ХЫСХЫЗЫНА АМОХ ТИМНЕНЕРГЕ
07.05.2019
Хабарлар
Сілкер айының 3-ӌі кӱнінде Хакасия пазы Валентин Коновалов Асхыссар тоғыс чорығынаң кил парған. Тынағ кӱннері дее полза, Хакасияның пазы Асхыс аалның котельнайларын кӧрерге килген. Валентин Коноваловнаң хада аның орынҷызы Юрий Курлаев, Хакасияның чурт-коммунальнай хоных министрінің орынҷызы Анатолий Безлепкин полғаннар.
Оларны удурлааннар Асхыс аймаа пазының пастағы орынҷызы Галина Новикова паза коммунальнай киректерҷе орынҷызы Николай Асочаков, Асхыс аалның пазы Марина Анжиганова паза «Аскизтеплоснаб» МУП-тың ӧӧн инженері Алексей Идимешев.
Аалға кірчетсе, хаҷанда сырзавод турған, амды аның игір трубалығ котельнайы ла халған. Ол котельнайдаң кӧріп пастааннар. Андартын пастыхтар пасха котельнайларны кӧрерге чӧрібіскеннер. Хара таснаң одынылчатхан котельнайларның прайзында харасхы, ыс чыстанып, пырын тоолапча. Асхыста чарытхы кӱзінең тоғынчатхан ікі котельнай пар. Оларның істінде чылығ паза чарых. Че, андағ даа полза, пу ікі котельнай иң уйаннарның санында. Олар суғны электрокотёллар пастыра чылытчалар, чарытхы кӧп хоратчалар. Чарытхы паазы уғаа пӧзік, 7-8 салковай пір киловатт ӱчӱн. Аның сылтаанда ол ікі котельнай «Аскизтеплоснаб» предприятиені тӧбін тартча.
Котельнайларның аразында иң кірліглернің санындалар иргі сырзаводти паза школа хыриндағызы. Школа хыриндағы котельнайда пастыхтар ӱр тудылбааннар. Анда пестер унах кӧснең одынылчалар. Аны ӧртирге кӧп кии кирек, аннаңар пес істіне кии ӱбӱртілче, че ыс сығарға маңнанминча. Іди ыс паза сағыннар пес ахсынаң паза нинҷе пар тизіктең сығара сабылча.
Прай котельнайларны кӧріп алып, Хакасия пазы Валентин Коновалов тасхарох ӧӧн кӧстеглердеңер чоохтаан, ӧӧнінде хысхызына тимненістеңер. Пастыхтар аразында кӧмес сарыстар полған, че ол кирекке пір дее харығ полбас тіп сағынчам. Ӧӧні - хысхызына амох тимненері. Хайдағ читпестерні тӱзедерін аймах, аал устағҷылары чахсы пілчелер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы