чааҷыларға паза «ХХI век-теп чааҷылар чаалардаң тоғыр» чаалазығлар араласчыларына полысчаң чахсы киректер чыындызынаң устапча, Афганистандағы чаа ветераннары пірігізінің устаана кірче.
Ӱр ниместе ол пазох пір сыйыхха турысхан. 10 апрельде кізілерні патриотизмге ӱгредерінде улуғ тоғыс апарчатхан ӱчӱн, Вячеслав Алексеевичке «Ынархас» орден читірілген.
Хакасияның Халыхтар палатазының кнезі Ольга Левченко, мындағ матыр, саблығ кізі республиказар килгенін таныхтап, амды ол «тегілек столның» тоғызында аралазып, позының пай опыдынаң, кӧрізінең ӱлезерінеңер искірген. Мероприятиеде республиканың министерство-ведомстволарының, Халыхтар палатазының, халых пірігістерінің кізілері араласханнар.
Вячеслав Бочаров, позының чуртас чолынаңар, хайдағ «ізіг точкаларда» полғаннаңар, Бесландағы терактта арғыстары, палаларны арачылап, чуртастарын пир салғаннаңар чоохтаан. «Амғы туста чааҷыларға сағба чох чіт парар оңдай чох ползын», - теен ол. Аның чооғынаң, ол «Кізілерні патриотизмге ӱгредер сурығларда халых чон паза хазна хада-пірге тоғынары» сурығҷа Халыхтар палатазы иртірчеткен «тегілек столда» аралазарға пӧгін тутхан.
- Илбек Ада чаадағы Чиңіс кӱніне тимненчедіп, чонны патриотизмге ӱгредер тоғыста хазна паза халых чон хада-пірге тоғынарға киректелчеткеннеңер Россия президенті Владимир Путин кӧп хати чоохтаан. Патриотизмге ӱгредері хатығ тӧстеге тӧстенерге кирек, теен президент. Мин позым комсомолец полғам, чииттернең кӧп тоғыс апарғам. Пістің сағыс-кӧгізібістің кирексіністері - ол патриотизм. Президент Федеральнай Чыылығзар позының полған на айланызында аны таныхтапча.
Аймах тӧллер аразында пасха кӧрістер полбазын. Амды пос кӧңнінең апарылчатхан тоғысты, волонтёрствоны, наставничествоны тилідерге кирек Пу кӱннерде хазнаның «Наставничество ӱчӱн» наа сыйии - танығ - тӧстелген. Мин кӧп городта, ол санда Магаданда, Махачкалада, Ростовта полғам. Андағы олғаннар, чииттер Чир-суубысты арачылир профессияны таллапчалар. Аннаңар школаларнаң сыбыра патриотизмге ӱгредер.
Амды Илбек Чиңістің 74-ҷі чылы чағдапча. Чиңістің тании Чиңіс Знамязы полча. Піс ам Халыхтар палатазының патриотизмге ӱгредер тоғызы хайди тӱзімніг апарылчатханын кӧрербіс, - чоохтаан Вячеслав Бочаров.
«Тегілек столның» тоғызын апарчатхан модератор Любовь Черчинская сӧс Хакасияның ӱгредіг паза наука министрінің орынҷызы Юрий Сагалаковха пирген. Хайди Юрий Гаврилович искірген, патриотизмге кізілерні ӱгредер тоғыс уғаа кирек. Пістің республикада андағ тоғыс чахсы апарылча. Иртірілчеткен мероприятиелернің кӧбізі ағаа чарыдылча. Ӱгредіг учреждениелері апарчатхан тоғыста партнёрлар сыбыра араласчалар.
- Піс Ветераннар чӧбінең, ДО-СААФ-наң, военкоматнаң, пасха министерство-ведомстволарнаң кізілерні патриотизмге ӱгредер тоғысты хада-пірге апарчабыс. Іди хыйғалар ойыннары, сабланыс уроктары, Илбек Ада чаадаңар сурығ-нандырығлар, «Чиңіс» чаа-спорт ойыны иртірілче, митингтерде араласчабыс, пасха даа кӧп мероприятие иртірілче. Патриотизмге ӱгредерінде каникуллар чох полча, - таныхтаан министр орынҷызы.
Мында Вячеслав Бочаров георгиевскай ленталардаңар чоохтаан. Аның таниинаң, тӱрчедең орамаларда олғаннар, чииттер кізілерге георгиевскай ленталар тарадарлар, че олар постары ол ленталар ниме таныхтапчатханын пілбинчелер. Аннаңар мероприятие алнында оларнаң чарыдығлығ тоғыс апарарға кирек. Пасха хазналарда, георгиевскай ленталарны чаратпин, пістің хазнадаң тоғыр кӱрезіг апарчалар.
Хакасияның чииттер киректерінҷе хазна комитедінің кнезі Татьяна Карташованың чооғынаң, республикада юнармеецтернең чахсы тоғыс апарылча. Регионда юнармеецтернің 63 отряды саналча, олар аймах ӱгредіглерде полчалар, спортнаң айғасчалар, тиріглернең тузаланарға ӱгренчелер. Пу тоғыста чааҷылар частьтары чахсы хабасчалар.
Л.Р.Кызласовтың адынаң чир-суғ ӱгренҷең национальнай музейнің директоры Андрей Готлиб патриотизмге ӱгредеріне чарыдылған хайдағ кӧзідіглер иртірілчеткеннеңер чоох апарған. Аның чооғынаң, кӧп акция иртірілче, аймах проекттер чуртасха кирілче. Іди «Несокрушимая, легендарная...» проект хоостыра МВД-ның музейі позының экспонаттарын национальнай музейде кӧзіткен, аны кӧрерге 34 муң кізі кил парған.
Хакасияның «Асхыр» чииттер пірігізінің кнезі Айла Тюньдешева пірігісте кӧп чиит улус, студент, тоғысчы араласчатханнаңар чоохтаан. Іди ӱр ниместе хакас чииттернің пастағы съезді ирткен, анда республиканың тархынын, культуразын, кибірлерін, хакас тілін хайраллир сурығлар ӱзӱрілген.
Ідӧк мероприятиеде, чоох тудып, постарының патриотизмге ӱгредер тоғызы хайди апарылчатханнаңар искірігнең сыхханнар «Боевое братство» тиксі Россиядағы ветераннар пірігізінің Саяногорсктағы пӧлиинің кізізі Владимир Ивакин, Россияның ӱгренҷілері чӧрімінің региондағы пӧлиинің кнезі Пётр Макарчук паза даа пасхазы.
Ӱзӱріглер тоозылғанда, «тегілек стол» араласчылары республикада чонны патриотизмге ӱгредер тоғысты улам тӱзімніг апарардаңар резолюция алғаннар.
Россияның Матыры Вячеслав Бочаров ідӧк Ағбанда Индіркі Соградағы «Заречье» культура-тынағ кінінде чуртағҷыларнаң тоғасхан. Хакас техническай институтта студенттернең тоғазығ иртірген. Ол позының чуртас чолындағы пай опыдынаң ӱлескен, сағыс-кӧрізін чонға читірген, ӧӧн хайығны патриотизм сурығларына айландырған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы