СЕРГЕЙ МЕНЯЙЛО: «ПУ ПӦГІЛҶЕҢ СУРЫІҒ»
30.04.2019
Хабарлар
Ӱлгӱ. Ирткен неделяда Хакасиязар Россия президентінің Сибирьдегі федеральнай округтағы полномочиеліг кізізі Сергей Меняйло, кил парып, республика ӱлгӱлерінең хада ӧнетін чыылығ иртірген. Ӧӧн сурығ - ЖКХ сферазыңдағы чарытхы алымнарынаң палғалыстығ сидіксініс.
Сергей МЕНЯЙЛО чыылығда алынҷа чахығлар пирген
Ирткен пятницада, 27 апрельде, республиканың правительство туразында ӧнетін чыылығ ирткен. Чыылығны Россия президентінің СФО-дағы полномочиеліг кізізі Сергей Меняйло апарған. Чыылығда Хакасияның пазы Валентин Коновалов, Хакасияның Ӧӧркі Чӧп кнезі Владимир Штыгашев, республика правительствозының кізілері, «МРСК Сибири» ПАО-ның устағ-пастаа, Россияның минэнергозы, минстройы паза тарифтерҷе федеральнай служба специалисттері араласханнар. Чыылығның ӧӧн сурии республикадағы ЖКХ предприятиелерінің чарытхы ӱчӱн алымнарынаң палғалыстығ сидіксіністі пӧкчең оңдайлар табары полған.
Сергей Меняйло, чыылығның тоғызын пастап, Россия президентінің толдырығлығ ӱлгӱлерге ӧнетін чахии парын таныхтаан. Ол пічік хоостыра регионнардағы ӱлгӱлер ЖКХ сферазында алымнар чох полары ӱчӱн нандырығлығ полчалар. Полпредтің искіриинең, Хакасияда пу сурығҷа сидіксініс пар: чарытхы ӱчӱн алымнар ӱс хати ӧс парғаннар паза 400 миллион салковайдаң ас парғаннар.
Мының соонаң президенттің полномочиеліг кізізі Хакасияның пазы Валентин Коноваловха паза республика правительствозындағыларға сурығлар пиріп пастаан: «Регионда нинҷе ЖКХ предприятиезі?», «Оларның нинҷезі банкрот полчатхан оңдайда?», «Алымнар сығысчатханының ӧӧн сылтаа?», «Алымнарның пӱдізі хайдағ?» Нандырығлар Меняйлоның кӧңніне кірбееннер, ноға-да республика чиновниктері искірген паза полпредтің холында полған саннар пасхалалчатханнар.
- Пӱӱнгі ӧӧн пӧгін - амғы алымнарның ӧзізін тохтадыбызары паза парчатхан тӧлеглерҷе тоғысты узарадары, - таныхтаан Россия президентінің Сибирьдегі федеральнай округтағы полномочиеліг кізізі. - Май айдаң наа чылығ пирҷең тусха тимненіс пасталыбызар. ЖКХ объекттері мындағ оңдайда полғанынаң піс хысхы тусха тимнен полбаспыс. Че позымның опыдымнаң чоохтирбын - пу пӧгілҷең сурығ. Піс киректің узы-пазына сығып аларбыс.
Сергей Меняйло прай ЖКХ предприятиелерінің тоғызын сыныхтабызарға пӧгін турғысхан. Ол тоғысты федеральнай специалисттер командазы апарар, хайзынаң Россияның минстройы департаментінің директор орынҷызы Андрей Чибисов устир. Ол сыныхтағлығ тоғыстарның салтарларынҷа 15 майға теере сидіксіністін узы-пазына сыхчаң план тимнел парарға кирек.
Федеральнай ведомстволар сидіксіністі пӧкчең оңдайларҷа пуох тусха теере тоғыныбызарға киректер. Сергей Меняйло монополиялардаң тоғыр службаа чарытхы тарифтері экономика саринаң килістіре полчалар алай чох па тіп сыныхтағ иртірерге чахығ пирген. Істеніс инспекциязы банкрот полчатхан ЖКХ предприятиелеріндегі тоғынҷылардаңар искіріглерні чыып аларға кирек. Ростехнадзорға, тізең, предприятиелерге чарытхы пирері техническай броняға теере тӱзірілгенде, ноға олар тоғыстарын саңай тохтат турғаннарын сыныхтабызарға чахығ пирілген. Пу синде чарытхы пиргені котельнайларға тоғынарға оңдай пирче нооза. Предприятиелернің паспорттары техника кирексіністеріне нандырбинчалар тіп чігленіс пар тіп таныхтаан полпред, пу чахығны пиріп. Сергей Меняйло ідӧк республика прокуратуразын прай ЖКХ предприятиелерінің тоғызын сыныхтабызарға сурынған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде